04/05/2023
🤩
Sylvia Tromp ta bek riba radio cu musica Mexicano tur diadomingo 1’or riba radio Mas FM 105.1
Sylvia Tromp ta naci na Aruba, mama di 2 yiu y ta un icono den musica Mexicano, e tin un coleccion amplio di tur artistanan ranchero , su pasion y amor pa e musica a cuminsa desde e tabata mucha.
Su mama tabata un fanatico di ranchero, na radio Kelkboom tabata tin un programa di musica Mexicano di cual su mama tabata scucha tur atardi cu a pon’e Sylvia tambe cay stima pa e musica Mexicano.
Ranchera ta cancionan masha bunita y pa bo enamora di un persona e musica rancgera ta ideal segun Sylvia su mama tabata conte, pasobra nan ta wordo canta cu un pasion y sentimiento profundo.
Pa mas di 17 aña Sylvia a dedica su programanan di radio na musica Mexicano, na radio local no tin un programa actualmente dedica completamente na e musica Mexicano.
Gerencia di Radio Mas FM 105.1 ta mira un oportunidad den e programa aki pa por trece otro grupo di oyente na e emisora nobo cu apenas tin 1 aña den radio. Combersando cu Sylvia den varios ocasion por a sinti e pasion enorme di bin bek radio y deleita su oyentenan cu tur caminda cu e bay ta puntre ki dia nan por scucha su voz y musica bek na radio.
E dia a yega y momento ta awo, diadomingo awo sigui pa tur diadomingo 1’or di atardi Sylvia Tromp ta den aire pa presenta su popular programa Sabor Mexicano un biaha mas pa su fiel oyentenan.
Radio Mas recientemente a celebra su prome aña den aire 1 di april y ta wordo scucha tambe riba cable 448 y online.
Radio Mas ta conta cu un elenco di 18 animador/dj den aire y ta cuminsa cu su transmision ‘live’ for di 5’or di mainta.
