Zeitgeist Zeremonien

Home
Zeitgeist Zeremonien

Ich gestalte einzigartige Traureden für einzigartige Paare. Ich freue mich auf eure Geschichte!

09/08/2024

Bevor's ins Wuchenend got wötti euch no 5 Fakte zum Kennelerngspröch mit uf de Wäg ge, denn das isch e sehr wichtige Aspäkt vo unserer Zämmearbet.

1. S Kennelerngspröch isch absolut kostelos und unverbindlich. Es ligt mir fest am Härz das immer widr z betone, denn ihr söllet uf eures Buuchgfühl lose. Nur wenn's für euch - und natürli au für mi - passt, gön mir dä Wäg witerhin gmeinsam.

2. In dr Regel träffe mer uns irgendwo ca. uf halber Strecki zwüsche unserne Wohnort. Schribet am beste grad in eurer Afrog, wo ihr dehei sind, denn machi euch grad en konkrete Vorschlag. Natürlich gits au anderi Lösige, falls das für euch nid möglich isch.

3. Ihr münd für das Gspröch noni alli Details vo eurer Trauig wüsse und euch au nid vorbereite. Es got wirklich primär dodrum, dass mir enand kennelerne, ich biz öbbis über euri grobe Vorstellige und Wünsch erfahr und ihr natürlich au meh über e freii Trauig mit mir. Natürlich dörfet ihr mir gärn all euri Froge stelle.

4. Nachem Gspröch dörfet ihr euch für euri Entscheidig gärn Ziit lo. De Termin blibt provisorisch für euch reserviert und ich mäld mi, falls i in dr Zwüscheziit e anderi Afrog fürs gliche Datum bechum.

5. Ihr teilet mir offe und ungeniert mit öbs für euch passt oder nid und au ich dues euch sage, falls i s Gfühl ha, dass ich nid die richtig Person für euch bi. In däm Fall hilfi euch au gärn bi dr wiitere Suech. Obersti Priorität isch, dasses am Änd zwüsche em Paar und dr Traurednerin/em Trauredner passt!

So, jetzt wünschi euch aber erst mol e wunderschöne Start ins Wuchenänd und wär weiss, viellicht träffe mir uns jo scho bald zumene Kennelerngspröch.

Syrina

06/08/2024

Mir wötte uns gärn s Jo-Wort ge, aber mir wüsse gar nid wie das im Rahme vo dr Zeremonie würd usseh!

So gots vielne Pärli und wie so oft gits kei vorgfertigti Antwort, denn mir chöne das so gstalte wies zu euch und eurer Zeremonie passt. Ihr chönet sälber Froge formuliere wo ihr in däm Momänt wöttet mit "Jo ich will" beantworte, ihr chönet euch mit ere Formulierig vo mir überrasche lo oder ich mach euch en Vorschlag und mir düens zämme überarbeite bis ihr saget: Zu däne Froge mit däre Formulierig chöne mir mit voller Überzügig JO sage!

Genau das find ich jo so toll an freie Trauige!!😊 Es git kei pfannefertigi Option sondern alles - bis hi zum Jo-Wort - isch uf euch und euri Vorstellig vo Ehe und Liebi zuegschnitte. Manchi Pärli gän sich zum Bispiel es Jo für immer und ewig, anderi eins bis ans Läbensänd und widr anderi eins für jetz und in Zuekunft oder au ganz ohni ziitliche Faktor.

Es darf aber au no freier si, ihr chönet s Jo-Wort zum Bispiel au diräkt an euri persönliche Wort chnüpfe. Au do machi euch gärn individuelli Vorschläg. Und öb ihr jetzt "jo, ja, jä, i will, i wett, ich wott, vo Härze, für immer, hüt und in Zuekunft..." saget, dörfet natürli au ihr entscheide.

Schlussändlich isch aber s Jo-Wort au kei Muss für euri freii Trauig. Au ohni chöne mir, wenn das eure Wunsch isch, e wunderschöni und festlichi Zeremonie gstalte.

Ich freu mi uf jede Fall fest, wenn ihr JO zu mir als Traurednerin saget und mir denn zämme all die Aspäkt chöne bespräche und für euch zämmestelle! 😊

17/03/2024

Jä ich will
Ja i wett
Jo i wott
Oui je veux
Yes I do

S Ja-Wort isch bi vielne Trauige e ganz zentrale Momänt. Im nöchste Post verzell ich euch denn biz meh dezue.
S Päärli ufm Bild het sich jewils in dr Muetersproch vom andere s Ja-Wort ge. Ich find das e wunderschöni Möglichkeit bi zweisprochige Trauige! 😍

Ganz e schöne Sunntig Obe euch allne!
Syrina

Foto: .ch
Location:

10/03/2024

Eifach nur vo härze DANKE für euri liebe Wort! ❤

25/02/2024

Jupiiiiii!!! Sie isch ändlich do, d Website für Zeitgeist Zeremonien.

