12/12/2020
ကရမက်ပန်း
ဒီဇင်ဘာပန်း , ခရစ်စမတ်ပန်း, နွယ်ညိုပန်း
Poranopsis paniculata (Roxb.) roberty.
Porana paniculata.
Christmas vine, bridal vine
Snow creeper, Bridal bouquet.
Familty : Convolvulaceae
ဒီအပင်ကိုအညာမှာတော့ "ကရမက်ပန်း" လို့ခေါ်ကြတယ်၊ ဆောင်တော်ကူး "ဂေါ်သဇင်" ခေါ်သော Porana volubilis Burm. f. နဲ့ ပန်းပွင့်ချိန်အတူတူဖြစ်ပါတယ်၊ ဒါပေမဲ့ အပွင့်အရောင်မတူပါဘူး ကရမက်ပန်း လေးတွေက ပိုလို့နုညံ့တယ် အရောင်လည်း အဖြူရောင်စစ်စစ်ပါ အပွင့်လည်း ငယ်ပါတယ် ၊ ပန်းခိုင်ကြည့်ရုံနဲ့တင် အပင် ၂ ပင်ကိုလွယ်ကူစွာ ခွဲခြားနိုင်ပါတယ်၊ သိသာသော အချက်ကိုပြောရရင် ကရမက်ပန်းလေးတွေရဲ့ အရွက်နဲ့ပင်စည်မှာ အညိုရောင် အမွှေးနုတွေ ဖုံးနေပေမည့် ဆောင်တော်ကူအပင်ရဲ့ အရွက်လေးတွေမှာတော့ အမွှေးမရှိ ပြောင်လက်နေပါတယ်။ အပင် ၂ ပင်စလုံးဟာ ကန်ဇွန်းမျိုးရင်း Convolvulaceae ထဲမှာပါသော သစ်မာ နွယ်ပင်လေးများသာ ဖြစ်ကြတယ်၊ တမျိုးစီ လှကြပါတယ်၊ တယောက်အကြိုက် တယောက် မတူကြပါဘူး၊
မုံရွာဒေသအခေါ် ကရမက်ပန်းလေးတွေကို အချို့က December ပန်းလို့ ခေါ်ကြပြန်တယ် ၊ ဒါကလည်း December လမှာပွင့်လို့ဖြစ်ပါတယ်၊ Checklist 2003 ထဲမှာတော့ ပန်းအမည်ကို Christmas vine, bridal vine ၊ နွယ်ညိုပန်း လို့ အမည်ပေးထားတာကို မှတ်သားရပါတယ်၊ မကြာခင် Christmas ရောက်လာတော့မှာမို့ ခရစ်စမတ်ကို ကြိုသောပန်း "Christmas ပန်း"လို့ ပေးထားတာကလည်း သဘာဝ ကြလှတယ်၊ နွယ်တက်တတ်ပြီး အညိုရောင် အမွှေးများဖုံးနေလို့ မြန်မာအမည် "နွယ်ညိုပန်း"လို့ ပေးထားတာလည်း စိတ်ဝင်စားစရာပါ။ နောက်တအမည်တခုက "Snow creeper" ဆိုတဲ့အမည်လေးပါ အပင်ရဲ့ ပင်စည် အရွက်အကိုင်းတွေကို နှင်းပွင့်လေးတွေကပ်နေသလို ခတ်မှုန်မှုန်လေးဖြစ်နေတာမို့ Snow creeper ပေးတာဖြစ်ရမယ်၊ creeper ဆိုတာ တွားသွားတတ်သောသဘောကိုဆောင်တယ်၊ Bridal vine ဆိုတဲ့အမည်ကတော့ မင်္ဂလာပွဲ အခန်းအနားများနဲ့လိုက်ဖက်လှသော နွယ်ပင်လို့ တင်စားပြီးခေါ်ဝေါ်ရခြင်းဖြစ်မှာပါ၊ Bridal bouquet ကတော့ မင်္ဂလာ ပန်းစည်း ပန်းခြင်း လေးလို့လည်းတင်စားခြင်းဖြစ်ပါတယ်၊ ဒီပန်းလေးအပေါ်ခေါ်ဝေါ်ကြသော အမည်များက အဓိပ္ပါယ်အမျိုးမျိုးနဲ့ခေါ်ကြပုံတွေကမြန်မာနဲ့မတူပါဘူး၊
ပန်းခိုင်ပွင့်နေပုံက ကိုင်းဖြာနေသော ပန်းခိုင် ပန်နီကူလိပ် ဆိုင်း paniculate cyme ဖြစ်နေတာမို့ မျိုးစိတ်အမည် မှာ paniculata လို့ပေးထားတာပါ၊ ပွင့်ခံရွက် ပွင့်ညှာရွက်များပါလို့ နေတယ်၊ ပွင်ဖတ်လေးတွေကသေးသွယ်ပြီး ညီညာကြတယ်၊ ၊ ပွင့်ချပ်အုံက infundibuliform ဖြစ်ပြီး အနားလေးတွေမှာ အဝိုက်လေးတွေပါနေပြီး နေတယ်၊ ထူးခြားတာတခုက ဝတ်ဆံဖိုတွေကမမြင်ရဖူး အတွင်းနေဖြစ်လို့နေတယ်၊ ဝတ်ဆံတန် လည်း အတွင်းနေမို့မမြင်ရဖူးလေ၊ ဂေါ်သဇင်ပန်း Porana volubilis Burm. f. လေးမှာတော့ ဝတ်ဆံဖို ဝတ်မှုံခံတိုင်လေးတွေကို ထင်ထင်ရှားရှားမြင်ရမှာဖြစ်ပါတယ်၊
အပင်တပင်အပေါ်ပေးသော ဒေသအခေါ်က အမျိုးမျိုးပါ၊ ဒေသတခုရောက်ရင် အမည်တမျိုး ပြောင်းလဲသွားမှာပါ၊ ဒါပေမဲ့ ဒီအပင်ရဲ့ မှန်ကန်သော Botanical name ကတော့ တခုထဲသာရှိပါတယ်၊မုံရွာဒေသ အခေါ်"ကရမက်ပန်း"လေးရဲ့ သိပ္ပံအမည်မှန်ကတော့ Poranopsis paniculata ပါ၊
မိတ်ဆွေတို့ရော ....ရနံ့ထုံသင်းပြီးနုညံလှပသော... ကရမက်ပန်းလေးတွေကို သိကြပါရဲ့လား....ဒေသအခေါ်အဝေါ်လေးများသိရင်ဖြင့် ဖြည့်စွက်ပေးပါဦး......
ာသက်နိုင်ဦး
