https://www.facebook.com/108822745296029/

ANU Engineering Event, Khartoum (2024)

05/08/2023

م مشتاقين لي صوت أصحابكم وونستهم ؟
حوش الكلية ؟
قهوة مظبوطة من عم صالح ؟
صحبة وقعدة يكونو الكيف ؟
ضربة في كتفك لمن تسرح (ركز ياخ انا قاعد اشرح) وترجع تمسك نفس الصفحه في نفس الشيت ؟
أوقات القراية والسهر والمبيت مع الاصحاب عشان تذاكرو شيتات السنة كلها في أيام قبل الامتحان !
بحث طالع مشروع نازل ، تستات وأعمال سنة ؟
م مشتاقين لي انت وين ؟ انا جنبك ياخ ، وانت تكون من بيتكم م طلعت ؟
ضجة قاعة وشيل اتندس ؟
والضحكات والقعدات في إحصاء والجبنات ؟
طعم الفتة النكهتها شير وزحمة الكفتيريا ؟
ما مشتاقين ..؟! 🤍

خش احكي لينا مشتاق لشنو فيها ؟
وكل الحاجات دي #حترجع بإذن الله ولو بعد حين 🤍

لايك وشير للبوست عشان يصلكم كل جديد ❤️

31/07/2023

ولسه مواصلين معاكم في سلسلة ، شاركونا بأهم التفاصيل و الذكريات ليكم في كلية الهندسة ب مراسلتنا على رسائل الصفحة 💛

يلا راسلنا منتظر شنو 🤩؟
فرحنا ب حكايتك 💛

هندسة يا بيتنا الجميل 🤍

لايك وشير للبوست عشان يصلكم كل جديد ❤️

29/07/2023

انا من الثانوي كان رغبتي اكون مهندس مدني ، شاء الله انه يقبلوني في قسم الهندسة الكيميائية فبقيت متحير لمدة من الزمن وراسي بقي جايط وعيوني شايفة معادلات ورموز ومركبات وحاجات كدا من الخيال العلمي بتاع الكيمياء وذلك لاني مابعرف عن الهندسة الكيميائية اي حاجة (كان قدم لي اخوي رحمه الله) فبقيت مترقب نزول الجامعة عشان اعرف حاجة ونزلنا الحمدلله وبدأت المسيرة والصورة بدأت تتشكل في راسي وذلك بفضل الله ثم دكاترتنا الأجلاء لكن لسسة الواحد في نفسه اسئله كتيرة والمعالم ضبابية إلى أن جاء الحدث الذي غير المفاهيم بصورة كبيرة ألا وهو إسبوع المهندس.
ويرجع الفضل فيه بعد الله لسنايرنا والدفعات القدامنا . كان اسبوع مميز من ناحية المشاريع والافكار والتدريب والمنافسة بين المشاريع . فبفضل الله كان الإسبوع دا سبب كبير إنه افهم جزء من مهام المهندس الكيميائي في الصناعات المختلفة وكذلك فهمت عدد من الصناعات بصورة كبيرة وممتعة لبساطة الشرح وجمال التصميم للمشاريع وتسلسلها وكان سبب مهم في إني بديت أحب الهندسة الكيميائية ومنها بدأت رحلة التعلم بمفاهيم مختلفة.

بقلم : مازن فاروق
الدفعة : 4 كيميائية

هندسة يا بيتنا الجميل 🤍

لايك وشير للبوست عشان يصلكم كل جديد ❤️

27/07/2023

السلام عليكم ورحمه الله وبركاته.
كلية الهندسة جامعة النيلين ، طبعا في مقولة بتقول انو الحاجة ما بتحس بقيمتها الا بعد تفقدها والحاجة دي اختبرناها كلنا مع الحاصل دة حاليا ومن ضمن الحاجات الفاقدها واشتاق ليها الجامعة وشلة الجامعة والطلعة من الصباح عشان تحصل محاضرة 7 (الما حضرتها غير مرة وحدة ربنا يغفر 🤣) وتجي خاشي من الصباح يلقاك يوسف بوشو الباش داك ويلقاك فداسي اديك كلمتين كدة يفتح نفسك لليوم 🤍✨ وبعدهم تلقا الشايقي لابس الشحاط حقو سفينة نوح داك 🤣🤣🤣 ينسيك انو انت ف كلية وانك بتقرا اصلاً (وف النهاية العدوى اصابتنا 😂) وتحضر محاضرتك الاولى وبعداك تشوف برنامج الفطور اللي هو بنجي عشانه ولو م حصلته كأنو اليوم فاتك 😂 المهم تمشي علي البوش واللي بكون مشوارو عبارة عن الولي وعبد الرحمن مشغلنها لوالي الدين وتنمر مشية وجية وضحك لمن بضحك معانا هو زاتو 🤣🤣🤣 وصوت ضحكة الولي البجيب اخر الشارع الفاضحنا محل ما نمش الا نسكتو 😂😂 وبشير جايط مع الشايقي وعبد العزيز انو ميسي العب زول ما فاضل الا يدقهم 🤣 ، المهم وبعد م تاكل الفتة من يد خبيريها ترس ووالي الدين سلمت اناملكم يااخي امتعتونا جدا والله 💛✨ ، بعدها نجي راجعين نشوف المحاضرة الحننوم فيها بعد المنوم الاكلناهو دة 😂 وبعداك منها للجبنة وديك كلامها براهو فكدة اليوم بكون انتهى والمواقف كتيرة ومختلفة منها ايام الامتحانات ، المعسكرات والمشاريع ما حابي اطول عليكم ..

اما بالنسبة للجانب العلمي فالكلية ما شاء الله غنية عن التعريف بدكاترتها بروف مصطفى/بروف اسماعيل الأزهري /بروف امين وباقي الدكاترة الافاضل ، لكن الحاجة الكانت مميزة بالنسبة لي او لمعظم الدفع في الوقت داك هم مساعدين التدريس ( اللي بقوا اصحابنا في النهاية ) ومعاملتهم واهتمامهم بالطالب وتقديرهم ليهو ولمجهودو والحاجة دي ورونا ليها (احمد عوض/فكتور) والتالت كان ادانا الكهربية في دبلومات م بتذكر اسمو (عندي مشكلة مع اسامي الدكاترة والاساتذة😂)المهم ما قصروا معانا ابداً والله وللان بساعدوا فينا جزاهم الله عنا كل خير ..