Ich ha mir fest vorgno gha, mich dä Winter um das Projekt z kümmere, da im Summer mit de Hochziite und de Prüefige vo mine Abschlussklasse eifach kei Ziit defür ume isch. Mol abgseh devo dasses natürlich sowieso au meh es "Winterwätter" Vorhabe isch. Während also anderi flissig am Fasnacht fiire gsi sin, ha ich mich voller Tatedrang an Laptop gsetzt und nach viele Stunde mis Ziel erreicht.

Ich freu mi riesig, jetzt ändlich au usserhalb vo de soziale Medie e Plattform z ha wo ich euch natürlich nomol ufe ganz anderi Art über mini Zeremonie cha informiere.

Jetzt sind ihr sälbstverständlich härzlich iglade, dr Website en Bsuech abzstatte. Ufm Desktop händer die volli Version, ufm Handy die Reduzierti mit biz weniger Bilder. Natürlich dörfet ihr au sehr gärn do es Härzli oder en Kommentar dezue hinterlo. I würd mi freue!

Danke an alli, wo mi uf däm Wäg unterstütze! ❤️
Syrina

21/02/2024

Erinnerig an e wunderbari Trauig amene sehr heisse Summertag. 😊 S Paar het zämme mit dr Location zum Glück verusschauend plant und Sunneschirm organisiert. Liebi Hochziitspaar, bitte lueget immer, dass ihr es schattigs Plätzli händ, erst rächt wenn öbber vo euch en Azug treit. D Papierfächer sin ebefalls e tolli Idee gsi und bide Gäst super acho.

S isch übrigens e tolli Location do in dr Region. Stadtnoch aber wunderschön gläge, ibettet zwüsche Bäum und em Rhy, mit tolle Rümlichkeite, eme Platz wo sich prima für Trauige unter freiem Himmel eignet und ere traumhafte Terrasse mit Blick ufs Wasser. 😍

18/02/2024

Wenn me sich über freii Trauige informiert stolperet me früener oder spöter über de Begriff "Ritual" und vieli Paar chöne verständlicherwiis erst mol nid so viel demit afo oder wüsse nid so rächt, was sie sich dodrunter vorstelle sölle.

De Sinn vomene Ritual isches, en bstimmte Aspäkt vo eurer Trauig symbolisch darzstelle. Ihr chönet so zum Bispiel buchstäblich de Ehebund knüpfe, euri Trauzüge mit ibezieh oder au Wünsch vo eurne Gäst für euri Ehe ihole.

Dr Fantasie sin bi dr Kreation vomene Ritual keini Gränze gsetzt. Wichtig isch nur, dass d Symbolik vom Ritual für euch e Bedütig het.
Bi dr Wahl vo eurem Ritual due ich euch gärn berote und schick euch, sobald ich euch biz besser kenn, au gärn Idee und Vorschläg wo zu euch und eurer Gschicht chönte passe.

Ich bi gspannt, für was für es Ritual ihr euch entscheidet!
Und falls ihr keins möchtet, isch das natürlich au absolut in Ornig.

Syrina

15/02/2024

Bi däne früehligshafte Temperature taut min Account langsam us dr Winterstarri uf.
Es isch aber nur de Account wo bizli pausiert het. Hinter de Kulisse isches flissig witergange mit Kennelerngspröch fürd Saison 2024. Es warte au das Johr widr ganz wunderbari Pärli und Trauige uf mi und i freu mi riesig, sie alli bald besser kennezlerne und denn ind Taste z haue zum ihri Traurede z verfasse.

Wenn es Paar mir e Afrog schickt, ich an ihrem Datum verfüegbar bi, denn träffe mer uns möglichst ziitnoch uf es Kennelerngspröch. Am liebste mach ich das persönlich, will es muss eifach harmoniere zwüsche uns und das merkt me minere Meinig noch am beste wenn me sich würklich gegenüber sitzt. Für das nim ich mir gärn Ziit und es blibt trotzdäm komplett unverbindlich.
Es isch eure grosse Tag und do söllet ihr e Trauredner:in ha, wo perfekt zu euch passt.

Falls es persönlichs Träffe für euch ziitlich oder logistisch schwierig isch, chöne mir uns aber natürlich au erst mol digital ustusche.

Schribet mir gärn, falls ihr euri Hochziit im Herbst/Winter 2024 oder im 2025 planet, ich freue mi, euch kennezlerne!

Syrina

Address

Website

facebook.com

Alerts

Be the first to know and let us send you an email when Zeitgeist Zeremonien posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Zeitgeist Zeremonien:

Shortcuts

Address
Alerts
Contact The Business
Claim ownership or report listing
Want your business to be the top-listed Event Planning Service?

Country:

City: