何飛鳳 (2024)

18/12/2023

2023臨尾學新技能
我嘅2024願望係可以幫姊妹影相打卡🫶🏼

15/12/2023

意外就係無得解
總之尋晚行返屋企嘅時候左腳拗柴
當下係好痛嘅，好彩有嘢扶一扶個人無跌落地
之後上網爬文睇應對
只能夠敷冰
今朝早腳眼位就腫到成隻雞蛋咁
趷下趷下咁返工（好在仲行到，係上落樓梯嘅痛感大啲）
但因為都幾腫嘅關係，都係睇醫生安心啲
去到護士分流站
姑娘好熟手咁量血壓，用耳探量體溫，點知⋯⋯
「嗶嗶」
「你發燒喎⋯」
下⋯⋯（完全唔覺自己發燒）
「幾多度啊？」
「38，低燒」
姑娘一路講一路探埋另一隻耳仔，都係嗶嗶聲⋯⋯
好快就見醫生，照埋X光，骨無事
但因為腳腫同有發燒，都係要食消炎藥⋯⋯

短短一日，感受到人間有愛
同事見我趷下趷下都問咩事
幫我撳𨋢同開門
搭車直情有人讓座

唯一唔開心嘅係應該有一段日子都做唔到運動😮‍💨

*為免嚇親大家，po張卡通啲嘅，都似㗎*

25/11/2023

結局改成咁嘅原因

最近好快煲完嘅2套劇集，一套係《王冠The Crown》嘅第6季，另一套係朋友推介嘅《All The Light We Cannot See》（呼喚奇蹟的光），自己比較想叮下大家睇呼喚奇蹟的光，改編自同名小說，小說2014年出版，唔只成為紐約時報暢銷書，仲係2015年度十佳小說之一，小妹不才，無睇過小說，但就咁睇劇都覺得係個好好嘅故事。

故事用二次世界大戰嘅法國做背景，戰爭尾聲，美國不斷轟炸法國西北部聖馬洛呢個城市，同時有個雙目失明嘅少女堅持做廣播，表面只係話掛住爸爸同叔公（都真係嘅）又讀下爸爸寫嘅書，但原來有另一種意思⋯
同時有一個對少女窮追不捨嘅德國軍官同一個追蹤無線電訊號（即係聽少女廣播）嘅德國士兵，老老實實第1集頭半個鐘有啲瞌眼瞓，但半集過後一開始揭少女廣播嘅目的、德國士兵嘅過去、再後來爸爸失蹤嘅原因，由第一集尾開始就節奏緊湊兼緊張，4集唔難喺一晚半晚內完成。

當中時序雖然跳嚟跳去，一時講返10年前少女同爸爸相處點滴、一時跳到去法國淪陷後兩父女由巴黎逃去聖馬洛，一時又跳返去1944年被美國轟炸嘅時候，但脈絡清晰，逐層揭開每個人嘅底蘊，對白也很有意思，提到「光」的部分不多，但睇到最尾，當然知道What the light we cannot see.

睇完劇好想睇返小說，因為對於結局有啲（吓⋯⋯）嘅感覺，未至於大台BBQ嘅Happy Ending,但愛情同喜悅係有唔同嘅下嘛⋯⋯
睇返訪問先知導演坦白話改咗個結局，因為小說最尾有50頁嘅劇情實在太⋯⋯
而且唔符合佢哋想表達嘅信念。
看不見的光，才是世界的救贖
光，從來都代表希望

#一點叮一叮
#煲劇星期五
#煲劇送飯
#呼喚奇蹟的光

15/11/2023

創作或易圓滿很難

近期唯一緊貼又煲得哂嘅劇集，只有Loki 第2季
一來係14年（Tom Hiddleston 加入MCU起計）的情意結，二來係endgame之後轉入MCU Phase 4,5 一個好重要嘅作品（特別係帶出「康」呢個角色），三來係個有主旨有靈魂而且成功地以劇情、人物所呈現出嚟嘅故事。

成日話「一劇之本」，唔係有「時地人」有「情節」有所謂起首與結局就得，「故事」到底敲唔敲到你嘅靈魂深處、有無共鳴有無感受先係作品之間一分高下嘅著眼點。

今時今日嘅Marvel 要創作、推出新角色絕對唔難，亦好明顯phase 5,6 一定以新角色為主，仲可以用長時間睇下咩角色「比較受歡迎」再慢慢部署，問題係舊角色嘅未來，先係令人最頭痛嘅部分，作為一個原本已經可以「作結」嘅角色，Loki可以開劇仲要有2季，怕且無論係Loki定Tom Hiddleston都深得觀眾同Marvel歡心，而且Loki一直係用「比較少嘅篇幅」去做「最豐富嘅成長」，再加埋2輯劇集，說實在，睇到最尾一集嘅標題係「The Glorious Purpose」已經毛管戙⋯⋯

