27/02/2024
ບໍລິສັດທາງລົດໄຟລາວ-ຈີນ ໄດ້ຈັດກອງປະຊຸມຍ້ອງຍໍພະນັກງານທີ່ມີຄວາມກ້າວໜ້າປະຈຳປີ
ໃນວັນທີ 7 ກຸມພາ 2024 ບໍລິສັດທາງລົດໄຟລາວ-ຈີນ ໄດ້ຈັດກອງປະຊຸມຍ້ອງຍໍພະນັກງານທີ່ມີຄວາມກ້າວໜ້າປະຈຳປີຂຶ້ນ ໃຫ້ກຽດເຂົ້າຮ່ວມໂດຍທ່ານ ຫຼິວ ຫົງ ຜູ້ອຳນວຍການໃຫຍ່ ແລະ ທ່ານ ດາວຈິນດາ ສີຫາລາດ ຮອງອຳນວຍການຜູ້ປະຈຳການບໍລິສັດທາງລົດໄຟລາວ-ຈີນ ຈຳກັດ ພ້ອມດ້ວຍຄະນະນຳ, ຕາງຫນ້າຈາກພະນັກງານຈາກບໍລິສັດທຸກຂະແໜງການທັງໝົດ 80 ກວ່າຄົນ. ກອງປະຊຸມໄດ້ຍົກໃຫ້ເຫັນເຖິງຜົນສໍາເລັດໃນປີທີ່ຜ່ານມາຂອງການເປີດດຳເນີນການທາງລົດໄຟລາວ-ຈີນ, ຍ້ອງຍໍພະນັກງານ ແລະ ໜ່ວຍງານທີ່ມີຄວາມກ້າວໜ້າ, ທັງເປັນການຫວນຄືນ ແລະ ສະຫຼຸບວຽກງານໃນປີ 2023 ທີ່ຜ່ານມາ, ຊົມເຊີຍບັນດາພະນັກງານ ແລະ ບັນດາໜ່ວຍງານທີ່ໄດ້ເອົາໃຈໃສ່ ຕັ້ງໃຈປະຕິບັດຫນ້າທີ່ຂອງຕົນເອງເປັນຢ່າງດີ ແລະ ມີຄວາມສາມັກຄີພາຍໃນ ເຮັດໃຫ້ທຸກວຽກງານບັນລຸຕາມເປົ້າໝາຍໄດ້ຢ່າງສຳເລັດ ເຊິ່ງຊ່ວຍໃຫ້ການແລ່ນລົດມີຄວາມປອດໄພສູງ, ການບໍລິການຂົນສົ່ງສິນຄ້າ-ໂດຍສານມີຄຸນນະພາບສູງ, ອຳນວຍຄວາມສະດວກໃຫ້ຜູ້ປະກອບການ, ສ້າງຄວາມປະທັບໃຈໃຫ້ແກ່ຜູ້ໂດຍສານທັງພາຍໃນ ແລະ ຕ່າງປະເທດທີ່ເຂົ້າມາຊົມໃຊ້ທາງລົດໄຟລາວ-ຈີນ.
