Trau-Zauber (2025)

27/01/2025

Mini gross Liebi:
Mini beide Lieblingsmensche🤍🤍.
Min Maa Andreas. Er isch sit 10.5 Johr a minere Site und de Mensch, wo mi komplett macht.
Und üsere kli Zauber-Lehrling, wo üsers Läbe eifach so perfekt macht!

Mis gröschte Laster: Maltesters🤭

Mini Lideschaft:
Kitschigi Naturschauspiel bestuune wie e klises Kind🥰

Bi dem Lied kömed mer auch noch 1000x lose immer no Träne:
Coldplay - Fix you🥹

Seltsami Agwohnheite:
I bi en kline Monk. Bi mir muss alles sini Ordnig ha. Sogär bim Wösch ufhänke hani e Reihefolg🫣.

Lieblingsort: Hawai'i (aber abgseh vo dem lieb i üsers Dahai über alles)🌈

Gröschte persönliche Erfolg: D'Komfortzone verloh und dur da Neus woge. Genau so isch min TRAU-ZAUBER entstande✔️.

Gröschti Schwächi: Selbstzwifel, immer denke, nöd guet gnueg z'si🤔

Positivi Eigeschafte:
Sehr empathisch, ifühlsam, humorvoll, hilfsbereit, zueverlässig, versuech immer, Vorurteil z'vermide, ka Emotione guet i Wort fasse😊

Negativi Eigeschafte:
Ungeduldig, mängmol z'nöch am Wasser baut, min innere Monk ka au für mi sälber recht astrengend si, selbstkritisch, hochsensibel (ka aber au durchus hilfrich si), sportlich sehr undiszipliniert (a*o seeeeeeehr undiszipliniert), i iss gern (matched super mit de letschte Eigeschaft, gäll?!)😖

Da isch mer wichtig:
Dankbarkeit. Nie vergässe, wie guet und wie schö mir's hönd und dass da absolut nöd selbstverständlich isch. E Dach über em Kopf, gsund si, freie Wille/Meinigsüsserig (Frauestimmrecht), kei Hungersnot, Familie und Fründe nöd wit entfernt, kein Krieg i unmittelbarer Nöchi... so dankbar, so privilegiert dörfe z'läbe🤍.

25/01/2025

🖤 Wenn us em TRAU-ZAUBER en TRAUer-ZAUBER wird...🖤
.. denn hät s'Schicksal mit ere steiharte Fust zuegschlage.

I ha scho noch minere Usbildig zur Trau-Rednerin gwüsst, dass i früehner oder spöter gern au Willkommens-Fiire wie au Verabschiedige möcht abüte könne.
Etz isch de Moment tatsächlich gad um einiges früehner ko als i denkt ha.
Aber, wie scho bi de Hochzite, ischs au dasmol so, dass gwüssni Sache im Läbe eifach ihre Lauf nähmed, ganz ohni dass mes aktiv goht go sueche oder plane.

Am Mäntig Mittag hani e völlig unerwartets Telefon überko. E Telefon, woni nie vergiss und mi fest bewegt hät. Es isch d'Afrog gsi, ob i echt au e Verabschiedig begleite wür. En Familiemensch mit me grosse Herz und so viel Lebensfreud, isch eifach no viel z'jung us em Läbe grisse wore.
Min Kopf hät e paar Sekunde brucht, bis er hinnenoh ko isch und d'Antwort, wo mis Herz innert de erste Sekunde scho gwüsst hät, hät könne begrife.
I ha no nie e Verabschiedig gschriebe, geschweige denn abghalte. Aber die Person, wo mi gfröget hät, hät mir so e Vertraue entgegebrocht, dass i sofort gwüsst ha, dass es guet kunnt.
Bereits am Mäntig Obet bin i mit de Truurfamili zämmegsässe und es hät sich so herzlich agfühlt, wie wenn i alli scho lang kenne wür. E tüüfi inneri Rueh hät sich bi mir igstellt.
Vom Mäntig Mittag a isch d'Zit gfühlt dopplet so schnell vergange als sus, und hüt isch de Tag vom Abschied denn bereits do gsi.