好多朋友都封佢為Marvel神劇（因為Loki都真係神嚟嘅⋯）
認真，神唔神我依然係有問號嘅，但一定係一套好「圓滿」、有靈魂嘅劇集，而且一定係目前為止最高分嘅Marvel劇集。

#煲劇星期五
#洛基第2季
#一點叮一叮
#煲劇送飯

Disney+

18/10/2023

今日節目提到最近大熱嘅AI Yearbook
將你嘅相變成90年代美式風格
換哂髮型同衫
算無咩瑕疵但都明顯係AI 圖
同埋點解好似連個樣都換埋😨

60張入面揀咗呢6張算係似樣同啱style
大家點睇？

#人工智能組圖
#有人話呢個樣似某位藝人🤭

08/10/2023

《碧咸傳》叮下你對抗逆境嘅方法

無論係書、文章定記錄片，「人物傳記」係一個我好難俾讚嘅題材，因為人總有優缺點，而做得傳記大多數係傳奇人物，亦必然歌功頌德大於揭露瘡疤，逝者都仲有一堆後人處理，更何況係在世嘅人（律師團隊之龐大啊～）

《碧咸傳》所以能夠在IMDb得到 8.5/10嘅分數，係因為比起歌功頌德，製作團隊嘅處理同選取角度顯出何謂「高手」，4集，每集約1小時，由頭到尾貫切一條主軸「碧咸的足球生涯」，自細俾曼聯迷爸爸訓練踢波，到俾費格遜簽入曼聯、鋒芒畢露、事業巔峰、再成為世界盃英格蘭輸波嘅罪人、後來俾曼聯賣掉、去皇馬、去巴黎、到掛靴、而家成為邁阿密班主，就算當中有好多秘聞、娛樂版頭條、社會現象，「提及但不偏離主軸」即係以上種種對「碧咸的足球生涯」有咩影響，而唔係純滿足大家嘅八卦好奇。

提到滿足好奇，唔係提返費格遜飛鞋、出軌等事件、對自己嚟講係碧咸點樣「起死回生」，佢最大起大跌嘅時代，係互聯網唔發達嘅時代，好多關於佢嘅新聞，只能夠睇報紙電視，如果唔係太follow足球新聞，純睇下娛樂版/國際新聞，係唔會咁清楚知道佢點樣被唾棄、被恐嚇、跌落谷底，所以自己最鍾意第2、3集。

能夠扶起自己的人只有自己
用能力shut their 👄

呈現以上種種，呢套記錄片每一句bites、每個鏡頭、每段footages、落得準確落得美妙、這當然有賴製作隊請到好多好重要嘅嘉賓、以及碧咸本人話用咗50個鐘接受訪問，但整理、取捨、組織，唔係一件容易嘅事。

Fisher Stevens
呢套記錄片嘅導演
亦係奧斯卡記錄片得主
一個值得記住嘅名字

#一點叮一叮
#煲劇星期五
#打風煲劇
#好睇嘅記錄片
#碧咸傳

29/09/2023

今晚係有機會賞月㗎🌕
祝大家中秋節🥮快樂🎉

2023.09.29 19:53 的月亮

26/09/2023

究竟啲痰幾時先清得哂😒
我想中秋瘋狂食🔮🍐🍇
同埋bbq

最近身邊多人病
大家保重

#都係帶返個口罩先
#做1個鐘節目起碼飲2杯水

16/09/2023

CP感勝過一切嘅《歡迎來到王之國》

有follow開叮一叮煲劇星期五嘅，都知我好少介紹愛情小品（韓國多數叫melo)因為韓國嘅melo早有公式，而追求新鮮題材或者滿足好奇的我嚟講，喺有海量選擇之下，都會開咗其他嘢嚟睇先⋯

凡事都有例外，特別係壓力大嘅時候，自己唔係戀愛腦就想睇下人地點戀愛腦，
點都舒服過要估兇手估劇情或者喊一餐嘅劇種，所以最近其實間中就開王之國嚟睇，典型愛情喜劇類，背景係酒店，一個酒店富二代兼話事人男主角同傑出女員工女主角由冤家變為合作關係再變為戀人關係，最後仲係結婚happy ending，莫講話韓國，幾乎係世界級典型愛情喜劇嘅格式，嗱，唔好淨係聯想到老土，其實拎住個咁經典嘅格式要拍得好係好難嘅，而相信從收視（結局13.7%，成為JTBC歷代韓劇收視第7名）、話題性已經印證製作組嘅成功。