ຜ່ານການຄົ້ນຄວ້າຈາກຄະນະນໍາບໍລິສັດໄດ້ມອບໃບຍ້ອງຍໍ “ການຈັດຕັ້ງລວມໝູ່ທີ່ມີຄວາມກ້າວໜ້າ ຂັ້ນ 1 ຂອງບໍລິສັດລົດໄຟລາວ-ຈີນ ປະຈໍາປີ 2023” ໃຫ້ແກ່ສູນຄຸ້ມຄອງດຳເນີນການນະຄອນຫຼວງວຽງຈັນ, ສູນຄຸ້ມຄອງບຳລຸງຮັກສາ ແລະ ສ້ອມແປງຫຼວງພະບາງ ແລະ ຂັ້ນ 2 ແລະ 3 ໃຫ້ແກ່ຂະແໜງພື້ນຖານໂຄງລ່າງຂອງສອງສູນລວມຫຼາຍກວ່າຈຳນວນກວ່າ 15 ລາງວັນ ສຳລັບຜົນງານພົ້ນເດັ່ນໃນການດຳເນີນການທາງລົດໄຟຢ່າງປອດໄພ; ມອບໃບຍ້ອງຍໍ “ພະນັກງານທີ່ມີຄວາມກ້າວໜ້າ ຂອງບໍລິສັດລົດໄຟລາວ-ຈີນ ປະຈໍາປີ 2023” ໃຫ້ແກ່ທ່ານ ວິດທະຍາ ເລັ່ງສະຫວັດ ແລະ ພະນັກງານລວມ 88 ທ່ານ; ມອບໃບຍ້ອງຍໍ “ພະນັກງານເຕັກນິກວິຊາສະເພາະດີເດັ່ນ ຂອງບໍລິສັດລົດໄຟລາວ-ຈີນ ປະຈໍາປີ 2023” ໃຫ້ແກ່ ທ່ານ ຫຼີ ສຽວໝິງ ແລະ ບຸກຄົນອື່ນໆ ລວມ 18 ຄົນ; ມອບໃບຍ້ອງຍໍ “ຫົວໜ້າໜ່ວຍງານທີ່ມີຄວາມກ້າວໜ້າ ຂອງບໍລິສັດລົດໄຟລາວ-ຈີນ ປະຈໍາປີ 2023” ໃຫ້ແກ່ທ່ານ ອາເລ້ຍ ແລະ ບຸກຄົນອື່ນໆ ລວມ 16 ຄົນ, ນອກຈາກນີ້ ກໍມີລາງວັນ “ໂຄສະນາເຜີຍແຜ່ຂໍ້ມູນຂ່າວສານຂອງທາງລົດໄຟ” ສຳລັບໜ່ວຍງານ ແລະ ບຸກຄົນທີ່ມີຜົນງານດີເດັ່ນໃນການໂຄສະນາຂໍ້ມູນຂ່າວສານຂອງທາງລົດໄຟ.
ທ່ານ ຫຼິວ ຫົງ ຜູ້ອຳນວຍການໃຫຍ່ ບໍລິສັດທາງລົດໄຟລາວ-ຈີນ ໄດ້ກ່າວຄຳປາໄສໃນກອງປະຊຸມວ່າ: ພາຍໃນປີ 2023 ເປັນປີທີ່ບໍລິສັດທາງລົດໄຟລາວ-ຈີນໄດ້ທຸ້ມເທເຫື່ອແຮງຢ່າງໜັກໃນການດຳເນີນການ ແລະ ກໍໄດ້ຮັບຜົນສຳເລັດຢ່າງຈົບງາມ, ເມື່ອຫວນຄືນໃນໄລຍະປີທີ່ຜ່ານມາດ້ວຍຄວາມສາມັກຄີເປັນເອກະພາບກັນຂອງພະນັກງານທາງລົດໄຟໝົດທຸກຄົນ, ຈິ່ງໄດ້ເຮັດໃຫ້ການດໍາເນີນການມີຄວາມປອດໄພ ແລະ ບັນລຸຕາມເປົ້າໝາຍມາເປັນປີທີສອງ, ຍົກສູງການບໍລິການຂົນສົ່ງທີ່ດີຂຶ້ນ, ທັງປະລິມານການຂົນສົ່ງໂດຍສານ ແລະ ສິນຄ້າກໍເພີ່ມຂຶ້ນຢ່າງຕໍ່ເນື່ອງ; ຮັບໃຊ້ວຽກງານຂອງລັດຖະບານລາວໃນການເປັນເຈົ້າພາບຈັດກອງປະຊຸມໃຫຍ່, ຮັບໃຊ້ການພັດທະນາດ້ານອຸດສາຫະກຳການຂົນສົ່ງ ແລະ ການທ່ອງທ່ຽວຂອງລາວຢ່າງຕັ້ງໜ້າ, ປະກອບສ່ວນຢ່າງຫ້າວຫັນໃນການຊ່ວຍເຫຼືອສັງຄົມ, ສ້າງທາງລົດໄຟລາວ-ຈີນໃຫ້ເປັນເສັ້ນທາງແຫ່ງການພັດທະນາ, ເສັ້ນທາງແຫ່ງຄວາມຜາສຸກ ແລະ ເສັ້ນທາງແຫ່ງມິດຕະພາບຂອງປະຊາຊົນສອງຊາດລາວ-ຈີນຢ່າງແທ້ຈິງ.