والحاجة العملت منعطف جميل في السنين الاخيرة دي وحركت الركود التفاعلي الكان حاصل من اخر فعالية هو اسبوع المهندس ، ودة تقريباً احسن حاجة حصلت في اخر 4 او 5 سنين للكلية ، وبما انو كنت من التيم المنظم وبحكم منصبي ك HR شايف التعب والمحهود الجبار الاتبذل من قبل الطلبة في كل اللجان من تعب وجري وطلعة من الكلية آخر اليوم والضغط المتواصل على مدى ايام وغير الناس الكان باتت ودة لو اشار لحاجة فبشير لانو الطلبة قلبهم علي الكلية وممكن يعملو اي شي عشان سمعتها و عشان يطوروها وإن شاء الله السنين الجاية الكلية بيهم حتكون غير ❤️🔥🔥
ومن هنا برسل تحية للجنة الأكاديمية فرداً فرداً وبعتذر اذا شغلتها لزول او اتضايق مني 😂🤍✨

انا شخصيا استفدت من الاسبوع حاجات كتيرة سواءاً اكاديمية او من ناحية مهارات وخبرة علمية او تنظيمية بس بفضل اهم شي العلاقات ثم العلاقات والحمد لله طلعت بناس ما فيهم كلام وخيرة طلبة الكلية لكم مني سلام اينما كنتم ♥️ وربنا يديم الود والمحبة ❤️✨

اما الدفعة دي كلامها تاني خاالص رغم الاختلاف في الاراء وطريقة التفكير بس اثبتوا انو هم اسرة وبيت وااحد قولاً وفعلاً والله وما حصل اتخاذلوا او اتاخروا ويشهدوا علي الكلام دة 💙
حاسوب 23 كل الحب والتقدير والله وإن شاء الله كلكم بخير 💙💙✨

فبختم بحاجة حابي اقولها انو الجامعة ما مباني او محاضرات او امتحانات وخلاص الجامعة دي عبارة عن مجتمع وبيئة ، مجتمع بتلقى فيهو كل انواع الشخصيات بمختلف فكرهم ومعتقداتهم وأساليبهم ، وبيئة بتجهزك لحياة ما بعد التخرج بتلقى فيها الضغط وتلقى فيها تغيير مسارات وتغيير خطط وبتنمي فيها شخصيتك بدون ما تشعر حسب الكنت بتمارسو لمن تجي الكلية وفي الفترة ديك فممكن فيها تطور من مهاراتك وتزيد من امكانياتك من الناس الفيها ، او تعاملها كأنك في مدرسة تجي وتطلع بدون ما تستفيد حاجة ، وكلو برجع ليك ولهدفك ، واخر شي حاول ركز علي العلاقات اهم حاجة لانو ممكن تأثر علي توظيفك بعدين غير انو حتحتاج ليها شديد.
وشكراً ..

بقلم : احمد محمد حسن (مكاوي)
الدفعة : 23 حاسوب

هندسة يا بيتنا الجميل 🤍

لايك وشير للبوست عشان يصلكم كل جديد ❤️

25/07/2023

درست واتخرجت واتعينت فيها ، وما حاسة اني عندي رغبة اشتغل في أي مكان غيرها ، انتماء غريب وحب ما عادي لكليتنا بالرغم من أني شخص نادر ما يحس بالانتماء ..
لمن كنت طالبة اكتر مواد كانت بتجهجهنا مواد دكتور احمد الحسن وبروف أزهري (اكتر محاضرة كنت بحبها حقت أزهري بالرغم من أني بجيب جيد طوالي في مادتو 🙂) ...
تكون طالب .. فجأة تبقى زميل مع الدكاترة الدرسوك مع حفظ المقامات طبعا .. وفجأة تلقى طالب انت درسته بقى زميل ليك وحاجة في منتهى السريالية 😂..
كل الدفع الدرستها ليها مكانة عندي ، ومكانة خاسة خاسة للدفعة ٢١ 😂 💙 البعرفهم بالاسم .. بفقدوني طوالي وبسألوا مني .. ويلاقوني في الحوش يوقفوني يسلموا علي .. ممتنة ليهم شديد جدا ؛ بسببهم حبيت التدريس .
إن شاء الله الأوضاع المأساوية دي تنتهي ونرجع تاني أحسن من أول 💙

بقلم : صفاء سليمان
الدفعة : 17 حاسوب

هندسة يا بيتنا الجميل 🤍

لايك وشير للبوست عشان يصلكم كل جديد ❤️

23/07/2023

جامعة النيلين كلية الهندسة:
مهما أتكلم عنها ما حأوفي حقها ولا جزء بسيط من الايام العشناها فيها ، وما بتعرف قيمة الايام واللحظات دي الا بعد تفارقها ،، ومتأكدة اي زول اتخرج حيكون وصله احساسي ده
لمن تتكلم عن هندسة النيلين فأنت بتتكلم عن كيان واحد، "بيتك التاني" البتلقى نفسك فيه وبتحس فيه بالانتماء.

كليتنا كانت مميزة من كل النواحي ،ابتداءً من مبانيها اللي لمت الناس وخلتنا نتعرف على بعض اكتر، يعني انت ک طالب جديد ، جيت الكلية وما عارف اي شي ، كل يوم بتتعرف على دفعتك وسنايرك اللي بكونوا مرشدين وقادرين يوجهوك بكل صدر رحب ..
بتلقى الأساتذة ومساعدي التدريس والدكاترة حرفياً متاحين ومكاتبهم مفتوحة في اي وقت ممكن تسألهم وتستشيرهم وما بتطلع منهم الا وانت في كامل الرضا عن المعلومات الاخدتها منهم .

أكتر شي كنت بحبه في كليتنا اهتمام ادارتها عن تطويرها،، بتذكر اول سنة ما كان عندنا مكتبة في الكلية ، فكنا بنمش مبنى دبلومات عشان نذاكر في المكتبة ونكتب البحوث والواجبات البتطلب مننا ، السنة التانية طوالي اتعملت لينا مكتبة في مبنى بكالريوس وبتذكر للآن فرحتنا بيها، وكيف كانت الناس بتتشجع عشان تقرأ في المكتبة وتبحث وتعرف عن مجالها أكتر، ف ده بثبت انه ادارة الكلية كانت مهتمة اهتمام كامل بتوفير المصادر الكافية للطالب من أجل المعرفة.

من الحاجات البحبها فيها محاضرات الساعة ٨ ، وده لأنو الاحساس البجيك وانت ماشي على الجامعة وجو الصباح الظريف داك ، ومنظر الكلية وهي نظيفة وريحة شاي عمو صالح ،، دي كلها حاجات تشجعك انك تنتبه ف المحاضرة وتستوعبها اكتر من اي محاضرة في زمن تاني.
برضو كنت بحب روح التعاون الكان في دفعتنا، كنا دايما بنساعد بعض وخاصة أيام اسابيع المهندس ،، قعداتنا واجتماعاتنا عشان نطلع بأفكار جديدة لاسبوع المهندس، واحساس انك زول رهيب كده تحس نفسك مهندس فعلا وانت قاعد بتظبط مشروعك وسط ناس بعيدين في المجال، سناير علي برالمة واساتذة كلنا كده قاعدين بنظبط في الافكار عشان نطلع بمشاريع ونمازج مصغرة تفيد المجتمع وتساعد على ايجاد الحلول المناسبة.

المميز في كليتنا انها بتضغطك ضغطة كده ب فايدة (ضغط بناء) 😁 ، ما بتديك مجال ترتاح فيه الا وتعرف اي معلومة وتعرف الغرض الاساسي من المادة الانت بتدرسها دي ، الطريقة الاتعمل بيها المنهج كفيلة تخليك لمن تتخرج جاهز تماما لسوق العمل وده ما حتحس بيو الا
لمن تمش دورة تدريبيه أو كورس في مجالك ويكون معاك عدد من الناس في كليات مختلفة ، حتعرف قدر شنو انك انت عارف معلومات وفاهمها وهم اول مرة يسمعوا بيها ، وده م تقليل من مناهج الجامعات السودانية التانية بس ده بدل على حرص الادارة انه توفر المنهج الشامل البغطي جزء كبير من المجال.

هندسة النيلين حلوة بكل الفيها ، ب مبانيها قاعاتها ولاباتها ،دكاترتها الكانوا في يوم من طلابها وقصصهم الناجحة في الكلية براها بتديك دفعة وتشجيع انك تجتهد وتبقى زيهم، اساتذتها ومساعدي التدريس والطلاب اللي فيوم حيطلعوا من أميز المهندسين ، اللي قادرين يشتغلوا تحت الضغط وقادرين يبدعوا ويتميزوا وينتجوا افكار وحلول مبتكرة وجديدة (ودي حقائق ما وجهة نظر).

بقلم :عزة يوسف
دفعة 18

هندسة اتصالات

هندسة يا بيتنا الجميل🤍

21/07/2023

⭕أسبوع المهندس طبعا حكايتو حكاية ....
تقريباً من دخلت الجامعه حضرتو مرتين لما كنت في سنة اولي ولما كنت في سنة تانية والحمدلله بعدها أوضاع البلد إتشقلبت فوق وتحت وأمورنا جاطت والناس بقت بتفتش ل إنو تكمل قرايتها قبل م الأوضاع تزيد سوء ف م كنا مهتمين شديد بيه لحدي م الشباب الورانا بدو يتحركو ويسعو ل إمكانية قيام إسبوع المهندس مرة تانية بس المرة دي الحاجة الإختلفت انو المتطلبات والحدث الفريد من نوعو دا بمجهودات طلابية بحتة منهم الاستخدم علاقاتو الخارجية ومنهم الاستخدم مهارتو الفردية وقدر يتحصل علي تمويل خارجي وطبعاَ دا كلو كان مجرد فكرة لسه م طبقوها عل أرض الواقع ف سبحان الله إتكلم معانا واحد من زملائي انو في الناس شغاله تجهيز في اسبوع المهندس وكان بلوم فينا انتو وين من الموضوع وليه ماف اي زول ممثلنا معاهم الشباب ديل شغالين ومجتهدين وهم برالمتنا
ودي كانت اول خطوة إتخذتها لمشاركتي في الاسبوع وبديت أبحث عن المسؤول والليدر بتاع الشباب ديل ووصلت ليه وإتكلمت معاه وفهمني الحاصل كلو وبديت معاه .
⭕ فكانت أجمل مشاركة لأنها عرفتني على شباب وشابات عيونهم وقلوبهم على الكلية......
الشاهد على الكلام دا إنو لحدي الان إسبوع المهندس محفور في ذهني ومتذكرو تفصيلة تفصيلة وأحداثو كلها حاضرة لدرجة م لاقي مفردات أعبر بيها ....
ف التحية والتقدير لكل اللجان الاشتغلت في اسبوع المهندس فرداً فرداً وبالأخص لجنة التنظيم والله قدر م اتكلم م ح اقدر أوفيكم حقكم

بقلم : محمد فتح الرحمن (الملا)
الدفعة : 22 إتصالات

هندسة يا بيتنا الجميل 🤍

لايك وشير للبوست عشان يصلكم كل جديد ❤️

19/07/2023

السلام عليكم ورحمة الله تعالى وبركاته

جامعة النيلين عموما وكلية الهندسة خصوصا ليها مكانه خاصه في قلبي انا حرفيا ارتباطي بالجامعة غير. ارتباط وجداني قبل يبقا اكاديمي انا دخلتها 201‪7 انا اخترتها حتي قبل اخش الجامعه الكان بقول جامعة الخرطوم البقول السودان بس انا كان هدفي النيلين 😂😂😂قدمت كل تخصصات الموجودة في النيلين وأولها اتصالات والحمدلله شالوني فيها الكل كانو م عاجباهم البقول لي الصين الشعبيه وناس جباره الخواطر والباكمبا بس انا نظرتي ليها كانت غير دخلتها برلومة كانت سنة دوشه عرفنا فيها الجامعة سنه تانية كنا سلكنا حبه وعرفنا الجامعه عملنا معارف(وهنا بدت الشُهره😂😂) تقريبا انا في تانيه عرفت نص دفعتي وجزو من باقي الاقسام المعاي والبرالمه(والسناير كنا بنخاف منهم😂😂😂كانو بمرمطو الزول) وهنا بدت رحله الإجازات القيصريه في السمستر التاني من تانيه قفلو المظاهرات 10 شهور وبرضو م يئست والله😂😂😂كنا بنقول فتره وتعدي وفعلا نزلنا بعدها شهر 10 \201‪9 امتحنا تانيه ونزلنا تالته قلنا الأمور مشت الحمدالله فجاءة ظهرت كورونا 😂😂😂😂قفلوها تاني ونحن الحمدلله م يئسنا برضو في كورونا اجزنا تقريبا سنه او اقل نزلنا شهر 7/202‪1 امتحنا واجزنا لي بعد الأضحي بي سبب تراكم الدفع بعد نزلنا رابع والحمدلله رابع دي قصه براها اكتر سنه علمتي كتير من نواحي غير الاكاديميه يعني انا في السنه دي عرفت فيها برالمه وسناير كميه وعرفت فيها دفعه 201‪9 ناس ماشاء الله جمعتني اكتر حاجه بيهم اسبوع المهندس كان من اكتر الفعاليات العلمتني كتير كسرت حاجز الخوف والرهاب الاجتماعي من الناس في الشرح للناس في المشاريع (الرادار والباركن الروبوت والبلاين) كلها احلا من بعض احلا حاجه كان الاسبوع القبل اسبوع المهندس كان عباره شغل في المشاريع وتاني الرسم والتلوين واحلا حاجه كنت شغاله باستمتاع وكان معاي اصحابي وبرالمتي الحلوين من هنا ليهم سلام قدر م اتكلم م بخلص بعد الأسبوع طلعت بي ناس كتيره ماشاءالله بالنسبه لي قدوه وتاني اتوالت الفعاليات الجمعتنا كتيره اكتر انا اتغيرت كتير في السنه دي وفهمي اتغير 180‪ درجه للأحسن الكليه لو حبيتها بتحبك بحس كأنها اتعملت عشانك انت وبس والاساتذه كلهم من غير استثناء بعاملوك بأسلوب راقي ومرن الصغير بعاملك كاخ والكبير كأب حرفيا كأنكم عيله ♥️♥️♥️والكلية بيتنا والقاعات غرفنا والدفعة اخوانك ودفعتي دي دايره بوست براه يخ قدر م اتكلم عنهم م بوفيه وكل ذكري احلا من التانيه وقعداتنا في القاعه ونستنا والشرح البكون بدون تمييز ولا زنقه الامتحانات وطلعات اخر الامتحانات🥺🥺🥺وفي دي بتذكر اصحابي وقعداتنا في إحصاء للشرح ومكالمات قوقل والفطور والحوش وجبنات إحصاء وشارع الضياع ودكان البوش وجامعه السودان ومكتبه ريحانه(ومن هنا برسل سلام من القلب لي ريحانه كل اصحابي المعاها) وحوش الجامعه واللابات حقت الكليه ولاب المايكرو (الكنا بنبكي فيه) ولابات (عثمان وضوينا الف سلام ليهم♥️) ولابات (عم عبدالرحمن😢فاقدها ) والقاعات والاستراحه 😭😭😭 فقدت الكليه كلها الحرب دي قطعت اهم سنه في الجامعه انا فقدت اصحابي وحوش الجامعه وكل شي يارب ترجع الخرطوم وترجع الجامعه زي م كانت ❤️❤️❤️🌹