其中之一嘅功勞，莫過於搵到李俊昊同潤娥做男女主角，2個都係偶像團體出身，而偶像歌手要轉型，最大出路就係拍劇，演得好就演到幾歲都得，2位經歷過多年多套作品嘅實戰，李俊昊仲憑《衣袖紅鑲邊》成為百想首位封帝嘅男歌手，今次拍著潤娥演一個有反差萌嘅傲嬌少爺，加埋導演、剪接嘅節奏，真心，都睇得令人幾歡喜下。😍

要知道一對影視作品CP感有幾強，其中一個指標，必定係傳2個戲假情真或者有拍過拖😆😆

特別喺種種把人擠壓得喘不過氣來嘅大環境之下，令人笑，令人戀愛，係幾咁功德無量嘅事。

**附圖嗰幕李俊昊個笑容真係令人ke一聲笑出嚟**

#煲劇星期五
#一點叮一叮
#韓劇介紹
#歡迎來到王之國
#韓式愛情喜劇
#李俊昊
#潤娥

02/09/2023

又完成一個風更
又係同呢兩位拍檔朱菁王詠瑤 Wong Wing Yiu守尾風（臨轉3號波前嘅8號風更）
度過2個半小時嘅颱風版一點叮一叮

路面仲係有唔少塌樹
如無必要都係唔好外出
出嘅話就注意安全
避免經過樹底
因為目測好多樹枝都危危乎

01/09/2023

做電台10年
我敢講
最怕嘅唔係失聲、講錯嘢、病咗、直播亂哂坑
而係打風！
唔係因為要工作
而係颱風天出入真係好危險
而且要勞煩司機（無論公司司機定的士司機）車出車入佢哋都危險同辛苦
所以大家有得揀、有瓦遮頭
就真係唔好出街
而我地返颱風更
點都執定遮+風褸（大雨就雨褸）+杯麵/零食

認真
如果聽日仲8號（聞說好大機會）
又要勞煩世一嘅本台司機車我返工😞

#大家平安🙏🏼
#颱風快快走
#同事講笑話跑步都快過蘇拉
#今晚最接近切勿掉以輕心
#而家出面啲風都好強

28/08/2023

盡見650億韓圜質素的《Moving超異能族》
（1-11集目前感想，微劇透）

大製作大卡士唔係佳作保證（睇《緊急迫降》就知，最近仲爆出「篤票房」醜聞…）點都係一劇之本，創作為先，近年唔少韓劇都改編網絡漫畫，因為可以不受電視廣播框框，盡情天馬行空，改編嘅話，我會睇埋係咪網漫作家親自參與劇本，而呢套Moving，由作者姜草親自執筆，所以很清楚每條故事線發展邊啲重要，點樣分佈，開頭有少少奇怪，點解一上先上7集，然後每周三更新2集，最尾3集大結局一次過上架？因為：

1-7集：超能二代高中三人組嘅相遇，揭示佢哋擁有嘅能力，製造青春戀愛線，舖下超能一代現在隱姓埋名嘅退休生活兼危機（殺手出現追殺己退休嘅超能一代）係可以好豐富嘅劇情，但唔知係咪導演編劇太鍾意高允貞（都堅係靚嘅）勁多同李正河嘅粉紅泡泡💘okok 唔係咁就無機會揭露李正河戲入面嘅飛天能力呀嘛，但唔使咁多round先終於俾高允貞發現嘅，同埋柳宰範飾演嘅殺手，殺2個己退休side cast咪夠囉，殺3個都唔緊要，但唔一定要打足咁多場去交代，因為其實重要嘅只係車太鉉嘅爸爸（揭露車太鉉嘅超能力）

而更重要﹗我喺節目都講過，作為主演兼宣傳擔當嘅趙寅成頭7集只得2個鏡頭（仲要一個係見唔到樣嘅剪影😤）okok要保持神秘同埋喺戲入面真係失咗蹤呀嘛，咁其實以上種種，5集內容已經交代得哂…相信節奏會爽啲同追看性會再高啲，咁編劇都醒嘅，點解第8集開始先每周更新，因為係時候交代超能一代嘅過去

8-9集：最近討論度超高嘅趙寅成+韓孝周cp，顏值+演技+浪漫+場景（櫻花樹下散步同飲咖啡嗰幕對白不多但擺明2個已經愛上對方💕）而寅成最後嗰句「我覺得我會死」然後釋放情緒嗰下演得好好，最近睇返訪問原來係佢主動提出改呢句對白（原本係「我愛你」）