ທ່ານ ດາວຈິນດາ ສີຫາລາດ ຮອງຜູ້ອຳນວຍການຜູ້ປະຈຳການ ບໍລິສັດທາງລົດໄຟລາວ-ຈີນ ໄດ້ກ່າວຕື່ມວ່າ: ຫວັງວ່າບັນດາທ່ານທີ່ໄດ້ຮັບການຍ້ອງຍໍຈາກບາດກ້າວຜົນສຳເລັດຂອງການເຮັດວຽກຈະສືບຕໍ່ຮັກສາມູນເຊື້ອອັນດີງາມ ໃຫ້ສືບຕໍ່ຂະຫຍາຍຕົວໃນໜ້າທີ່ວຽກງານເພື່ອສ້າງຜົນງານໃໝ່ໃຫ້ມີປະສິດທິພາບສູງຍິ່ງຂຶ້ນ, ເສີມສ້າງບົດບາດການເຮັດວຽກໃຫ້ມີມາດຕະຖານສູງ. ໃນນັ້ນ, ບັນດາພະແນກໃນບໍລິສັດ, ສອງສູນບັນຊາການໄດ້ຖືເອົາເປັນແບບຢ່າງ ແລະ ຍ້ອງຍໍຊົມເຊີຍຜູ້ທີ່ມີຄວາມກ້າວໜ້າດີເດັ່ນດ້ານວຽກງານໃນບໍລິສັດເພື່ອກ້າວໄປສູ່ອົງກອນທີ່ມີປະສິດທິພາບ ພາຍໃຕ້ການຊີ້ນຳນຳພາຂອງບັນດາຄະນະນຳບໍລິສັດ, ສຸມໃສ່ເປົ້າໝາຍວຽກງານປະຈຳປີຂອງບໍລິສັດ, ມີຫຼັກໝັ້ນອັນເດັດດ່ຽວ, ມີຄວາມບຸກບືນຫ້າວຫັນໃນວຽກງານຕໍ່ໜ້າ ແລະ ດຸໝັ່ນຝຶກຝົນຫຼໍ່ຫຼອມຕົນເອງໃນທຸກດ້ານຂອງແຕ່ລະໄລຍະຂອງການເຮັດວຽກ,ການບຸກເບີກເພື່ອໃຫ້ພັດທະນາໃນບໍລິສັດໃຫ້ຫ້າວຫັນປະກອບສ່ວນວຽກງານ ເພື່ອກ້າວໄປສູ່ບໍລິສັດທີ່ມີຄວາມຈະເລີນກ້າວໜ້າລະຫວ່າງລາວ ແລະ ຈີນ.