I ha selte soviel Mensche inere Kirche gseh.
Es isch bewegend und überwältigend zuglich gsi zum säh, wie wichtig dass es für Mensche isch, zum könne Abschied neh.
D'Truurfamilie wie au i sind unendlich dankbar, dass sich e liebi Seelsorgerin bereit erklärt hät zum üs drin unterstütze, dass die Verabschiedig genau so werde ka, wie sie etz letschtlich wore isch.
Mini Arbet isch immer frei vo Religion und Konfessione (absolut nöd wertend gmeint!).
Bi mir goht's immer um de Mensch und d'Liebi.
Persönlich, mit Emotione und immer mit Herz.

I bi eimol meh dankbar, dass i mini Herzensufgob gfunde ha und i hüt trotz dem trurige Alass au öppe e Lächle ha dörfe entlocke🤍.

Es isch mer e Ehr gsi!
Danke eu us tüfstem Herze!
🤍✨️

13/01/2025

Back on track...
.. langsam aber sicher bini wieder im Wedding-Mood🥰
S'erst Vertüüfigsgspröch das Johr liit bereits hinter mir und i ha ganz viel Material zum verschribe für mis März-Hochzig🥰
D'Vorfreud stigt mit jedem Tag und i merk, wie fest mir die Hochzigs-Vibes im 2024 gfehlt hönd.
Aber üsere kli Zauberlehrling hät natürlich ir Zwüschezit super mitgmacht und sogär bi einige Kennelern-Treffe sin Charme spiele loh🥰
Wie unbeschriblich dankbar bin i, dass i vor knapp 3 Johr (scho?!) zum richtige Zitpunkt agfange ha mit minere Selbständigkeit und sie sich jetzt so super mit mim Läbe mit em Zauberlehrling vereine loht🥹.
I ka kuum i Wort fasse, wie fest i mi freu, dass i zwei so extremi Herzensufgobe dörf usüebe, eini 24/7🥹, die ander so oft is sälber zueloh und verträtte ka🥹.

DANKE scho jetzt, a alli mini 2025-er Päärli!🤍
I freu mi so fest uf d'Zit mit eu und dank eu für soviel Vertraue🥹🤍

Let's do this🥳🥰🤍

23/12/2024

Do isch sie wieder...
.. die schönst Zit im Johr✨️🎄🕯. Zumindest für mi...🥰🤭
I bi scho immer so a "Wiehnachtskind" gsi. Und da nöd amol weg da Wiehnacht an sich. Viel meh wäg dera ganz speziella Zit im Johr, wo bi mir scho im November afangt. Dia Magie wo denn ir Luft lit isch för mi so wertvoll und berüehrend. Dia viela Liechtli, dass es spot hell und wieder früah dunkel wört verussa, überall Kerzli, Wiehnachtsmusig, Kuscheldecki, Trainerhosa und Kuschelsöck... ofach perfekt. So entschleunigend und ruhig...
Und immer im Bewusstsii, wia schö dass is dörf ha, und dass es absolut nöd selbstverständlich isch zum so a Läba dörfa ha. A Dach über em Kopf, Menscha wo eim gern hönd, a warms Bett, jeda Tag gnuag z'ässa...
Und trotzdem häts das Johr 2024 gschafft, zum all dem, wo mir eh scho so fest bewusst isch, no a Krönli ufsetza. Üsera kli Zauberlehrling hät üsers Läba so viel meh bericheret, als mir's je für möglich ghalta hetted. Er zeigt üs täglich, wia viel Freud ma a klina Sacha ha ka. Und ganz egal wa im Ussa vilicht gad schwierig oder dunkel isch, sobald er lächlet goht d'Sunna uf. Tönt kitschig, isch aber genau so🥰🥹.
Üsera ganz persönlich Bewis, dass ma nie dörf ufgeh, a Wunder z'glauba🥹.
I freu mi scho so fest, zum ihn mit mim Wiehnachtsfieber astecka, und ihm d'Liebi und s'Bewusstsii für dia Zit mit uf sin Weg z'geh...