بقلم : قباء كمال محمد
الدفعة : 22 اتصالات

هندسة يا بيتنا الجميل 🤍

لايك وشير للبوست عشان يصلكم كل جديد ❤️

17/07/2023

احلی ذکری بالنسبة لی م حصلت فی یوم واحد لکن کانت فی کم یوم ورا بعض وبدت من یوم دخلت اللجنة الأکاديمية لإسبوع المهندس
اول يوم لي فی شغل المشاريع کنت قاعدة فی رکن القاعة مع صحباتي وشايفين السناير شغالین . طبعا قلنا نحن برالمة وما بخلونا نعمل معاهم حاجة احسن نشاهد من بعید😭😹😹
بس اول م لاحظوا وجودنا رحبوا بینا وقالوا لینا ابدو فی المشاريع طوالي وبدينا ندرس فيديوهات کل مشروع علی اساس نعمل مجسم مصغر ليهو . الشغل کان حلوو شديد وصح متعب لکن لما تشوف الناس الحولك کلهم شغالين بترجع تشتغل بحماس اکتر وانتهینا من المجسمات فی وقت مثالي.
جاا يوم توزيع المشاريع بعد خلصنا کل المجسمات وعُدي قعد يشرح لينا طريقة عمل کل مشروع بصورة مفصلة وکان بجاوب علی کل سٶال اتوجه ليهو . باقي اخر مشروع وهو مشروع صناعة الإيثانول ولما قلنا ليهو اشرحو لينا قال ماف طريقة دة کلامو کتير وصعب عشان کدة نمشی نصلي الظهر ونرجع ليهو
في وقتها انا وصحبتي قررنا نستلمو قبل نعرف عنو حاجة اصلاً . بعد صلينا ورجعنا وشرحو لينا قمنا حجزناه . وهناا کانت المفاجأة وطلع فی زول عندو نفس خططنا وعايز يستلمو بس الحمد لله حصل نقاش بسيط وعُدي قال لينا استلمو سوی لانو کبير .
بحثنا عن المشروع وقدرنا نکون ملمين بأکبر کمية من المعلومات . وطبعا ما بنسی فضل ناس رابع وخامس لانهم ساعدونا شدید وقدرو یوصلو لینا المعلومة بصورة واضحة.
والحمد لله اداءنا في اسبوع المهندس کان جميل جداً وطلعنا بمعلومات کتيرة واکتشفنا انو انت ک مهندس مفروض يکون عندك معارف والناس تستفيد منها وضروری یکون عندك مرونة نفسية عالية عشان تقدر تشتغل اي شغل بإتقان وتصل مرحلة الرضا في ای حاجة عملتها.
اخيرا بحب اشکر کل زول نفعنی ولو بمعلومة صغيرة وبحب اشکر اللجنة الاکادمية خاصة والتيم المنظم بصورة عامة وکل الحب والتقدير لي کليتنا .