ທ່ານ ນາງ ບີ ຫັງ ວິຊາການພະແນກການເງິນ ຂອງບໍລິສັດທາງລົດໄຟລາວ-ຈີນ ທີ່ໄດ້ຮັບການຍ້ອງຍໍໄດ້ກ່າວຕໍ່ຫ້ອງປະຊຸມວ່າ: ຂ້າພະເຈົ້າກໍເປັນພຽງພະນັກງານໂຕນ້ອຍໆຄົນໜຶ່ງໃນບໍລິສັດ ທີ່ຕັ້ງໃຈປະຕິບັດຫນ້າທີ່ໃຫ້ສົມກັບທີ່ບໍລິສັດຕັ້ງໃຈຝຶກຝົນມາ ແຕ່ບໍ່ວ່າພວກເຮົາຈະເປັນພະນັກງານໃຫຍ່ ຫຼືນ້ອຍ ທີ່ປະຈຳຢູ່ສຳນັກງານໃຫຍ່ ຫຼືພະນັກງານພາກສະໜາມກໍຕາມ ທຸກຄົນລ້ວນແຕ່ໃຫ້ຄວາມສຳຄັນກັບວຽກງານທີ່ຕົນຮັບຜິດຊອບ ແລະ ທຸກຄົນກໍເປັນສ່ວນສຳຄັນທີ່ປະກອບສ່ວນໃຫ້ການດຳເນີນງານທາງລົດໄຟປະສົບຜົນສຳເລັດ ດັ່ງທີ່ເຫັນໃນທຸກມື້ນີ້.
ທ່ານ ວິດທະຍາ ເລັ່ງສະຫວັດ ພະນັກງານບັນຊາການເດີນລົດປະຈຳສະຖານີວັງວຽງໄດ້ຂຶ້ນກ່າວວ່າ: ນັບຕັ້ງແຕ່ທາງລົດໄຟລາວ-ຈີນ ໄດ້ດໍາເນີນມາເປັນເວລາຫຼາຍກວ່າ 2 ປີ, ໃນຖານະທີ່ເປັນພະນັກງານທາງລົດໄຟລາວຊຸດທໍາອິດ, ຂ້າພະເຈົ້າໄດ້ຕັ້ງໃຈເຮັດວຽກຢ່າງຕັ້ງໜ້າ ຈົນໄດ້ຮັບຜົນສໍາເລັດໃນມື້ນີ້, ຂ້າພະເຈົ້າຮູ້ສຶກພາກພູມໃຈທີ່ສຸດທີ່ໄດ້ຮັບການຍ້ອງຍໍທີ່ມີກຽດຄັ້ງນີ້.
ຕໍ່ໄປ, ຂ້າພະເຈົ້າຂໍແບ່ງປັນປະສົບການ ແລະ ຄວາມຮູ້ສຶກໃນການເຮັດວຽກໃນໄລຍະສອງປີຜ່ານມາ，ຫວັງວ່າຈະເປັນກໍາລັງໃຈໃຫ້ພະນັກງານພາກສະໜາມທຸກຄົນທີ່ກຳລັງຕັ້ງໃຈເຮັດວຽກຢູ່ໃນຕອນນີ້. ກ່ອນອື່ນໝົດ, ຂ້າພະເຈົ້າຕ້ອງໄດ້ປັບຕົວ ແລະ ທຳຄວາມເຂົ້າໃຈຕໍ໋ກັບລະບົບການຄຸ້ມຄອງຂອງທາງລົດໄຟ, ໃນຖານະເປັນພະນັກງານລາວ, ຂ້າພະເຈົ້າບໍ່ຄຸ້ນເຄີຍກັບລະບຽບການຄຸ້ມຄອງຂອງສະຖານີເລີຍແມ້ແຕ່ນ້ອຍ, ແຕ່ດ້ວຍການຊ່ວຍເຫຼືອ ແລະ ຊີ້ນຳຂອງອາຈານທີ່ສິດ, ຂ້າພະເຈົ້າໄດ້ເຂົ້າໃຈວ່າເປັນຫຍັງໃນສອງປີຜ່ານມາພວກເຮົາຈຶ່ງສາມາດດໍາເນີນການໄດ້ຢ່າງປອດໄພ ກໍຍ້ອນຕັ້ງໃຈປະຕິບັດຕາມລະບຽບການຢ່າງເຄັ່ງຄັດ ຈຶ່ງສາມາດດໍາເນີນການໄດ້ຢ່າງປອດໄພ ແລະ ລາບລື່ນ. ນອກຈາກນັ້ນ, ຂ້າພະເຈົ້າຍັງຕ້ອງໄດ້ຕັ້ງໃຈສຶກສາຫາຄວາມຮູ້ດ້ານວິຊາຊີບ ແລະ ຍົກສູງທັກສະການດໍາເນີນວຽກງານຢ່າງຫ້າວຫັນ, ເຖິງແມ່ນວ່າໃນເບື້ອງຕົ້ນຈະມີຄວາມຫຍຸ້ງຍາກໃນດ້ານໃນດ້ານພາສາ ແລະ ການສື່ສານ, ໂດຍສະເພາະແມ່ນຄໍາສັບທີ່ໃຊ້ໃນວິຊາການ ແຕ່ຂ້າພະເຈົ້າກໍບໍ່ທໍ້ຖອຍ, ຖ້າມີຄຳສັບ ຫຼືບ່ອນໃດບໍ່ເຂົ້າໃຈ ຂ້າພະເຈົ້າກໍຈະຖາມນໍາອາຈານຄົນຈີນຈົນກວ່າຂ້າພະເຈົ້າຈະເຂົ້າໃຈ. ນອກນັ້ນ, ໃນເວລາວ່າງຂ້າພະເຈົ້າກໍຈະຮຽນຮູ້ດ້ວຍຕົນເອງ ຈົນຂ້າພະເຈົ້າໄດ້ຮັບລາງວັນໃນການແຂ່ງຂັນດ້ານທັກສະ ທີ່ທາງບໍລິສັດຈັດຂຶ້ນເຖິງສອງປີຕິດຕໍ່ກັນ.
ໃນປະຈຸບັນ ຍ້ອນຄວາມຫ້າວຫັນໃນໜ້າທີ່ວຽກງານ, ຂ້າພະເຈົ້າໄດ້ຮັບຕຳແໜ່ງສູງຂຶ້ນ ຈົນສາມາດເປັນຜູ້ຄຸ້ມຄອງບໍລິຫານພາກສະໜາມຕື່ມອີກ. ຂ້າພະເຈົ້າສັນຍາວ່າຈະຕັ້ງໃຈເຮັດວຽກ ແລະ ຈະເປັນແບບຢ່າງທີ່ດີໃນການນຳພາພະນັກງານລາວກ້າວໄປຂ້າງໜ້າ, ປະຕິບັດຕາມກົດລະບຽບ ແລະ ຮັກສາມາດຕະຖານວຽກງານຢ່າງເຂັ້ມງວດ ເພື່ອການພັດທະນາທາງລົດໄຟລາວ-ຈີນ ໃຫ້ຍືນຍົງ ແລະ ເຂັ້ມແຂງ, ປະກອບສ່ວນເຂົ້າໃນການກໍ່ສ້າງຂໍ້ລິເລີ່ມ "ໜຶ່ງແລວ ໜຶ່ງເສັ້ນທາງ" ຂອງລາວ-ຈີນ, ອຸທິດຕົນເຂົ້າໃນການສ້າງສາພັດທະນາປະເທດຊາດ.