10-11集：交代柳承龍嘅過去、點樣識高允貞嘅媽媽同加入秘密組織嘅過程，身為擁有再生能力嘅江湖混混原來係戇男，而且死穴係路痴，柳承龍喺剛柔之間嘅換轉都演得好好👍🏻

650億韓圜（3億8港紙），咁多大卡士當然佔好大部份，但製作場景、拍攝、動作、特效都真係有電影級數，而且睇演員訪問呢套劇足足拍咗1年，有咁多條線咁多演員，協調上絕對不易，雖然都係唔知點回本同回唔回到，但作為觀眾，睇到套咁樣製作嘅電視劇係幸福嘅

估下未來幾集嘅發展～

12-13集出左預告，應該交待趙寅成+柳承龍嘅特務CP之間嘅默契、寅成任務嘅後續發展、應該要出金成均（怪力+速度嘅超能一代）嘅來歷（咁多集以來資訊最少）

14-16集：故事主線返回現代，過去作為穿插，超能二代開始面對更進一步危機，超能一代作為父母增強危機意識/行動

17-20集將會一次過上架，之前有消息放出呢套係「韓版復仇者聯盟」咁大家唔難估結局應該唔係Endgame 都會係Advenger 1

超能力+神秘組織+背叛+復仇唔係咩新元素，但好在編劇為網漫本人，捉緊要表達嘅「人性」「到底係超人定怪物」連客串嘅柳承範作為有超能力嘅殺手，都俾返段童年戲佢，交待一個人點解會去到今日呢步

而最鍾意嘅都係寅成oppa 一句喺劇入面簡單不過但畫龍點晴嘅對白：
「我都係一個人嚟㗎」

#一點叮一叮
#煲劇星期五
#介紹韓劇

#所以點都煲到最後
#其實無寅成都好睇嘅
#你哋煲咗未

27/08/2023

今年終於有實體版台慶晚宴👏👏
波姐第一年參加
而我可以同葛爺同一場合攞長期服務獎（當然佢年資耐我好多塊金牌又大塊過好多）
開心🫶🏼
今年有幸成為台慶MC team 其中1位成員🫡
發現早到會場rehearsal係會有多啲時間影相📸️（仲無咁多人）
但我發現好多相唔係喺大會攝影師就係喺同事手機度⋯
拎返啲相再補post……

#商業電台六十四週年台慶 #商業電台生日快樂

06/08/2023

能夠改變嗎？
D.P 逃兵追緝令第二季觀後感（少劇透）

由漫畫改編（並由原作者金普通參與劇本）嘅第一季無論題材、選角、拍攝已經很新鮮並優秀，畢竟「逃兵」嘛～係個需要慎重考慮切入點嘅主題，喺一個講求服從、階級嘅組織，本身應該戴著光環、熱血（保家衛國喎），但點解要逃呢？而且一逃就已經犯法（好嘅地方又點會有人想走）

第一季狠狠地將欺凌、極權擺上檯面，而第二季延續上一季嘅一啲「手尾」，即新一批「逃兵」當中同喺第一季出現嘅有關連，本季有6集，真心，頭3集覺得未係好拿捏到主線嘅舖陳、除了帶出新角色，好多篇幅都比較集中講2位男主角喺第一季尾發現逃兵嘅無奈、制度嘅敗壞之後，心靈點受打擊，又點樣企返起身，具教煥嘅表現比丁海寅突出（因為本身角色人設就係比較鮮明）今季加咗2個貌似big boss角色（池珍熙、鄭石勇）但其實正正代表住「已經被馴化，唔好俾佢變亦唔希望變」嘅人，為咗自己軍階甚至成個軍隊嘅名譽寧願「暪、滅、壓」以為係大壞蛋？有啲隱瞞、手段、為咗形象反而係有需要⋯⋯？

好在第四集開始終於返到正軌，結局亦不錯，沒有過份的英雄主義，「以卵擊石」本身就難以一步到位，尤其想撼動一個固如泰山嘅權力制度，就必然有所犧牲，但願第三季出現更多卵ssss........

