16/06/2023
*مهم للمصورين*
عندي علي الصفحة هنا مصورين شباب كتير لأن دي كانت صفحتي كامصور فوتوغرافي اصلا ياريت ياخدو المنشور ده جد جدا وماحدش يتضايق من كلامي.
⠀
انا كنت في سنكم وعارف كويس المرحله بتاعة انك عايز تبين شغلك وتعمل اسم ويجيلك شغل فمثلا تلاقي ميك اب ارتست تعرفها من فرح صورته ولا هي تبعتلك او تبعتلها وفي الطريق تلاقي موديل روسي أوكراني عايزه تعمل اي بورتفوليو علشان يجيلها شغل تقوموا عاملين فوتوسيشن ونطلع صور بقى الموديل بتشرب سجاير او وهي لابسه شراب مقطع او تصورها في بانيو الحمام و الموديل طبعا عايزه تعمل صور ليها تنشرها علشان يجلها شغل فتروح عامله كام بوز إغراء وتنام علي الارض وتطير في السما وتتشال وتتحط.
⠀
ترجع بيتك بقى تشتغل علي الصور او حاليا مع انتشار بتوع الريتاتش تبعتله الصور ويخلصها ويبعتهالك وانت تبعتها للموديل و الميكب ارتست وكلكم تنشروا السيشن علي السوشيال ميديا و اصحابك يطبلولك واعجابات و شير للصبح
⠀
انا وانت عارفين كويس ان كل ده علشان الموديل ولو كنت صورت راجل بشنب ماحدش كان عبرك، بس مش ده اصلا موضوع المنشور.
⠀
انت عارف انت بتلبس ذنوب قدا ايه؟
انت الي صورت يعني من غيرك كان كل ده مالوش لازمه مجرد ميكب ارتست عملت ميكب لموديل وهير ستايل وماحدش شاف حاجه لكن انت صورت كل ده ونشرته وهما نشروه كمان انت بيتحسب عليك ذنوب اي حد .. اي حد حرفيا يشوف الصور وصوره صوره مش بالسيشن علي بعضه!
⠀
اسئل نفسك هل مستاهله؟ هل الموديل و الميكب ارتست و الصور مستاهلين تدخل علشانهم النار ثانيه واحده؟
⠀
افتكر اننا ممكن نموت في اي لحظه، صدقني هتكون مرعوب جدا وانت في قبرك لأنك سبت وراك ذنوب جاريه
⠀
انا عارف بُعدك عن ربنا خلى قلبك قاسي حبتين وانك ممكن ماتتأثرش بكلامي ده لأني كنت مكانك وماكنتش هتأثر بكلامي وكان عندي الف تبرير لكني اكتشفت في الأخر ان لا الموضوع مش مستاهل اني اموت واسيب الألف الصور زي دي ورايا وانا بتعذب في القبر يكون كمان بيتحسب عليا ذنوب ليوم الحساب اجي الاقي جبال ذنوب من مشاهدات الناس لصوري الي فيها مُحرم ده غير عقوبة الجهر بمعصية الله .. عصيان مُعلن مني العبد الحقير لرب العالمين.
⠀
مايكفيش انك تقرر انك تبطل النوع ده من التصوير اجري امسح حالا الي صورته قبل كده وفيه مُحرم علشان تكون توبتك نقيه لله ولو مُت تبقى نيتك خالصه انك تبرأت من الي فات.
⠀
لو انت مش مصور وصاحبك مصور اوعى ابدا تشجعه لما ينزل صور فيها مُحرم وانصحه و خليك وراه لغاية مايبطل النوع ده من الصور
⠀
اوعوا تخافوا تنكروا المنكر في جروبات المصورين لحسن يتقال عليكم متخلفين او مش بتفهموا في الفن!
⠀
كلمة فن مش بتقلب الحرام حلال، كلمة فن مالهاش اي وزن يوم الحساب.
⠀
انكروا علي الي بينشر الصور ده بالتي هي احسن، الشخص الي بيعمل كده بيكون فقط ماحدش انكر عليه بل كل الي حواليه بيشجعوه لكن يوم القيامه كل واحد بيشيل شيلته، ماتبخلوش علي اخوانكم في الإسلام انكم تكونوا سبب في ازاحتهم عن دخول النار بأمر الله.