Høllènn I.L. er eit idrettslag som soknar til Bø. Skihopping har tradisjonelt vore viktigaste idretten i laget, og soga kan sporast heilt attende til 1899. Laget har skipa Hollane skifestival sidan 2017.
- Vinteren 1899 blir I.L. Høllènn skipa av husmannen Tyge Sleivtjønn. Sleivtjønn hadde vorte ekskludert frå Skarphedin I.L. grunna ufin skiføring. Me veit nå, same kva Jan Boklöv seier, at Sleivtjønn var fyrste hoppar som reindyrka V-stilen. Han skipa så sitt eige lag og kalla det opp etter Hollane seter kor han var dreng kvar sumar.
- I 1905 emigrerte ein vonbroten Tyge Sleivtjønn til Dei sameinte statane i protest mot unionsoppløysinga med Sverige. Han var éin av 184 nordmenn som stemte mot unionsoppløysinga i 1905. Ljotolv Høllènn, far til den namngjetne idrettsmannen Hellek Høllènn, tok over. Høllènn-ætta stammar frå ein liten, bortgøymd plass i nærleiken av Hollane seter. Folk derifrå er kjent for å bli uvanleg gamle.
- I 1911 spelar I.L. Høllènn til nå sin einaste fotballkamp. Det blei eit 1-14 tap mot Vefallkameratane. Absalon Vihus skåra målet til I.L. Høllènn.
- I 1920 forsvinn Ljotolv Høllènn i Svarttjønn etter å ha fått ein fælsleg stor aure på kroken. Hellek Høllènn (1905-) blir ny formann i ein alder av femten år.
- I krigsåra blei nesten all aktivitet i laget lagt ned, men det gjekk sport i å sende tyskarar i feil retning på Lifjell. Jo lengre vekk frå destinasjonen ein lura tyskarane, jo fleire poeng fekk ein notert.
- Etter krigen blømde hoppsporten i laget. Tevlingane på 1950-talet var særleg kvasse mellom Høllènn sitt hoppess Hansemann Skrubbeholet og Blodstrup Stavshølt frå I.L. Juvsåa.
- Våren 1961 fekk Hellek Høllènn ein diger aure på sluken i Svarttjønn. Det blei ein innbitt kamp som vara i to heile vintrar og somrar. Høllènn måtte såleis søkje permisjon frå leiarvervet, og bror hans, Ramnkjell, tok over mellombels. Siste sommaren byrja kreftene til beistet å sleppe opp, og det såg ut til at Hellek skulle få has på fisken. Men ein utanbygdes naturvernar, Baugheid Bratsberg, fekk nyss om dette og lista seg på Hellek og klipte av snøret. Det herska ufred mellom desse to i lange tider.
- Leiaren i åra 1961 til 1963, Ramnkjell Høllènn (1911-), er betre kjent som "Eikebeinet". I 1934 hadde han tenkt seg til Kloppsteintjønn via Nybu for å fiske. Det blei seint om kvelden, og Ramnkjell var så ille trøytt at han sløkna i lyngen. Han synest drøyme rare draumar den kvelden, men det gjekk nå vel å sove likevel. Da han vakna, merka han at ein skrubb (ulv) hadde ete det eine beinet hans. Derav heiter denne plassen "Skrubbehiet" i dag. Ramnkjell fekk sidan spikka om ei eikeplanke til bein, og det hindra han ikkje å gjere det skarpt i hoppbakken.
- I.L. Høllènn hadde ein lang periode med liten aktivitet frå 1970- til 2000-talet. Leiar Hellek Høllènn trakk seg meir attende for å dyrke naturen på Lifjell, og for å “taka afstand fraa alt som der heve med mammon at gjera” som han sjølv skreiv til styret. Sidan har han meldt fråfall frå styremøta dei siste 32 åra (referata frå kvart styremøte vert framleis lagt under ei stor helle øvst i Okslagrinda). I 2017 blei det ny giv i klubben da Hollane skifestival, blei skipa for fyrste gong.
- I 2017 blei den fyrste Hollane skifestival skipa. Klar vinnar blei Audun Gåra frå Sandvoll I.L. Gåra hoppa med den karakteristiske opptrekkarstilen som har vist seg å vera effektiv i Hollanebakken. Elles er Gåra kjend for høg fart i overrennet.
- Under festivalen i 2018 vann I.L. Horrongens storhoppar Ola Kili pokalen. Kili reknast som Bø-bygdas djervaste hoppar, men møtte hard konkurranse frå Torbjørn Sanden frå I.L. Åsen og Sigmund A. Forberg frå I.L. Rusulhellaren.
- I 2019 vann Fisbu I.Ls Tor Henning Forberg Hollane skifestival etter to framifrå og stilreine svev. Det blei sett ny tilskodarrekord med kring 300 menneske til stades.
Vinnarar av Hollane skifestival:
2017: Audun Gåra, I.L. Sandvoll
2018: Ola Kili, I.L. Horrongen
2019: Tor Henning Forberg, I.L. Fisbu
Bakkerekord i Høllènnbakken:
Ola Kili (I.L. Horrongen) og Torbjørn Sanden (Åsen I.L.): 21,5 meter (2018)