#介紹韓劇

#觀後感
#一點叮一叮
#煲劇星期五
#煲劇送飯
#丁海寅帥氣但具教煥演技好

24/07/2023

D記今次終於買對了劇集《惡鬼》
（1-10集感想·少劇透）

除咗N記，其實D記一喺香港上架就已經join，因為鍾意睇Marvel，亦無諗過呢2年多時間除咗Marvel就好少開佢嚟睇，坦白說，佢買嘅韓劇係有卡士，但從來卡士不代表一定好睇，無咩幾多套係可以由頭追到落尾，除非係系列fans(例如金師傅）否則只論韓國作品，數量同質素我覺得一向都係N記完勝。

直至《惡鬼》我敢講係D記咁耐以來最有眼光嘅購入劇集。
我一直好怕睇鬼片（怕瞓唔著），但鍾意懸疑題材，鬼+懸疑（查案）唔新鮮，但加埋「民俗學」就吸引到我呢啲頗喜歡都市傳說、文化嘅人，尤其喺傳統香港家庭長大（屋企會燒香拜神嗰隻）聽得多咩7月唔好夜歸，夜晚被拍膊頭唔好應etc…..都想知原來韓國嘅民間習俗係點，而一個民俗學教授點解要幫一個被惡鬼纏繞嘅女仔，原因又好合理，甚至係一個共生關係。暫時追咗10集，都無咩好大嘅犯駁位。

而且，以為得頭幾集先驚下啫，點估到去到第10集都仲嚇人一跳兼且心寒，呢個要歸功2件事，1係導演有花心思點樣用畫面做到「恐佈」嘅氛圍，對於「鬼」嘅呈現，用咗好多唔同嘅技巧，例如燈光、剪影、血流披面見到樣嘅同見唔到樣嘅都有，而且利用「未知」這恐懼，敲門聲、鏡的倒影，你明知下一秒有機會見到「鬼」但又唔知點解好緊張…

2就一定係金泰梨嘅演技，作為一個飾演被鬼纏身嘅女仔，可以從眼神、形體、語氣區分出幾時係自己幾時係鬼，然後某啲情緒爆發又做得好好。

最後想講下劇情，睇到第8集開始覺得「應該無咩好講照繼續落去可以完」咁12集埋尾都唔會拖啱啱好，點知第9第10集仲嚟個大Twist（轉折位）先收尾，而且Twist得好順，搞到真係好想快啲睇11、12集

劇集好難由頭到尾都咁好睇，而家就算估到結局都好（唔會係惡鬼贏嘅⋯），都係一個完整兼令人追得很爽嘅煲劇過程……

而且…
以後開門同照鏡都要好小心……

#韓劇推介
#惡鬼
#誠意推薦
#一點叮一叮
#煲劇星期五
+

09/07/2023

揭曉！去咗睇阿Jer 演唱會❤️
期待你能駕馭一個更寬廣的舞台
#仲有林宥嘉做嘉賓👍🏼
柳應廷 Jer Lau

09/07/2023

星期日有多啲時間準備出門口✨
究竟去邊度呢😏

#收太陽先出門
#夜晚節目
#期待期待
#將喺韓國買嘅嘢著哂戴哂上身😂

02/07/2023

肚滿腸肥之旅完結
明天乖乖地返工⋯⋯
然後期望下一次旅程（唔知幾時😮‍💨）
又食又行又買
時間最不夠用🤧

#一點叮一叮
#聽日叮咩好
#總結首爾之旅

23/06/2023

每次旅程，看似毫無計劃，但睇下又聽下人哋嘅意見，總會有啲地方/店舖/餐廳想去，所以我有個習慣會喺地圖⭐️咗佢，去到就容易啲搵

原來有6年時間無去過首爾，看著那些曾經俾⭐️嘅地方，唔只陌生，連點進去都只有街號名，不再是某某店舖某某餐廳，感覺是「你們⋯還都好嗎？」（唔通敵不過疫情？🥲）我無取消啲⭐️⭐️今次去，如果有緣嘅話，想看看那些變成了甚麼⋯

係呀下星期二開始會放幾日假去首爾，叮一叮會有代班主持阿瑤同阿草

大家想我帶咩首爾嘅資訊返嚟叮下你哋？
投票吖，俾
👍🏼 美食
❤️購物
😂護膚化妝

如果讚好人數過100考慮旅程期間搵晚開live 同大家匯報兼傾偈😎

#一點叮一叮
#飛去首爾
#原來未試過夏天去
#附幾張以前影嘅相
#證明次次去都係凍冰冰😂

22/06/2023

我算係糯米控，大部份糯米做嘅食物都喜歡（例如年糕、湯圓、糯米糍等等等等🤤）
唯獨由細到大，對於啲粽都係⋯🫤
而且老人家怕關節痛/難消化，近呢幾年都好少買粽食
但早兩日⋯
👩🏻‍🦰：端午節要唔要粽？
👵🏼：唔食得呀⋯
⋯⋯⋯⋯
👵🏼：不過又好似要有隻做下節
😑😑
如是者尋晚出現2隻粽，係親戚俾嘅
烚咗之後，我依舊係唔多想掂⋯點知⋯
👨🏼‍🦳：食兩啖應下節啦
👩🏻‍🦰於是食咗少少，仲加咗啲薑蓉，發現咁樣都幾好食🤩

