09/06/2024
دليلك الخطير لزيارة بص يا سيدي
من أولها كدة كلمة قرية دي تقولها لو رايح قرية أعضاء هيئة تدريس معهد سيكلام
لكن من بعد العلمين كل مكان له أسم دلع معروف زي ديبلو و ستلا و حنيش
كلمة كارنيه دي تقولها لو داخل مركز شباب الحبانيه عشان أسمه بقي باس أو كيو آر كود علي موبايلك و ده لازم واحد صاحبك من أهل الساحل هو اللي يبعتهولك ، و صاحبك ده لازم تحسن علاقتك بيه قبل الصيف عشان مايفهمش إنك مصلحجي 👌
قهوة تركي أو فرنساوي أو مانو دي بتاعة قهوة فاروق أو القهوة العالية بتاعة محطة مصر
إنما هنا لازم تقول كوفي و انسي أن حد يساعدك في الطلبات ويغششك زي ستاربكس و تفضل تقول آه آه و انت حمار و مش فاهم حاجه و هو فاهم إنك مش فاهم ، هنا لازم تعتمد علي نفسك و تحفظ أسم أي قهوة ثلاثي ، فلات وايت كراميل أو كابتشينو سكيمد سمول غير كدة هتقف في نص هدومك قدام الباريستا ( القهوجي) و الطابور وراك هيكون فيه بنت حلوة🧟 هتبصلك بقرف و إحتقار
و لو بتحب الآيس كريم🍦🍨 إنسي جو الفانيليا و الشيكولاته و الفراولة و إلا روح كل عند عزة أو الصعيدي في بحري
في الساحل لازم تستر نفسك بإسمين لأي نوع كرملايزد الموند أو سولتد كراميل و لازم تقول فانيلَّلا مش فانيليا عشان يرضوا يدخلوك داراز أو كولد ستون
لو هتاكل سوشي متحاولش تفهم المنيو عشان الصيف هيخلص و أنت لسه في أول صفحة ، هتلاقي واحد صاحبك معاك عالترابيزه قديم في السوشي قل له إنك بتحب السلمون و الكابوريا و هو هيتصرف
اااه نسيت أقولك ده سلمون تاني خالص غير بتاع إدفينا اللي الحاجه كانت بتفتحلكم منه علبة لما تكون مش طابخة أو متخانقة مع الحاج
مفيش حاجة هنا اسمها زلابيه عشان زلابيه نفسها مستحيل يدخلوها ، اسأل في الخباثة و هتلاقي واحدة مكانها اسمها ريتشويلز أو بوبس أو أي حاجة غير زلابيه
فستان دي تقوليها لو شاريه من ميامي ب ٢٠٠ جنيه إنما هنا هو بالظبط بس اسمه دريس و ب ٥٠٠٠ جنيه من الامبوريوم بتاع مراسي
البنطلون هنا سويت بانتس أو كارجو بانتس أو جوجر و الشبشب سلايد أو فليب فلوب ، والمكنه باجي و الأسكوتر جلايد و البيسين بوول و البحيرة ليك أو لاجون والكابينة كبانا و تفتح بوقك كده و أنت بتقولها
أوعى تطلع عالبحر بالكوتشي و الشراب علي شورت و تيشيرت عشان هتبقي دسوقي أفندي عالبلاج
لازم تلبس حاجتين ملهمش أي علاقه ببعض زي المايوه علي القميص الكتان اللي كنت بتخرج به في العيد و يا سلام لو قميص مقلم زي جاكيت البيجامه الكستور بتاع زمان أو أي بلوزه مشجرة من عند المدام
المشكلة بالنسبه للستات عدت موضوع البكيني و البوركيني و بقت الست لازم تروح للكوافير قبل البحر و تتشيك و تلبس شبكتها كأنها رايح فرح شيماء بنت خالتها
عالبحر مفيش حاجة اسمها أمك تجيب ساندوتشات حتي لو جايبة جمبري بيطير جوه الساندوتش ، لازم تاكل من الشاطيء اللي بقى فيه مطاعم أكتر من اللي في نيويورك و لو مكسل تقوم هتلاقي ويتر بين الشماسي متحاولش تسأله عن أنواع الأكل عشان مش هتفهم حاجة ، هو هيقولك دايما اختيارين خد الأول و أنت ورزقك يعني العصير هيسألك عادي ولا سموزي ، الفاهيتا meat ولا تشيكن ، الاستيك ويل دن ولا رير ، البيتزا 🍕مرجريتا ولااااا مرجريتا ، قل له عايز مرجريتا الأولي 😊 وبالنسبة للعصاير مفيش برتقال و مانجه والشغل البيئة ده لأن العصير لازم يكون اسمه مركب زي بينا كولادا أو صن شاين. 🧋🍸
لو عايز تسهر في مكان حلو لازم تظبط بروفايل الفايسبوك بتاعك عشان لو صفحتك اسمها طائر الليل الحزين أو حبيبة جوزي و مامة بسمله و رنيم ، هيحرجوك جامد حتي لو معاك ملايين الدنيا ، ولازم تراجع صورك علي صفحتك كويس عشان أكيد مش هتسهر في ليمون تري أو ايزاكايا و أنت متصور عند بير مسعود أو أبوالحسن عالبحر
لو عندك عربيه نص نص حاول تركنها بعيد عشان محدش يكسفك و لو عندك عربيه جامده ما تفتكرش أنك هتقلب الدنيا عشان هنا الجامد في اللي أجمد منه مليون مرة ، و حاول تعلق نمره مميزة زي قلق ٦٦٦٦ ، وحش ٥٥٥ أو بغل ٣٣٣ علشان تاخد معامله أحسن
إنسى جو الوسايط و أنا من طرف اللواء الششتاوي و جار اللواء المحلاوي عشان هنا الوسايط بتبدأ من أمين عام الأمم المتحدة و أنت طالع
بقولك أيه خليك في قرية دعاء الكروان و ما تقرفناش معاك و اضرب الشبشب و الجلابيه و عيش حياتك زي ما أنت عايش و بلاش وجع دماغ 😁😁
مالها بلاچات زمان ، جليم وإستانلي والمندرة وميامي وكليوباترا وسبورتينج والإبراهيمية و ......... كان ليها مذاق خاص ، ولا كان فيها حد بيتنطط ع التاني 🤣
أنتم بس اللي بتموتوا في الفشخرة 🤣🤣
و على فكرة العربية اللي في الصورة ملهاش دعوة بالموضوع أنا بس عجبني النمره المميزه
