28/09/2021
بمناسبة الزيادات الأخيرة، نفس الكلام ده قولته من شهر ونص بس عايز اقوله تاني ... ياريت تأجل قرار الشراء لو مش متضطر تشتري!
- هي العربيات هتفضل تزيد؟
آه الأسعار هتفضل تزيد والأوفر برايس هيزيد، وطول ما أزمة الشرايح والشحن مكملة الأسعار هتفضل في الطالع 😕
- الأزمة دي مفتعلة والكلام مش حقيقي والشرايح موجودة والشحن زي ما هو؟
اعمل بحث بسيط عن ازمة الشرايح، وبحث بسيط عن اسعار الشحن، لو لسه مش مقتنع فأنت حر فيما تعتقد 👍
- اشمعنى الخليج مفيهوش أزمة وعندهم عروض؟
الخليج فيه اسعار زادت، والخليج سوق أكبر بكتير وتأثره بالأزمات مختلف، وياريت كنا نقدر نجيب عربيات من الخليج كان زماني راكب دودج تشالنجر 😂
- طيب ليه السوق بتاعنا متأثر قوي بالأزمة؟
علشان احنا سوق صغير، ووقت الأزمات طبيعي الشركات تدي أولوية للزبون الكبير قبل الصغير، فأحنا في آخر قايمة أولويات المصانع في تسليم العربيات، بالتالي في نقص كبير في المعروض
- الأزمة دي هتخلص امتى؟
محدش عارف، والشركات برا مصر متوقعين إن الأزمة مش هتتحل قبل آخر السنة الجاية 😓
- طيب امتى الأوفر يختفي والأسعار تظبط؟
لما ميبقاش في طلب على العربيات، والمعروض أكتر من المطلوب ساعتها لازم السعر هينزل 👌
- طيب أنا دلوقتي متضطر اعمل أيه؟
للأسف طالما متضطر يا هتحجز وتستنى وانت ونصيبك وقت الاستلام، يا هتدفع أوفر برايس وتبقى خسرت فلوس كتير وساهمت في زيادة الظاهرة دي 🚫
- طيب هي الدولة ملهاش دور في الموضوع؟
لا الدولة مش هتتدخل لا في ظبط الأسعار ولا محاربة الأوفر برايس، والأوفر دلوقتي بيتحط على الفواتير والبنوك بتقسطه، فده شبه تقنين للوضع 🙄
- طيب ما أنا يمكن العربيات تزيد أكتر بعدين، هعمل أيه؟
دي حاجة في علم الغيب، ومحدش يقدر يتوقع 3 شهور قدام، كل واحد حر في قراره ⚠️
بس كدا، هو ده الموضوع كله 😁 يومكم زي العسل ❤