#結論係薑蓉撈乜都好食
#一點叮一叮
#保持好奇與實驗精神
#開拓砂糖豉油以外的新食法
#端午節安康

18/06/2023

我有信心，所有味都係鳳爸最鍾意嘅😎
［拿破崙+芒果+黑森林］
一次過滿足哂3個願望
有無人同我屋企一樣有時鍾意買散件🍰多過原個蛋糕🎂切

#父親節快樂👨🎁
#糖度限額已滿

11/06/2023

韓劇《壞媽媽》結局大家睇咗未？以最高12%作結

一個「唔老土嘅老土結局」即係你知點都係壞人落網、好人勝利，但過程、設計算有驚喜，尤其令吳太秀上當入局再將佢一軍，算係聰明嘅做法（知道敵人嘅心理同弱點很重要😏）

好多觀眾都讚呢套劇嘅配角，的確每個人物設定都有鮮明嘅個性同作用，我尤其喜愛友壁秘書二人組（雖然一早估到佢哋會變忠）以及咁多集唔係敷住個mask 就係戴住太陽眼鏡嘅里長老婆（最後曝光嘅身份也太好笑了⋯不過變回正常樣子都真係認佢唔出⋯⋯）

重點係一對雙胞胎（太可愛了），點解韓國連童星都咁好戲😂定係cast佢哋嘅人眼光獨到🤣

如果要講缺點，作為理智派嘅我硬係覺得點解復仇同媽媽治病有衝突🤔️雖然而家嘅設定係賺人熱淚🤧但不是為了撐下去看到結局才應該要積極嘗試治病嗎⋯？

#壞媽媽
#韓劇介紹
#一點叮一叮
#煲劇星期五

21/05/2023

先申明，呢張圖係喺網路上見到嘅，一秒後我笑咗，唔係因為用食物做花球（興咗好耐啦有咩出奇），而係配圖caption 「花語係：明天見」😂😂
#明嘅就明
#唔明嘅留意節目
#一點叮一叮
#飲食星期二
#你哋無試過咩
#飲食資訊

19/05/2023

［另類放閃］
最近比較多小昆蟲入屋，我只係喺group度問「邊幾隻味驅蚊？點調？我想要噴霧」
然後有姊妹過幾日送咗佢哋嚟我公司
唔係講笑
開心過收花

#仲額外附贈甜柚香水一支
#經專業人士調配可放心使用
#有好姊妹係好重要㗎🥰
#茶樹檸檬尤加利是旦一隻都得喎
#驅蚊噴霧
#係時候布下結界
#俾蚊咬醒的人招募區👋
#一點叮一叮

14/05/2023

給長輩的
當然要長輩圖😎

#祝母親日日快樂

07/05/2023

「既恨且愛」嘅《壞媽媽》
（1-4集目前感想）
揀劇有時好表面（都唔使咁深奧吖，求娛樂啫）睇卡士睇故事大綱，早前bookmark咗韓劇《壞媽媽》，資深實力派演員羅美蘭+大勢演員李到晛，唔期望係咩情情愛愛劇（擺明sell母子情），亦因為喺韓國由JTBC播放，有感覺JTBC稍為偏好正劇，唔怕揀啲比較「深」嘅劇本，所以開呢套之前都諗住要慢慢沉浸幾集，不過⋯⋯

無預計過第1集用咗差唔多成45分鐘平舖直敍地講爸爸媽媽相遇相愛然後爸爸點死變成單親家庭

去到第3集尾先開始去返原本故事大綱寫嘅橋段（即個仔因為事故而變回一個大人身驅但得7歲回憶嘅小朋友）

係有好多嘅未知所以係有好多嘅伏線（第4集先知男主角出事嘅時候已經35歲）換言之由佢離開媽媽到意外應該有至少13、4年嘅時間，除咗淨係因為細個被媽媽逼得太緊而憎咗媽媽之外，仲發生咗咩事🤔但第4集反而交待返佢同青梅竹馬初戀嘅過往

後續應該會越揭越多，當然不離主軸（為爸爸報仇）同重新建立嘅母子情，所以繼續有追看嘅價值，而家開始煲，可以慢慢跟上韓國播放的節奏（唔使一集一集咁Chok 住道氣）

母子間嗰種恨與愛很易令人有共鳴，尤其每個仔女總有「唔鍾意阿媽」嘅一堆理由，但阿媽又有「理直氣壯地咁做」嘅一堆原因，羅美蘭把這個強悍、恨心、但善良又愛在深處嘅媽媽演得很好，看李到晛雖然把「回到7歲」演得有點⋯⋯（到而家都唔清楚究竟係智商得7歲定回憶去返7歲⋯定2樣嘢一齊去返7歲但睇落又好似少過7歲）（而家啲7歲好醒好嘴gel gel㗎嘛）