Dia letschta Täg/Wucha sind recht emotional gsi. All da dörfa z'erleba, loht mis Herz vo Liebi fast platza🥹.
I freu mi uf dia nögsta paar Täg, wia no nia vorher i mim Läba. Soviel "ersti Mol" wo eifach immer i Erinnerig bliba wöred...🤍

I wünsch jedem vu eu vu Herza a WUNDERschöni, entspannti Zit🕯✨️🤍.
Lönds eu guat goh und gnüssids so fest wias nu goht.

Viel Liebi,
Fabi✨️🤍

PS:
Und hey, wissi Wiehacht!!! Wie perfekt kas denn bitte si?!🥹❄️

02/11/2024

Wie unbeschriblich schö isch es...

✨️... für s'nögsch Johr eifach scho sit Monate usbuecht z'si

✨️... Päärli dörfe z'begleite, wo ihres Hochzig eifach noch mim Kalender richted

✨️... scho wieder soviel Vorfreud z'spüre, zum uf die kline emotionale Reise goh

✨️... die eigene Arbetszite könne so gstalte, dass au de Zauberlehrling nöd z'kurz kunnt

✨️... so en traumhafte, erfüllende Bruef dörfe z'ha, wo ebe nöd nu Bruef, sondern puri Erfüllig isch

✨️...scho vo soviel Gäst empfohle z'werde, dass i (leider!) nöd emol alli Trauige aneh ka

Sososoooo dankbar🥰🥹🤍

26/09/2024

Es isch scho fascht nümma wohr...🤭🫣

Noch über ma Johr ('Tschuldigung🫣) schaff is eeendlich, zum en Post vu üserem wunderschöna Styled-Shooting macha.
Aber i ha etz gad nöd so viel aktuella Content und i glob, jeda Dienstleister freut sich o etz no über a kli Werbig🥰
Es isch sooo en schöna Tag gsi mit eu. Super organisiert vur lieba , wundervolli Dienstleister und traumhafti Locations.
Danka vu Herza för dia super Erfahrig, ihr Lieba!
Schö, hönd mir üs kennaglernt!🤍

Planung:
Fotografin:
Hair&Make Up: .beautycorner
Brautkleid:
Anzug:
Brautschmuck:
Torte:
Traurednerin:
Floristin:
Locations: Heubluemeschüür Märstetten &
Models: &
Dekoration:
Papeterie: .ch
Ringe:
Fotobox:
Hochzeitskerze:
Stühle und Platzteller:

19/07/2024

Und scho wieder hani a längeri Insta-Pausa igleit...
.. daför han i etz aber so riiichtig schöni Neuigkeita🥰!
Üsera kli Zauberlehring hät hüt vor 6 Wucha s'erst Mol könna usserhalb vu mim Buch alli verzaubera. Er macht da wörkli grossartig und so souverän🥰.
Mir sind unendlich dankbar über da riesig Gschenk, gnüssid jedi Sekunda und suugid jeda Augablick mit dem Wunder uf✨️🥹🥰🤍.

Natürlich bi o i so guat wiani nu ka am witerzaubera und freu mi schu sooo fest uf alli mini tolla Päärli woni nögsch Johr dörf begleita.
Nu wells do uf Insta gad a kli ruhiger wora isch, heisst da nämli nöd, dass nünt meh lauft bi TRAU-ZAUBER. Nei, im Gegateil.
I dörf a dera Stell schu fasch mit a kli Stolz säga, dass i för 2025 usbuechet bi🥹🥰. Mis Kontingent a Trauiga woni i mim ersta Mami-Johr macha möcht, isch tatsächlich schu usgschöpft. Ihr sind da Wahnsinn, wörkli🥹!
Selbstverständlich nimm i bereits Afroga för 2026 a, und för dringendi Aliega för nögsch Johr findid mer ganz sicher o a Lösig🥰🍀.
Danka vielmol för euri Unterstützig, dia viela Empfehliga und de Support woni mit mim TRAU-ZAUBER erfahra dörf🤍
An Traum isch wohr wora... nei, etz sogär zwei Träum🥹🥰🤍. So schö wenn ma sich da Zauber is Läba holt und dur da ganz viel magischi Moment und sini Träum (er-)läba dörf...✨️

Danka vu 🤍-a!!!

Hebid eu Sorg und ganz en schöna Summer för eu🤍☀️😎

31/05/2024

Unglaublich, wie die Zit vergoht... .. es isch scho wieder de 01. Juni.

Scho sit 10 Johr gönd mir zäme dur's Läbe.
10 Johr wo üs no viel nöcher zämmebrocht hönd, als is je erwartet hett.
10 Johr, mit unzählige wunderschöne Erlebnis, viele lustige Episödeli, einige tüftruurige Zite aber au unverhoffte, magische Moment und vorallem 10 Johr voller Liebi🤍.
Kein Mensch hät mi je so könne neh wie du🤍.
So bedingigslos und unkompliziert, so herrlich trocke und ganz ohni Druck.
I ha vo dir scho so vieles könne lerne und i bi dir für ebeso vieles unendlich dankbar. Wa i mine Auge Klinigkeite sind, isch für di gar nöd ersch vorhande. Wo bi mir e Frogezeiche stoht, stoht bi dir scho e Lösig mit Usruefezeiche. Wo i unsicher bi, gisch du mir mit ere unbeschribliche Liechtigkeit eifach e guets Gfühl.
Logisch, mängmol tribsch mi fasch in Wahnsinn mit dim Pragmatismus und i wünsch mir nöd selte e bitz meh Fiigfühl vo dir. Aber i bi mer meh als bewusst, dass i mängmol scho e Useforderig bi und i mi glücklich schätze ka, so en tolerante Mensch a minere Site ha z'dörfe🤍.
Wa mir i de letschte 10 Johr zämme erlebt und au gschafft hönd isch nöd i Wort z'fasse🥹. I ha scho öppe denkt, me könnt e Drehbuech schribe über üsi Gschicht. Und üsers kline "Happy End" kunnt eifach i öppe 2 Wuche uf d'Welt🥹✨️🤍.

Danke, dass du hüt vor 5 Johr JO zu mir gseit häsch. Dass du mi liebsch, a mi glaubsch, mini Träum und Ziel so bedingigslos unterstützisch und vorallem, dass du mir mini rosarot Brille nöd abnimmsch, sondern mi mängmol eifach träume lohsch🥰.

10 Johr Liebi - 5 Johr Ehe - e Herz voller Dankbarkeit und Liebi🤍

I lieb di über alles🤍

Bilder 1-3: 01. Juni 2019, üsere gross Tag
Bild 4 4: Üsers erst gmeinsam Foti als Paar vor 10 Johr im Juni 2014
Bild 5: Eifach e aktuells Bild
Bild 6: Üsers "Happy End"

