17/01/2018
Sodason nhas armun
20 di Janeru dja txiga dja i sta na ora di nu mobiliza pa kel grandi Marxa Kabral. Nu bai nu ba rinova nos konprumisu ku Afrika.
Sodason pa tudu Afrikanu,
20 di Janeru sa ta txiga i es anu Kumison Nstalador Nasional di MFPA sta sai djuntu ku Movimentu Korrenti di Ativista i otu kuletivu pan-afrikanu di kapital na kel grandi Marxa Kabral.
Es anu Marxa Kabral ta silebra se sextu edison i lema di marxa e "Kabral: Unifikador di Povu".
Nton dja bu sabi... abo ki teni Afrika na korason, ki ta xinti sufrimentu di povu afrikanu na alma i ki ten speransa ma nu ta muda jogu, ben bu djunta bu vos na difeza di un Afrika Unidu pa ben di tudu afrikanu i di tudu mundu.
Sima Julius Nyerere, prumeru Prizidenti di Tanzania, ki uni Tanganyika i Zanzibar, i ki era kunpanheru di luta di Cabral, fla si Afrika kre un futuru e ten ki uni. Kwame Nkrumah, grandi pan Afrikanista, amigu di Cabral, fla tanbe ma Afrika debi uni. Sin, nu debi uni pa nteresi di povu, pa tudu Afrikanu ten un vida bon ku idukason, saudi, trabadju, diginidadi, etc.
Konsentrason e 10 ora na kruzamentu Fazenda antis subida Plato. Di la nu ta subi Plato, nu ta pasa na rua undi Amilcar Cabral vivi na Ponta Belen i nu ta bai finda na frenti Fundason Amilcar Cabral.
Pasa palavra, leba familia, amigu, kolega... nu sta konta ku bo na es marxa di Povu Afrikanu distinu pa Rinasensa Afrikanu.