ທ່ານ ສາວ ເສິງຈິນ ພະນັກງານປະຈຳສູນບຳລຸງຮັກສາຫຼວງພະບາງໄດ້ຂຶ້ນກ່າວຕໍ່ຫ້ອງປະຊຸມວ່າ: ຂ້ອຍຮູ້ສຶກເປັນກຽດຫຼາຍທີ່ໄດ້ມາຢືນຢູ່ບ່ອນນີ້ ແລະ ຂຶ້ນກ່າວບົດປະຕິຍານຕົນໃນມື້ນີ້, ຂ້ອຍຂໍສະແດງຄວາມຂອບໃຈຢ່າງຈິງໃຈກັບບໍລິສັດ ແລະ ສູນສ້ອມແປງບຳລຸງຮັກສາ ແລະ ເພື່ອນຮ່ວມງານທຸກຄົນ. ການໄດ້ຮັບຜົນສຳເລັດທາງດ້ານວຽກງານຂອງຂ້ອຍໃນມື້ນີ້ແມ່ນມາຈາກທຸກຄົນທີ່ຊ່ວຍເຫຼືອ ແລະ ສາມັກຄີຮ່ວມໃຈກັນຂອງພະນັກງານທັງລາວ ແລະ ຈີນ, ໃນອະນາຄົດພາຍໜ້າຂ້ອຍຈະຕັ້ງໃຈປະຕິບັດວຽກງານ ຖ່າຍຖອນບົດຮຽນເຕັກນິກ ແລະ ວິຊາການຮອບດ້ານໃຫ້ແກ່ພະນັກງານລາວ,ປະຕິບັດໜ້າທີ່ຂອງຕົນ ເພື່ອຮັບປະກັນຄວາມປອດໄພ ແລະ ສະຖຽນລະພາບຂອງທາງລົດໄຟລາວ-ຈີນ.
ກອງປະຊຸມຍັງໄດ້ເນັ້ນໜັກວ່າ: ປີນີ້ເຂົ້າເປັນປີທີສາມຂອງການເປີດດຳເນີນງານທາງລົດໄຟລາວ-ຈີນ, ບໍລິສັດທາງລົດໄຟລາວ-ຈີນ ຈະສືບຕໍ່ຍຶດໝັ້ນເອົາທິດຊີ້ນຳຂອງການນຳສູງສຸດຂອງສອງພັກສອງຊາດລາວ-ຈີນ, ປະຕິບັດຕາມແຜນແມ່ບົດການສ້າງຄູ່ຮ່ວມຊະຕາກຳລາວ-ຈີນ, ປະຕິບັດວຽກງານໃຫ້ມີຄວາມກ້າວໜ້າ, ຍຶດຖືຄວາມປອດໄພເປັນຫຼັກ, ດຳເນີນງານລົດໄຟໃຫ້ມີປະສິດທິພາບຕາມເປົ້າໝາຍທີ່ວາງໄວ້, ຍຶດໝັ້ນໃນການແບ່ງປັນຕໍ່ສັງຄົມ ເຊິ່ງຈະບັນລຸເປົ້າໝາຍເຫຼົ່ານີ້ໄດ້ ແມ່ນປາສາຈາກບໍ່ໄດ້ການອຸທິດຕົນຂອງພະນັກງານລາວ-ຈີນ ທຸກພາກສ່ວນ, ໃນອະນາຄົດອັນໃກ້ນີ້, ບໍລິສັດ ມີແຜນຈະບັນລຸເປົ້າໝາຍສ້າງພະນັກງານຄົນລາວພາກສະໜາມໃຫ້ຂຶ້ນມາຮັບຕຳແໜ່ງຄຸ້ມຄອງບໍລິຫານ ຂໍໃຫ້ທຸກຄົນຕັ້ງໃຈປະຕິບັດໜ້າທີ່ຂອງຕົນໃຫ້ດີ ເພື່ອປະກອບສ່ວນຊຸກຍູ້ການພັດທະນາທາງລົດໄຟລາວ-ຈີນໃຫ້ມີຄຸນນະພາບສູງ, ສ້າງຄູ່ຮ່ວມຊະຕາກຳລາວ-ຈີນໃຫ້ເຂົ້າສູ່ລ່ວງເລິກ ແລະ ສ້າງຊີວິດໃໝ່ທີ່ມີຄວາມຜາສຸກ ແລະ ງົດງາມໃຫ້ແກ່ປະຊາຊົນສອງຊາດລາວ-ຈີນ.
