A fotógrafa Alba Sotelo cóntanos neste divertido vídeo como foi o seu paso pola Presidencia do Cineclub Bueu e por que decidiu proxectar 'Le Havre' no ciclo conmemorativo do noso 25º aniversario 🎂 Este venres ás 21 horas estará no Centro Social do Mar para presentarnos o filme de Aki Kaurismäki e debater despois co público 🗣️ Non faltes!
'Unha mirada que se perde no horizonte e se atopa no Mar del Plata é ao que se atopa tras este traballo de Alba Sotelo. Unha sensible achega a un pintor cun pé en cada orela do Atlántico enguedelladas dende os pinceis e un trazo que, como ese horizonte, é unha poética redución do universo. As imaxes de Alba Sotelo no estudo do pintor, ou nese exterior que as veces é unha prolongación dese propio estudo, converten a Bueu nun acougo para esa distancia. O bálsamo preciso para que o espírito do pintor, ollando as ondas do mar ou pisando a area, teña na obra de arte centrada toda a súa atención. Miradas, mans, latexos, trazos...todo forma parte dunha caricia visual que dende a sinxeleza di moito de como José Solla entende a arte e a súa relación con Bueu, a orela dende a que albiscar o outro lado.'
Segundo Ramón Rozas Domínguez así é 'Horizontes' esta peza de Alba Sotelo que presentamos hoxe xunto co Concello de Bueu para facer unha merecida homenaxe a José Solla con mesa debate posterior na que intervirán o propio pintor, Ramón en calidade de comisario da exposición retrospectiva 'Coplas de Cego' e Xose Leal, concelleiro de cultura de Bueu 🌊
Agardámosvos ás 20:00 no Centro Social do Mar!
'Santoalla' - tráiler
Cristina de la Torre, coprodutora de Santoalla, achegarase hoxe ao Cineclub Bueu para poñernos en contexto arredor do caso que centra o documental dirixido polos estadounidenses Andrew Becker e Daniel Mehrer. Se queres saber máis sobre o filme e sobre o crime acontecido na aldea ourensá que lle dá título, pásate ás 21 horas polo Centro Social do Mar para asistir á primeira proxección do ciclo Cinemas de Galicia, promovido por Agadic e o Concello de Bueu.
O día máis feliz na vida de Olli Mäki
"Filmada con elegancia en branco e negro, un filme áxil e cautivador". "Contemplativa, inspiradora... Olli Mäki é sobre todo unha historia de amor". "Unha pequena marabilla de impresionante destreza". Así é Hymyilevä mies / The Happiest Day in the Life of Olli Mäki, o próximo filme que veremos no Cineclub Bueu o vindeiro 6 de abril.
'Una vez fuimos salvajes' no Cineclub Bueu
Una vez fuimos salvajes é unha conversa imaxinada entre a autora e un barrio da periferia de Madrid. Un xogo constante entre formas e fondo, que enfronta os prexuízos da narradora coas emocións do espectador que a acompaña. Un percorrido libre e suxestivo que abandona de maneira progresiva o documental clásico para transformarse nun ensaio en primeira persoa.
Pozoamargo no Cineclub Bueu
Cando Jesús descobre que lle acaba de transmitir unha enfermidade venérea á súa muller embarazada, decide fuxir a Pozoamargo, unha pequena vila castelá cuxo nome reflicte á perfección o abismo vital no que se adentra. Se queres saber como remata a historia, achégate este venres a gozar do filme, coproducido pola galega Zeitun Films, nunha nova sesión de Cinemas de Galicia co Cineclub Bueu.
Rematada a Segunda Guerra Mundial, un grupo de prisioneiros de guerra alemáns, apenas uns rapaces, son capturados polo exército danés e forzados a afrontar unha arriscada tarefa: desactivar e retirar as minas que o propio exército xermano sementara ao longo da costa danesa. Mañá venres non faltes á proxección de Under sandet (Baixo a area), ás 21 horas no Centro Social do Mar, dentro do ciclo Cinemas de Galicia.
Velaiquí o trailer das seguintes proxeccións de Cinemas de Galicia no Concello de Bueu.
O vindeiro sábado 6 de maio, en pase único ás 21 horas, será a quenda de Cen anos de perdón.
Logo virán Os días afogados o venres 19 de maio e xa en xuño, no Cineclub Bueu pechamos a primeira fase deste ciclo con Psiconautas, os nenos esquecidos o sábado 3 e Siembra o venres 16.
Fai un ano no Cineclub Bueu tivemos a ocasión de ver a Óscar Martínez no papel de pai de Paulina en La patota. O actor arxentino, cunha longa carreira tamén no teatro, recolleu en Venecia a Copa Volpi ao mellor actor no pasado Venice Film Festival polo seu traballo en El ciudadano ilustre. Nela interpreta a un escritor arxentino gañador do Premio Nobel de Literatura, na realidade o galardón non recaeu antes na literatura arxentina, malia Jorge Luis Borges ou Julio Cortazar.
E se chove, que chova!!! Mañá darémosche bo acubillo no Cineclub Bueu e no menú tes Langosta... Que mellor plan que compartir un Sábado de Cine no Concello de Bueu? E se febreiro comeza con alerta vermella no mar, nós botámonos ao monte pra tinguir a pantalla de verde con En todas as mans ;) Velaquí o tráiler da que será a programación deste mes. Agardámoste!
Taxi Teherán
Para despedir este Nadal, propoñémoste acompañarnos este sábado na proxección de Taxi Teherán, gañadora do Oso de Ouro á mellor longametraxe e do Premio da Prensa Cinematográfica (FIPRESCI) na Berlinale 2015. O pase en versión dobrada será ás 19:30h, mentres que a versión orixinal subtitulada comezará ás 22:00h.
Tras dirixir os documentais 'Buena Vista Social Club (1999)' e 'Pina (2011)', Wim Wenders codirixe xunto a Juliano Ribeiro Salgado 'O Sal da Terra', filme que repasa a traxectoria vital e artística do fotógrafo Sebastião Salgado.
Sábados de Cine (Dec-Xan-Feb)
Trompos ao camiño!
E non só buxainas, pois lanzamos tamén o trailer co adianto da programación.
Que teñades un bo fin de semana e moita troula no S. Martiño!