بقلم:رأفة عصام الدين
الدفعة 26 - کيميائية

هندستنا يا بيتنا الجميل🤍

لايك و شير للبوست عشان يصلكم كل جديد ♥️

15/07/2023

هندسه النيلين وجمالها ، الفكره النمطيه البتجي علي بال كل زول ولأول ولهه حوش البقر ، الباكومبا ، وما يليها من اعتقادات خاطئه .. في البدايه انا كمان ما كنت عارف انو النيلين عندها هندسه وكثير من الناس كانت ما بتعرف وفي الاغلب برجع السبب لقله التخصصات الهندسيه في الكليه .. ولكن قله التخصصات والتخصصيه في حد زاتها بالاضافه لقله الطلاب المقبولين في الدفعه مقارنه بالجامعات التانيه كانت ميزه عظيمه جدا ما عرفت قيمتها يمكن الا بعد اتخرجنا ونزلنا سوق العمل ..
دخلنا الجامعه ٢٠١٣ الدفعه ١٨ وفي البدايه كتير مننا كان متذمر وكانو مجبور علي الواقع وطبعا ما كنا عارفين الحكمه ورا الموضوع ده شنو لكن الجامعه علمتنا كتيير زي الترابط والتداخل وكيف نكون سند لبعض فالطالب بكون في أولى بعرف من كل سنه وكل تخصص ناس وكلهم بيساعدو بعض سواء كانت معلومه عن ماده ، امتحانات ، ما بحتاجو سوق عمل وغيرو ولانو كتير مننا بكون داخل تخصصو حباً فيه أو حباً في الاسم أو ممكن ما لقي خيار غيرو لذلك بتلقي في تساؤلات كتيره عن المجال والتخصص ولحسن الحظ الكل كان بيساعد عشان ينفع غيرو بالذات الخريجين ، بتذكر للان لما كنا في سنه تانيه كان اول فرصه اتيحت لينا بعد كورس اخدناه عن لغات البرمجه واللاب كان بيدرسو استاذ لبيب كان بالنسبه لي من امتع اللابات وبيتم تدريسو بطريقه مبتكره تحببك في البرمجه جداً ولحسن الحظ آخر السمستر عرض علينا انو حيدرسنا تطوعياً كورس اردوينو للمهتم ، وكان الوقت داك حاجه جديده حتي اول مره اسمع بيه واخدنا محاضره عرفنا منها كيف مجال الكنترول ده ممتع وممكن بخيالك تصل لوين . اخر المحاضره كان ارسل لينا كتاب الاردوينو ، ببساطه اظن كتير مننا في اليوم داك في قعده واحده كان ما كمل الكتاب كلو قطع فيه شوط كبير ، وبالجد كانت نقله نوعيه وبدايه جديده لاكتشاف المجال . في نفس السنه شاركنا بأول مشروع لينا في اسبوع المهندس وكان في العاده اسبوع المهندس بقوم علي عاتق سنه رابعه ، فكانت حاجه جديده ودافع لينا للتطوير والسنه البعديها فعلا شاركنا بي 3 مشاريع اما في رابعه قررنا نمسك تصميم لاب كامل من حيث كل شي وكانت تجربه رائعه جدا ، ويمكن من اجمل الفترات البتمر علي الواحد الفتره قبل اسبوع المهندس باسبوعين . الكل بكون عاوز يعمل احسن حاجه عندو فبتجي ايام بنبيت وايام تانيه تطلع للساعه 12 بالليل وترجع تاني 7 بكل تشوق عشان تكمل محاضراتك وتشوف باقي الشغل والتصاميم وكيف ممكن تحلو المشاكل الحاصله في الكود ..
الجامعه كل فتره فيها وكانت بحلاوتها ورغم صغرها وقله القاعات والتحديات الكانت بتواجه الاساتذه ومساعدين التدريس لكن الكل كان بيخدم بي حب جداً عشان يوصل المعلومه ، في سنه أولى الكل بيكون بيكتشف في الحياه الجامعيه والنقله النوعيه في حياتو ونظام التدريس يمشي تانيه ياداب بتكون بديت تاخد اساسيات المجال ولكن الفكره ضبابيه لتالته ورابعه واللي هم الحفره بالنسبه لكل مهندس اما السنه الاخيره بتكون كلها خيال وما سيتم بعد التخرج والرحله ونسافر وين ونعمل شنو ولحسن حظنا وكمان الشباب معانا نشيطين جدا فمن غير المتعارف عليه سافرنا رحلتين علميات الأولى في رابعه وكانت لسد مروي زي اسبوع . رحلت مروي كانت من امتع الرحل واجملها من حيث التنظيم والبرنامج القضيناهو هناك محتاج بوست لحالو ، اما الرحله التانيه كانت للقاهره اللي هي الرسميه بالنسبه لينا وكمان كانت رحله علميه ترفيهيه رائعه من حيث الماده العلميه والعمليه الاتدرست هناك وكان في افضل المعاهد البتقدم كورسات اوتوميشن في مصر حاليا الصباح من 7-12 كورس ومن 1-6 في المعمل ومن 6-12 لافين ترجع الشقه ونسه كم ساعه تاني يوم نفس الموال . طبعا المعهد ده د.داليا وقعت معاهم معاهده انو ايي شخص بجي من جامعه النيلين عندو تخفيض في الرسوم وحتي قبل كم اسبوع كان نزلو اعلان بتخفيض لكل السودانيين القادمين من السودان بنسبه ٥٠٪ ف الفي مصر ممكن يمشي عليهم وما حيندم وحا يضيف واسكرين شوت من البوست تحت .
مرحله الجامعه فيها حاجات كتيره جدا تانيه من منظمات تطوعيه انسانيه واكاديميه زي ال IEEE والقصص عنها ما بتنتهي ولكن الحاجه الكل مفروض يعرفها انو الخريجين من هندستنا لو في السودان او خارج السودان بعملو حاجات عظيمه جدا وناجحين ومتقدمين جدا في المجال والجامعه حتي لو ما ادتنا كانت بتورينا كيف نعرف نشق طريقنا ونعتمد علي نفسنا عشان نوصل للي احنا فيه حاليا وفي الظروف الحاليه التحديات كتيره جدا ولكن كلنا مستعدين عشان نقيف مع الكليه وطلابها لانو الناس لازم تواكب العالم والمجال وصل وين عشان نعرف نخدم نفسنا ثم الاخرين.

احمد حاكم

الدفعه ١٨- تحكم

هندستنا يا بيتنا الجميل 🤍

لايك وشير للبوست عشان يصلكم كل جديد❤️

14/07/2023

السلام عليكم و رحمة الله و بركاته
حابة أتكلم عن ذكرياتي في الكلية بعد ما قضيت فيها 20 عام تقريبا مابين طالبة و أستاذة .... كنت الدفعة الرابعة في الكلية و كان عددنا كطلاب في كل الأقسام 70 طالب فقط و يمكن عددنا البسيط ده خلى علاقتنا بأساتذتنا و دكاترتنا تكون قوية لأنهم كانوا حافظين أسامينا كلنا و الدكتور بدخل القاعة و هو عارف منو الجا و منو الما جا و منو القاعد في الكافتيريا 😅... بس من أميز الدكاترة الكنت بحب أحضر محاضراتهم هو بروف مصطفى أحمد حسن رافقنا في رحلتنا في الكلية لغاية ما اتخرجنا منها و حتى في تخريجنا كان حضوره مميز .... د. عبدالله صالح ( ربنا يرحمه و يغفر له و يجعل كل حرف علمنا ليه في ميزان حسناته يارب ) و بعتبر نفسي محظوظة لأنو درسني ... و ما بنسى برضو أ.محمود جعفر ( ربنا يرحمه ) كانت طريقة شرحه للمادة جميلة و علاقته تعدت حدود قاعة المحاضرة و بقى بعرف كل واحد فينا عن قرب حتى مشاكلنا كان بيعرفها و بساهم في حالها ... ذكرت ال 3 دكاترة ديل تحديدا لأنهم غير المحاضرات دايما كلامهم معانا محفز و داعم لينا و كانو سبب لأني أحب تخصصي ... كل يوم مر علي في الجامعة استفدت منو سواء أكاديميا أو إجتماعياً ... مشاركاتي في أسبوع المهندس كل سنة كنت بعتبرها حاجة مهمة شديد و حقيقي استفدت منها كتير و كنت بنفذ مشاريع مع سنايرنا رغم إني كنت يادوب في سنيني الأولى و الحاجة دي ساعدتني كتير في إني أستوعب كتير من المواد و أفهمها بدون تعب و ساعدتني حتى في مشروع التخرج ... الكلام عن الكلية كتير اختصرته في تجربتي كطالبة و دي تجربة تختلف تماما عن تجربتي وانا أستاذة فيها .... في النهاية حابة أقول إنك طالما دخلت الجامعة فإنت أكيد ح تتخرج منها بشهادة !! لكن مدى استفادتك منها بتتوقف عليك أنت و على رغبتك فيها .. دايما لاحق المعلومة الانت عايز تعرفها و أسعى ليها ما تنتظرها تجيك ... بتمنى التوفيق لكل طالب في الكلية .... و ربنا يصلح حال البلد و ترجع حياتنا لطبيعتها و نرجع لكليتنا عشان نفيد و نستفيد ... كل الود ♥️

