27/04/2022
السلام عليكم الأخت انا من المتابعين لهاد الصفحة بغيت نحط هاد القصة ديال واحد الصديق ديالي ربما كانعتبرها من القصص الإيجابية .
{ قصتي بدأت ف 2009 تقريبا فشهر 8 تعرفت على واحد البنت بصراحة ف الأول كنت كانعاملها كصديقة فقط تبادل مكالمات هاتفية والاطمئنان عليها بحكم انها كانت خدامة بعيدة على دارهم ..مع الوقت وليت كانبغيها وحتى هي كاتبادلني نفس الشعور وشفت فيها زوجة المستقبل وخا عارف غاذي يكونو عراقيل من ناحية ديال الخدما حيث الولدين ديما عندهوم فكرة المرأة لي خدما وبعيدة على دارهوم كايشوفو فيها شوفة ناقصة... مهم هاد البنت كانت خدما على وليدها وعائلتها كادمر وضرب تمارة نقدر نقوليكم 90 % المصاريف ديال الدار هي لي كاتحملها بوحدها . مع مرور الوقت أصبحت متيما واعشقها حتى النخاع عشنا قصة حب نقية لا تشوبها شائبة صافي بقينا نهدرو وكانخططو للمستقبل ديالنا وخا هي ديما عندها تخوف من واحد الكريدي ديال خمسة ديال المليون كانت خذاتو ومادارت بيه والو صرفاتو شي على دارهوم شي سلفاتو ...هاد الكريدي كانت كايقطعو ليها واحد المبلغ معين .مهم أنا سبق لي قولت ليها ماعنديش موشكيل ف الكريدي نخلصو من بعد.... وفعلا غاذي يجي واحد نهار مشينا بزوج للبنكا وخلصت الكريدي لي عليها كامل باش مايبقاش مبرزطنا حيث اصلان العائلة ديالي مافرسهومش هاد قصة ديال الكريدي حيث بالنسبة لي الى كنتي بغتي شي واحد ضروري ضحي على قبلو وانا مايمكنش لي نتفلى على إنسانة دارت فيك الثقة . نهار صارحت الوليدة قولت ليها كانعرف واحد البنت خاصني نخطبها قبل مايفوت الفوت وتفلت لي بين يديا ومع الوليدة قولت ليها راه خدما ...بدون تردد قالت لي لا ماتصلاحش ليك ... شنو المعمول ماعليا إلا تحديث هدرا ديالها وكان دعم من الاخ والاخت ليا والوليد آلله يرحمو. 2012 مشيت انا والعائلة خطبتها وف 2013 تزوجت بحبيبة قلبي . حاليا عندي معها جوج ديال الأبناء
هذي قصة مختصرة لقصة عشق في زمن انعدمت فيه الثقة }
