19/06/2023
ليس كل انسحاب ضعف
و ليس كل هجوم بطولة بعدها انتصار
من الصغر بنخاف على اولادنا من التعرض لتنمر و الإهانة و ضياع الحق.
و بنضايق جداً و نطلع لهيب 🔥 الغضب على اولادنا لما يرجع مضروب أو متهان أو حقه ضايع فى أى زمان
شعور طبيعى و مشروع
بس المشكلة دايماً فى How ازاى بنتعامل و بنوجه
عادة بتكون الجمل التالى
" اللى يضربك اضربه"
" عايزك تيجى ضارب مش مضروب"
" لو مختش حقك .. محدش هيعملك حساب "
" اللى يقولك كلمة تضايقك رد عليه بعشرة"
بنقول الجمل دى بكل طاقة غل و كره و تحفيز على الفعل و رد الفعل بعقل الإنسان البدائى
اللى غرز فى أولاده من تانى يوم ولادتهم ثقافة أول رد فعل لأى هجوم عليك هو الهجوم بدون تفكير
لأنهم ببساطة كانوا عايشين وسط وحوش
يا تأكله يكلك
بس الزمن و الدنيا دلوقتى مش غابة … قانونها كل واحد بيأخد حقه بذراعه
استمرار هذا التوجيه من العصر الحجرى للآن بشكل عشوائى
هو اللى بيفسر تعديات كتير موجودة بين البشر حتى الآن
لفظاً و فعلاً
مش عايزين يفهموا و لا ينتظروا حد يحط نظام، و لو النظام موجود مفيش ثقة فى تنفيذه و لا صبر لنفاذه
✅طب هل معنى دا نعلم اولادنا الاستسلام و الخنوع ؟
بالتأكيد لأ و الف لأ
نعلمهم عمل gap أو فترة بين الفعل و رد الفعل لتفكير بالجزء المنطقى مش البدائى فى العقل
🔹مثال: لو واحد بس بيهاجمنى و أضعف منى … ممكن ادافع بالهجوم
طب لو ثلاثة بيهاجمونى و أقوى منى
أكيد الذكاء يعمل زى الأسد اللى فى الصورة لما تكاثرت عليه الثيران
🔹مثال تانى:
حد بيناقشنى بنقد مهذب و عدم اتفاق فيه علم ودليل
اكيد أهتم و افهم وجهة نظره و اناقشه و استفيد
اما لو شخص هجومى متطاول و ليس لديه حجة و نقده لنقد
فى الحالة دى تجاهله و عمل block ابلغ رد
" و اعرض عن الجاهلين"
دا فى المواقف الحياتية البسيطة
اما فى المواقف الأكبر لما نكون تحت إدارة مؤسسة أو منظومة معينة
محتاجين نلجأ لها فى حالة التعدى
موظف تعدى على موظف
موظف تعدى على عميل
مفيش حاجة اسمها حقى اخذه بنفسى و ذراعى
و الا هنفضل عايشين بعقلية الإنسان البدائى و فتوة الحارة
ايد فيها ايفون و ايد فيها النبوت
✅الخلاصة:
محتاجين نعلم اولادنا تقييم كل موقف بالعقل قبل العضلات
حتى لا تضيع حياتهم فى التحفز و دائرة الرد و الانتقام
محتاجين نعلمهم يعرفوا حقهم بالقانون و نظام كل مؤسسة بيتعامل معاها و ازاى يطالب بحقه دوم أن يحور على حق الغير
هل لازم فى هذا الوضع أهاجم للبقاء و لا أنسحب و لا التزم الصمت
مش كله هجوم … هجوم .. عمال على بطال
يومكم وعى و علم 🤓