- هدى أحمد أبوالقاسم

- الدفعة الرابعة - اتصالات

هندستنا يا بيتنا الجميل 🤍

لايك وشير للبوست عشان يصلكم كل جديد❤️

13/07/2023

هى الأحداث كتيره وكلها بالجد أثرت فينى شديد و خلتنى اقدم أقصى ما عندى بكل حب عشان الطلاب يستفيدوا من الحاجه الأنا بدرسها وبالجد كمية التقدير والاحترام الكان بيصلني من قبل الطلاب ممكن اقول كل الدفعات الدرستها خلاني اتعامل معاهم مش كطلاب كأخوان بالنسبه لي وكنت بدرسهم وانا مبسوطه شديد 😊
لكن احلى ذكرى بالنسبه لي وما ممكن انساها التكريم الحصل لي من طلاب الهندسة الكيميائية الدفعة 24 ❤️ 😍
بتمنى ليهم التوفيق والنجاح .
وكل دفعة انا درستها من كل التخصصات في كلية الهندسة سواء حالياً بيدرسوا او إتخرجوا بتمنى ليهم التوفيق والنجاح والتقدم في كل مراحل حياتهم ❤️

• بقلم أستاذة : صفاء علي رابح

هندستنا يا بيتنا الجميل 🤍

لايك و شير للبوست عشان يصلكم كل جديد ♥️

11/07/2023

فعالية إجتماعية يشارك فيها طلاب وطالبات وخريجي الكلية وأيضا بعض الدكاترة بالكلية ، يسردون فيها أحداث ومواقف حدثت بالكلية وإستفادو منها واصبحت ذكري راسخه في قلوبهم وأكسبتهم خبره وكانت سبب في تغيرهم للافضل ، مثل مشاركاتهم في نشاطات الكليه المختلفة (مثل : مشاريع التخرج أو تتظيم الفعاليات داخل الكلية حتي بعض الأحداث التي جاءت عن طريق الصدفه وظلت عالقة بالذاكرة) ❤‍🩹

رسلو لينا المشاركات في الخاص وحنختار منها كم بوست ننزلهم في الصفحة تحت الهاشتاق :

لايك و شير للبوست عشان يصلكم كل جديد ♥️

11/03/2023

🔥🔥دوري الاقسام 🔥🔥
🔥كليه الهندسة 🔥
❤❤ ❤❤
🔥حصيلة المباراة الثانية في نصف النهائي 🔥.
♦️ٳتصالات. 23 تلعب و تسيطر و تتأهل
♦️حاسوب 23 تلعب تخسر ..
♦️حضور جماهيري متوسط و شهد حضور بعض المشجعات.....⚽️ في مبارة المتعة والاثارة والحماس العالي حتي اخر الانفاس مصاحبة بلاعبين من العيار الثقيل أبرزهم من حاسوب 23 بشير موسى و جوهرة خط الوسط فكس و الخبير خالد
⚽️ و علي الشق الاخر من اتصالات 23 لاعب النسر الخرطوم عبدون ولاعب الجهاد ربك ودالامين واليساري لاعب كوبر عوض صالح ولاعب الاتحاد البخاري قدورة ولاعب الرابطة المناقل برعي
؛؛؛
⚽بدا الشوط الاول بتقدم اتصالات على حاسوب بهدف واحد بأقدام المحترف مجتبى صارت الهجمات سجالا في محاولة التعديل جمعيها باءت بالفشل حتي انتهى الشوط على ذلك ...
⚽️بدا الشوط الثاني بسيطرة و ضغط عالي من حاسوب وواصل على ذلك هذا النهج حتي نال مراده بواسطة اللاعب الحريف خالد الذي اربك دفاع اتصالات واوقعهم في ارتكاب المحظور وحصل علي ركله جزاء احتسبها الحكم في الدقيقة الثالثة و سبعون و اودعها المحترف عمار و تواصل الضغط كل من الفريقين ادى الى احتساب العديد من الكروت الصفراء اكترها لحساب اتصالات 23 و كادت أن تذهب بنا إلى ركلات الترجيح الثانية في الدوري ولكن اللاعب عوض كان لديه رأي آخر في الدقيقة الاضافيه الخامسه برأس قوية حسمت التأهل و بعدها بقليل اطلق الحكم المحترم صافره نهاية المباراة .....
..
⚽️ ادار المباراة الحكم أحمدعبدالغفور ..
⚽️الف مبروك إتصالات 23...
⚽️هاردلك حاسوب23..
⚽️((تظل الرياضة جسرا للتواصل حتي الخاسر فائز ))تلك هي الصور التي التمسناها حتي الان ونتمنا أن تدوم تلك اللوحة الجميلة ..
⚽️تالق من اتصالات 23 كل من عوض وعبدون
⚽️ومن حاسوب 23 كل من خالد و فوكس
🌹🌹🌹🌹🌹🌹🌹🌹
هندسة تواصل التفرد ..
🔥🔥🔥🔥🔥🔥🔥🔥

08/03/2023

🔥🔥🔥 SEMI-FINALS 🔥🔥🔥

01/03/2023

🔥🔥دوري الاقسام 🔥🔥
🔥كليه الهندسة 🔥
. ❤❤ ❤❤
ربع النهائي
نتيجة المبارة الاخيرة
♦️حاسوب 23 تلعب وتكتسح كيميائية 22 بنتيجة 9-0🔥
نعرب عن حسرتنا على من لم يشاهد المتعة الكروية التي دارت اليوم بين حاسوب ٢٣ وكيمائية ٢٢.
🔥شهد اللقاء أجواء ساخنة وبدأت المبارة في الساعه ٢:٤٥
وبدأ سجل الأهداف منذ الدقيقة الثانية بهدف بشير موسى
♦️لن ندخل في تفاصيل المباراة حفاظا على ما تبقى من مشاعر قسم كيميائية.
♦️حقيقة امتعونا رجال حاسوب23 ولولا أن الحكم أنهى المباراة قبل ١٥ دقيقة من وقتها الاصلي لكانت المهزلة أعظم.
♦️كان نصيب الأسد من الأهداف للكابتن ورجل المباراة بشير موسي بستة أهداف كاملة(نصف دستة) 🔥

بينما أحرز كل من عباس علي وخالد حسن وعلي بجي هدف🔥
⛔رسالة تحذير قوية يوجهها حاسوب ٢٣ لخصمهم القادم.
مع العلم أن قفاز الحارس أواب مدحت حامي عرين حاسوب لم يتسخ أبدا وان دل ذلك يدل على أن كيميائية مرهقة هجوميا وتكتيكيا لم تنظم ولا هجمة وحيدا كما تم طرد لاعبين من قبلهم.
♦️نقول الف مبروك لحاسوب 23 التأهل إلى الدور القادم وحظا أوفر كيميائية 22