29/04/2024

Wenn i so schöni Post überkumm, pöpperlet mis Herz vu luter (Vor-)Freud🥰

Au wenns gad recht ruhig (ruhiger als geplant🤭) wora isch uf dem Kanal, lauft im Hintergrund glich einiges.
Ob Frogeböga apassa, Verträg überarbeita, Päärli kennalerna, Buechhaltig uf da neust Stand bringa(🫣), Netzwerk pflega, ... nebst dem, dass i bis vor e paar Täg all no voll gschaffet ha, gits au bi TRAU-ZAUBER immer öpis zum tua. Es git sogär bereits ersti Zuesaga för 2025, und i freu mi riiiesig, nögsch Johr mit so viel Elan und Detail-Liebi witerz'macha, wia is letsch Johr ha könna🥰
Mis Hochzita-Kontingent isch för 2025 no recht beschränkt, well i natürli denn no a "klini" anderi Priorität ha, und i mi uf mini weniga Päärli denn aber wia gwohnt zu mindestens 150% konzentiara will.
Drum meldid eu lieber z'früah als z'spot, wenn ihr eu überleggid, mi för nögsch Johr azfröga😉🥰
Gern könd ihr o uf da Homepage verbiluaga unter:

https://trau-zauber.ch/

I freu mi uf eu🥰🤍

31/12/2023

✨️DANKA 2023...✨️
.. dass du so a wunderschös, unvergesslichs, überwältigends, magisches und seeehr überraschends Johr gsi bisch🤍🥹✨️.
Du ghörsch, zämma mit mim 2019, definitiv zu da schönsta Johr i mim Läba🥰!
I ha schu im Januar gwüsst, dass du ganz a speziells und sicher o strengs Johr si wirsch. Aber mit so vielna magischa Moment und Herzens-Zauber hett i niemols grechnet.
Mini 8 Päärli sind da absolute Wahnsinn gsi. So herrlich unkompliziert, offa und ofach zum gern ha...🤍 Jedes vu ihna mit sinera ganz persönlicha Gschicht, häts mir zunera wohra Freud gmacht, mini erst vollständig TRAU-ZAUBER-Saison mit ma riesiga Lächla im Herz z'vollenda😊.
Und s'allergrösste Wunder im 2023 hani i Form vumena klina "blinda" Passagier vu mim letschta Traumhochzig in Ascona dörfa mit Hai neh🥹🥰. Jo, ihr hönd richtig gläsa. Es git klina Zauber-Nochwuchs🥰 Völlig unerwartet und us heiterem Himmel hät sich so uf magischi Art und Wiis de Kreis gschlossa✨️.
Da isch o da Hauptgrund, warum i nümma sehr viel Posts verfasst ha i letschter Zit. I ha vu allna bereits buechta Hochzita alli bis uf Zwei wieder müsa/dörfa absäga. Da isch mer unendlich schwer gfalla, well i mi doch au sooo fest uf witeri Liebesgschichta und Traumpäärli gfreut ha. I ha mina 2024er-Päärli aber bereits Lösigsvorschläg unterbreitet und stand ihna natürlich o witerhin sehr gern unterstützend zur Sita. A dera Stell nomol a herzlichs und riesigs DANKE a dia betroffena Päärli! Euers Verständnis und euri lieba Wort hönd mi sehr berüehrt🤍. I bi mir sicher, dass ihr alli a unvergesslichs Traumhochzig werded fiira🥰🥳. I denk uf jeda Fall a eu!
An witera Herzensdank goht a alli mini Trauredner:inna-Gspänli, wo mi und mini Päärli so unkompliziert unterstützt hönd🤍.
I freu mi etz scho, ab nögstem Herbst denn wieder Afroga för's 2025 entgega z'neh🥰.
Bis denn gits sicher mol an Iblick i dia beida Hochzita 2024, öppa en Rückblick oder sus a klises Lebenszeicha😉.

So... etz blibt mir nu no, eu an super Final-Tag 2023 z'wünscha und dass euers 2024 genau so wird, wia ihr's eu vorstellid🥰🍀.

Hebid eu Sorg und rutschid guat!🤍✨️

Trau-Zauber

27/01/2025

25/01/2025

13/01/2025

23/12/2024

02/11/2024

26/09/2024

19/07/2024

31/05/2024

29/04/2024

31/12/2023

Address

Website

Alerts

Contact The Business

Videos

Shortcuts

Share