Anyway,兩母子嘅戲份係好睇嘅，亦好易令人攞紙巾🤧

況且臨近母親節，睇完各位壞媽媽可能變得善良啲，仔女們又會體諒媽媽多啲

#韓劇介紹
#韓劇壞媽媽
#一點叮一叮
#煲劇星期五
#煲劇送飯

01/05/2023

返緊公司⋯⋯
呢排多人流感
保重身體🙏🏼

#其實我個個星期一晚都喺公司

#放心我無事

27/04/2023

都仲買到飛嘅⋯
有啲早場仲有好多飛添
係4DX IMAX嗰啲爆啫

#分享今日歌單
#開心睇戲
#我都係鍾意匿喺屋企煲劇煲戲多啲

24/04/2023

有聽眾問我攞返上星期四嘅節目歌單
我記性唔係差，但咁多日咁多歌我係唔會記得（哂）
好在我每日都有rundown同寫好嘅playlist

希望每日繼續令大家元氣滿滿地生活💪🏻💪🏻

#背景圖只係咁啱同一日影嘅
#一點叮一叮
#資訊加音樂節目
#送飯良伴

07/04/2023

今日煲劇星期五嘅介紹經已上線
仲新鮮滾熱辣喺節目入面報道全度妍以《格殺福順》(KillBoksoon)入圍韓國百想藝術大賞影畫部門最佳女主角👍👍

傳送門︰https://www.881903.com/program/archives?token=3d2b3e9f81ef3432b3b58d6e1b633ce8

#一點叮一叮
#煲劇星期五
#台劇模仿犯
#格殺福順
#網絡串流平台作品

06/04/2023

4月你哋就話有清明+復活節假啫(我無㗎……)同埋紅假嗰幾日呢幾套劇未上，4月嘅下旬繼續係忙碌嘅煲(韓)劇日子……

我bookmark咗呢幾套︰
14/4 造后者
公關高手遭遇意外後，遇上一位人權律師，然後用佢嘅公關手段幫對方坐上市長之位。本身對呢類政治手段劇不太興趣，但兩大「后」級演員金喜愛+文素利，提升可觀指數。

17/4 特務家族
之前已經介紹過，輕鬆之選。

26/4 壞媽媽
《黑暗榮耀》之後入坑李到晛？我無嘅(不是我杯茶)但覺得佢做得幾好，今次飾演一個失去成年記憶，變返一個小朋友嘅男人，然後同羅美蘭飾演嘅媽媽展開新生活，應該都係少許懸疑+溫情(要準備紙巾🤧)

#煲劇星期五
#4月韓劇之選
#咁搞法好攰㗎
#好多好演員
#一點叮一叮

+韓劇

03/04/2023

我諗入場嘅人當中，年紀最大嘅怕且都係佢（據目測），但心境就同年青人差唔多❤️
很chill的一個晚上
多謝西九邀請

#波姐 #嫲嫲出遊 #好多人搵波姐影相 #方皓玟嘅剪影好型 #活潑到老

31/03/2023

無咩事嘅話
我仆返去煲呢套戲🚶🏽‍♀️🚶🏽‍♀️
但因為4點先上架
去食個飯先

#等咗呢套好耐
#欣賞影后級演技
#觀眾的幸福
#韓國嘅動作戲可以去到咩境界
#길복순
#전도연

22/03/2023

如果大家最近聽節目聽到「咕嚕咕嚕」聲⋯
無事嘅
主持人肚餓啫⋯

#呢排控制飲食中
#想改編193睡到三點做餓到兩點🤣
#呢個姿勢維持咗1秒
#放心我無暈低
#鳴謝攝影師祿爺
#直播如常進行中

21/03/2023

[Bookmarked]
老老實實，近期比較鍾意輕鬆小品，最好可以笑下
又坦白，本身不是特別喜愛張赫張娜拉，但今次聯手做《Family》（特務家族）喜劇，就算擺明大橋好SpyXFamily feel(特務老公+有秘密嘅老婆）又想睇下有咩化學作用，笑唔笑得出

4月中上架

#仲要得12集
#輕鬆笑下咪好囉
#喜劇好難做㗎

14/03/2023

大家睇哂未啊？
一晚煲得哂嘅下半場（爽）
主觀地說的話，有些場口不是個人喜愛的
但還是有很多優秀的設計與安排
對白也很有水準
演員們大概會成為年末頒獎禮的常客吧（如果下半年無一套更「爆」的話）