هندسة تواصل التفرد🔥🔥🔥🔥

28/02/2023

🔥🔥دوري الاقسام 🔥🔥
🔥كليه الهندسة 🔥
. ❤❤ ❤❤
ربع النهائي
*نتيجة المبارة الثالثة*
بهدف الzanzony. تحكم 23 تتاهل الي نصف النهائي عل حساب تحكم 22 بعد معركة حامية دارت بينهم ولكن في الاخر ابتسمت لهم المجنونة 🔥🔥🔥

الف الف مبروك تحكم( 23)
هاردلك تحكم( 22)
🌹🌹🌹🌹🌹🌹🌹🌹
هندسة تواصل التفرد ..
🔥🔥🔥🔥🔥🔥🔥🔥

25/02/2023

🔥🔥دوري الاقسام 🔥🔥
🔥كليه الهندسة 🔥
❤❤ ❤❤
*نتيجة المبارة الثانية*
تحكم 24 تقلب الطاولة على ٳتصالات 25 وتتاهل الي نصف النهائي وتبقي في ٳنتظار من سيتاهل من المبارة القادمة من تحكم 23 وتحكم 22
🌹🌹🌹🌹🌹🌹🌹🌹
هندسة تواصل التفرد ..
🔥🔥🔥🔥🔥🔥🔥🔥

21/02/2023

🔥🔥دوري الاقسام 🔥🔥
🔥كليه الهندسة 🔥
❤❤ ❤❤
🔥حصيلة المٌبّارَة الثانية في دور ال16🔥.
♦️تحكم 22 تْمتع وتكتسح وتتأهل الى الدور القادم
♦️حاسوب 25 تخسر مع الرأفة ..
♦️حضور جماهير كبير من جانب تحكم 22.....⚽️ في مباراة من جانب واحد . تحكم 22 تعلن استعمارها وتوكد حضورها وتلحق هزيمة ثقيلة بحاسوب 25 (9/1) ؛؛؛
⚽️ حاسوب 25 رغم الهزيمة لم تقدم م يشفع لها وانهارت منذ البداية ..
⚽️قاد الجهاز الفني المبدع ودمامون والذي دخل بتشكلية هجومية 4.3.3 مع تعليمات صارمة بالتهديف وارهاب الخصم
⚽️والشق الاخر قاد الجهاز الفني عبدالغفار والذي دخل بتشكلية محاكية لنابولي( 1.9) والتي انتهت المبارة عليها( بدو ك خط نابولي وانتهو ك تريعة البجا 😂)
⚽بدا الشوط الاول بضغط عالي من تحكم 22 حيث بدات سيطرتهم واضحة وفي الدقيقة الثانية من عمر المبارة ️سجل اللاعب بلة محمد هدفاً اول ولم تكتمل صحوة حاسوب حتي سجل ذات اللاعب الهدف الثاني بعد مرور 8 دقائق وتستمر الهجمات ومن مقصية عل طريقة الدون سجل اللاعب عمار الهدف الثالث في الدقيقة 15 ومرت الهجمات واحدة تلو الاخري وبدا الاستحواذ واضحا جدا لتحكم ومن هجمة منظمة سجل اللاعب عمار الهدف الرابع بتسديدة قوية من خارج خط ال18 في الدقيقة 35 ف أضاف الحكم دقيقة واحدة ك زمن اضافي ثم اعلن نهاية الشوط الاول..
⚽️لم تمر دقيقتين من الشوط الثاني حتي عاد نفس اللاعب بنفراد خطير وسجل الهدف الخامس لتحكم والهاترك له في المبارة لتصبح النتيجة (5-0) بعدها تبادل لاعبي تحكم الباصات والاستحواذ عل الكرة حتي قام المدرب بإجراء وراهن عل اللاعب احمد نصر والذي لم يخيب ظن مدربه وسجل الهدف السادس في الدقيقة 59 وبعد دقيقة سجل اللاعب عمار السوبر هاترك ولكن نقضه الحكم بداعي التسلل ومن هجمة مرتدة والتي سجل اللاعب عماد صديق هدف الشرف ل حاسوب 25 فعاد اللاعب احمد نصر وسجل الهدف السابع في الدقيقة 67 ف اخمد نيران حاسوب 25 ولم يستفيقو من الصدفة ف انفرد الباك اليسار لتحكم اللاعب مصعب فتحي وسجل الهدف التامن وعاد وسجل الهدف التاسع في الدقيقة الثالثة من الوقت بدل الضائع
ليعلن بذلك الحكم نهاية المبارة وينقذ حاسوب 25.
⚽️ ادار المباراة الحكم حامد حسن ..
⚽️الف مبروك تحكم 22...
⚽️هاردلك حاسوب 25 ...
⚽️((تظل الرياضة جسرا للتواصل حتي الخاسر فائز ))تلك هي الصور التي التمسناها حتي الان ونتمنا أن تدوم تلك اللوحة الجميلة ..
⚽️تالق كل لاعبي تحكم 22 من دون استثناء
🌹🌹🌹🌹🌹🌹🌹🌹
هندسة تواصل التفرد ..
🔥🔥🔥🔥🔥🔥🔥🔥

21/02/2023

🔥🔥دوري الاقسام 🔥🔥
🔥كليه الهندسة 🔥
❤❤ ❤❤
🔥حصيلة المبارة الاولي في دور ال16🔥.
♦️تحكم 23 تلعب و تتأهل لربع النهائي ...
♦️حاسوب 24 تخسر وتودع البطولة ..
♦️حضور جماهيري .....⚽️ في مبارة متكافئة وقوية من جانب الفريقين تحكم 23 تتغلب عل حاسوب 24 بنتيجة 4:2 وتحجز مقعدها في ربع النهائي ... ؛؛؛
⚽️دخل الجهاز الفني ل فريق تحكم 23 تحت اشراف الكوتش حسان بتشكيلة( 4.3.3 )
⚽️وفي الشق الاخر دخل فريق حاسوب 24. بقيادة الكوتش محمد جمعة بتشكلية (4.4.2).....
⚽بدا الشوط الاول وكانت المبارة مغلقة من الجانبين وبعد مرور 7 دقائق ارتكب مدافع حاسوب مخالفة قريبة من خط ال18 التي تقدم لها اللاعب يوسف محمد وسددها مباشرة في المرمي لم يتعامل معها الحارس بصورة جيدة فوجدت متابعه من الصادق والذي بدوره ادخلها هدف اول ف جمع لاعبي حاسوب قواهم وبادرو بهجمات خطيرة فتالق خط دفاع تحكم في استخلاصها ولكن من هفوة قاتلة تمكن اللاعب محد عيدروس من ادراك التعادل في الدقيقة 19 ثم استحوذو عل رتم المبارة ولكن من انفراد قاتل تمكن الصادق من تسجيل الهدف الثاني في الدقيقة 27 لكي تستمر الهجمات واحدة تلو الاخري من كلا الفريقين حتي انتهي الوقت الاصلي للشوط الاول ف اضاف الحكم دقيقة وحيدة إضافية ثم أعلن نهاية الشوط الاول ...
⚽️بدا الشوط الثاني والاستحواذ لصالح تحكم 23 وهدفهم قتل معنويات حاسوب 24 بهدف ثالث ولكن وجدوهم لم يرمو الراية بعد واستمرت المحاولات ولكن تالق محمود تارة والباز تارة ويوسف تارة اخرى خط دفاعي متكامل يحمون عرين حارسهم ببسالة وعنفوان ثم بدا الارهاق واضحا على كلا الفريقين ولكن رغم ذلك تستمر اللمسات الجميلة والباصات المتقنة بعامل الخبرة ومن انفراد رائع للاعب الحسن والذي تصدي له الحارس ولكن ايضا وجد متابعة اللاعب الذكي صاحب التمركز الصحيح الصادق ف ادخلها بكل سهولة معلنا الهاترك له ومقارعه صدارة الهدافين وبعد ثلاثة دقائق واثناء تنفيذ ركنية لصالح حاسوب 24 ارتكب مدافع تحكم المحظور وامسك المهاجم فاعلن الحكم ركلة جزاء صحيحة نفذها اللاعب المعصوم بكل هدوء ف زاد حماس لاعبي حاسوب لإداراك التعادل ولكن تبقت دقيقة وحيدة ف اعلن الحكم 5 دقائق كوقت بدل ضائع ولكن في الدقيقة الثانية منه تمكن اللاعب الحسن من حسم المبارة بتسجليه الهدف الرابع بصورة جميلة جداً ف إنهارت قوى حاسوب وإستسلمو للواقع المر ف اطلق الحكم صافرة النهاية ......
..
⚽️ ادار المباراة الحكم المتميز أحمدعبدالغفور ..
⚽️الف مبروك تحكم 23...
⚽️هاردلك حاسوب 24...
⚽️((تظل الرياضة جسرا للتواصل حتي الخاسر فائز ))تلك هي الصور التي التمسناها حتي الان ونتمنا أن تدوم تلك اللوحة الجميلة ..
⚽️تالق من تحكم 23 كل من يوسف محمد ومحمود عادل والحسن والصادق
⚽️ومن حاسوب 24 كل من المعصوم و محمد عيدروس واكرم
🌹🌹🌹🌹🌹🌹🌹🌹
هندسة تواصل التفرد ..
🔥🔥🔥🔥🔥🔥🔥🔥

12/02/2023

🔥🔥دوري الاقسام 🔥🔥
🔥كليه الهندسة 🔥
❤❤ ❤❤
🔥حصيلة اليوم الأخير للدور الأول🔥.
♦️ٳتصالات. 23 تلعب و تتأهل دون معاناة ...
♦️كيميائية 26 تخسر مع الرافة ..
♦️حضور جماهيري متوسط .....⚽️ في مبارة اللعب النظيف والمدججة بلاعبين من العيار الثقيل أبرزهم لاعب الرابطة المناقل سابقا البرعي الحاج ولاعب النسر الخرطوم عبدون ولاعب الجهاد ربك ودالامين واليساري لاعب كوبر عوض صالح ولاعب الاتحاد البخاري قدورة .
مبارة حسمت بتلك الاسماء منذ بدايتها والتي كانت جميلة ورائعة ؛؛؛
⚽️وفي الشق الاخر اخطبوط كيميائية عمر فضل الله والسريع احمد عبدالمنعم والهادي عمر عبدالوهاب .....
⚽بدا الشوط الاول ب تيكي تاكا جميلة من لاعبي إتصالات وسط حذر كبير من لاعبي كيميائية على ألا يستقبلوا هدف في الدقائق الاولى من عمر المبارة إلا تمكن اللاعب برعي من كسر تلك الشفرة بهدف اول جميل في الدقيقة 13 وبعدها بدأت اتصالات تكشر عن انيابها ولكن تألق حارس كيميائية حال دون ذلك والذي تصدى لاربعة اهداف محققة تمر الدقائق حتي عاد نفس اللاعب للتسجيل في الدقيقة 23 هدف ثاني لاتصالات بعدها طالب الجهاز الفني لإتصالات بخفض الرتم والمحافظة على النتيجة ف إستغل كل من عبدون وعوض والقصير المكير ودالامين ذلك التوجيه واظهروا مهاراتهم وتحكمهم السلس بالكرة حتي نال ذلك إستحسان الجمهور ثم اضاف الحكم دقيقة وحيدة إضافية ثم أعلن نهاية الشوط الاول ...
⚽️بدا الشوط الثاني والاستحواذ لصالح إتصالات وبعد مرور 7 دقائق سجل اللاعب ابوبكر الهدف الثالث واستمرت السيطرة لاتصالات وهجمة تلو الاخرى وحارس كيميائية يتصدي لها حتي إنهار دفاعه وإنتهت اللياقة الذهنية ف فسجل البديل الناجح محمد عبده الهدف الرابع في الدقيقة 56 لصالح إتصالات فطالب بعض الجمهور بإكمالها خمسة والتي صارت علامة الجودة لقسم كيميائية في هذا الدوري ف ما كان من لعيبة إتصالات سوا الاستجابة لمطلب الجماهير ف أتموها خماسية عن طريق اللاعب مبين في الدقيقة 64 فبدا لعيبة كيميائية للبحث في اخر الدقائق لهدف الشرف ف قتلهم اللاعب المجتبي عبدالرحمن بالهدف السادس في الدقيقة 70 وبعدها اعلن الحكم نهاية المبارة بفوز إتصالات بسداسية نظيفة.....
..
⚽️ ادار المباراة الحكم أحمدعبدالغفور ..
⚽️الف مبروك إتصالات 23...
⚽️هاردلك كيميائية 26...
⚽️((تظل الرياضة جسرا للتواصل حتي الخاسر فائز ))تلك هي الصور التي التمسناها حتي الان ونتمنا أن تدوم تلك اللوحة الجميلة ..
⚽️تالق من اتصالات 23 كل من البرعي وابوبكر وعوض وعبدون
⚽️ومن كيميائية 26 كل من حامي العرين عمر. فضل الله و عمر عبدالوهاب
🌹🌹🌹🌹🌹🌹🌹🌹
هندسة تواصل التفرد ..
🔥🔥🔥🔥🔥🔥🔥🔥

ANU Engineering Event

05/08/2023

31/07/2023

29/07/2023

27/07/2023

25/07/2023

23/07/2023

21/07/2023

19/07/2023

17/07/2023

15/07/2023

14/07/2023

13/07/2023

11/07/2023

11/03/2023

08/03/2023

01/03/2023

28/02/2023

25/02/2023

21/02/2023

21/02/2023

12/02/2023

Address

Website

Alerts

Contact The Business

Videos

Shortcuts

Share

Category