你估下我最喜愛哪一幕？
一點叮一叮嘅「煲劇星期五」同大家分享😉

#一點叮一叮
#煲劇星期五
#黑暗榮耀
#復仇新境界
#編劇這上帝視覺也太善良了
#看花絮照跟劇情有點格格不入

02/03/2023

3月除咗可以唔使戴口罩，仲有唔少期待已久嘅影視作品排住隊喺網絡串流上架，小妹bookmark咗呢幾套，大家可以一齊煲~~

***首選
10/3 The Glory黑暗榮耀第2季
如果未睇第一季建議快D煲，節奏緊湊，宋慧喬難得擺脫形象演一個陰沉角色，人物關係雖多但未算複雜(都易消化嘅)，編劇隱喻、對白、舖排👍🏼

31/3 Kill Boksoon 格殺福順(電影)
最近瘋狂陷於全度妍的魅力之中，今次做個傳奇式殺手兼單親媽媽，睇完預告即刻諗起SPY X Family嘅媽媽約兒🤭
代表韓國入圍今屆柏林影展

16/3 Shadow and Bone太陽召喚第2季
對於歐美魔幻類情有獨鍾(可能細個睇得HarryPotter多)，呢套無論特技定世界觀都幾有新鮮感，第一季論述背景、人物設計、玩正邪之間嘅錯摸，都睇得好爽嘅，唯獨同第二季上架時間相隔太耐(足足2年)，要搵返D劇情同人物嘅記憶🤯

8/3 MH370消失的馬航客機 (記錄片)
「傳媒職業進修」系列，睇下仲有咩角度可以講呢件事🤔

**次選
16/3 Era Ora 快轉人生
條橋幾得意，穿越+喜劇+對「人生」「時間」嘅觀點😎

#3月煲劇
#煲到天昏地暗
#終於等到第二季

#一點叮一叮
#煲劇送飯

22/02/2023

兔年活活潑潑開個靚頭❤️
有個cyber同型嘅會場
可以俾我solo講段好tech嘅嘢
希望成功將訊息帶俾業內人士
亦感謝
Make up .tziong
Hair .makeup
Outfits
#多謝製作團隊
#香港科學園

#台下猛人如雲

18/02/2023

兩口氣追哂10集嘅韓劇

放假嘅一個星期，自己做埋「電子排毒」，無用手機打機煲劇，返到香港先開《浪漫速成班》其實已經播到第10集，原本自己有少少怕呢類「浪漫喜劇」但見口碑收視都唔錯（第10集喺韓國去到13.5%）再加埋有影后全度妍，結果一開⋯第一口氣睇咗2集，第二口氣⋯即第二晚⋯連追8集 🫣

男女主角演技一流，雖然外表CP感真係爭咗啲，亦好典型韓劇嘅戀愛方程式（由誤會變成冤家，然後一個原因又要同對方糾纏，後來多咗相處又發現原來一早有緣份，跟住就鍾意對方🤷🏼‍♀️）但係因為喜劇位節奏表情拿捏準確，都真係ke一聲笑咗出嚟

劇情方面除咗男女主角，仲有幾條副線，以「唔太沉鬱」嘅手法表現韓國「補習生態圈」嘅荒謬，學生們苦，媽媽們也壓力大，但女主角嘅人設（樂觀積極）又balance返個氛圍，加埋有條「查案」嘅支線，唔只難得地1集1個鐘嘅內容無咩悶場，仲無咩「拖」嘅感覺

問題係得返6集，一般16集韓劇格局，去到11-14集係有少少放慢返節奏嘅慣性，即係我估嚟緊2集，應該都係男女主角派下狗糧，滲少少案情進展，然後多一個轉折位就收尾

唔緊要，頭幾集令人入坑就夠了，之後發展係點都會追埋落去

#韓劇推介
#浪漫速成班
#一點叮一叮
#煲劇星期五
#煲劇送飯

18/12/2023

15/12/2023

25/11/2023

15/11/2023

18/10/2023

08/10/2023

29/09/2023

26/09/2023

16/09/2023

02/09/2023

01/09/2023

28/08/2023

27/08/2023

06/08/2023

24/07/2023

09/07/2023

09/07/2023

02/07/2023

23/06/2023

22/06/2023

18/06/2023

11/06/2023

21/05/2023

19/05/2023

14/05/2023

07/05/2023

01/05/2023

27/04/2023

24/04/2023

07/04/2023

06/04/2023

03/04/2023

31/03/2023

22/03/2023

21/03/2023

14/03/2023

02/03/2023

22/02/2023

18/02/2023

Address

Website

Alerts

Videos

Shortcuts

Share