Non perdas o encontro con Teresa Portela organizado por Suevia Seguros coa colaboración de Carballo Deporte.
Mañá mércores, ás 19.00 h, teremos no Fórum Carballo á campioa do mundo e subcampioa olímpica, única atleta española que participou en sete xogos olímpicos, que falará de motivación, disciplina e paixón polo deporte coma os eixos da súa carreira na charla "Olímpica e galega", dirixida moi especialmente ás entidades deportivas.
Antes do acto, Teresa Portela será recibida polo alcalde de Carballo, Evencio Ferrero, na casa do concello.
Así se patina na gala de Nadal de Escola Lubiáns, con 160 participantes e o pavilón Carballo Calero cheo ata a bandeira. Se quedas con gana de máis podes seguir o espectáculo en directo na canle de YouTube do club.
O alcalde, Evencio Ferrero, asistiu ao acto de recepción da obra do novo campo de fútbol 8 do complexo deportivo das Eiroas, que permitirá dar resposta a elevada demanda existente. Este terceiro campo está unido aos outros dous para poder aproveitar os edificios e servizos cos que conta o complexo.
Dentro do mesmo proxecto incluíuse a substitución do céspede do campo de fútbol principal, que sufría un gran desgaste debido ao gran uso que ten, e porque ademais, segundo as bases reguladoras de normas de competición da Segunda RFEF, na que xoga o Bergantiños esta tempada, os partidos deben disputarse “nun terreo de xogo de herba natural ou artificial de última xeración, cunha antigüidade máxima de oito anos”, que son os que tiña o céspede das Eiroas.
Tamén se realizou a substitución do céspede no campo anexo. Deste xeito, os tres campos do complexo deportivo están nas mellores condicións para a práctica deportiva e adaptaranse á normativa da Federación de Fútbol.
As obras foron executadas pola empresa Vázquez y Reino cun investimento total próximo aos 800.000 euros.
Así está a esta hora o pavillón Vila de Noia, que acolle o xa tradicional Campionato de Nadal organizado polo Judo Club Bergantiños coa participación de 756 deportistas. Case nada!
Dúas novas sinaturas figuran desde hoxe no novo Libro de Honra do Deporte Carballés, que, como lembrou o alcalde, estreamos co centenario do Bergantiños e o 40° aniversario de Escola Lubiáns e Xiria. Evencio Ferrero, acompañado polo concelleiro de Deportes, Daniel Pérez, recibou hoxe aos multimedalistas Andrea Goimil e Gabriel Rodríguez Colferai, dous deportistas de élite dun club de referencia a nivel estatal como o Sysca. A gran familia do salvamento e socorrismo carballés acompañou aos galardoados, que amosaron a súa gratitude, destacaron o esforzo realizado e animaron aos máis novos a seguir levando con orgullo polas piscinas e praias de todo o mundo as cores do Sysca e o nome de Carballo.
Grazas, Andrea e Gabriel, por facernos sentir tanto orgullo 👏👏👏
O pavillón Calero experimenta unha profunda transformación grazas ao investimento que está a realizar o Concello de Carballo, que acada os 300.000 euros. Os resultados xa están á vista, como puideron comprobar o alcalde, Evencio Ferrero, e o concelleiro de Deportes, Daniel Pérez.
A actuación, que rematará nos vindeiros días, incluíu a renovación do pavimento dos 1.236 metros cadrados de superficie que ten o pavillón. O novo pavimento está especialmente deseñado para o adestramento e a competición de baloncesto, fútbol sala, balonmán, bádminton ou voleibol, así como para deportes sobre rodas, coma patinaxe ou hóckey.
Para facilitar a práctica deste último deporte, ademais, está a colocarse unha valla de protección fixa agás nun dos laterais, que conta cun sistema hidráulico que permitirá subila e baixala segundo as necesidades.
Se tedes 14 anos ou menos e xuntades un grupo de cinco amigos xa podedes participar nas #Pekeolimpíadas, dúas xornadas de xogos en equipo que se celebrarán os días 7 e 14 de agosto nas praias de Razo e Baldaio, e nas que contamos coa colaboración de Sysca para que desfrutedes coma nunca do verán no noso litoral. Anotádevos hoxe sen falta cubrindo o formulario que atoparedes en www.carballo.gal.
👉En que consistirán as Pekeolimpíadas?
Nunha carreira de obstáculos por equipos, na que teredes que chegar xuntos á meta, e nunha proba contra-reloxo da que sairá o equipo gañador dos nosos xogos olímpicos particulares.
👉Que tipo de obstáculos haberá?
Na proba de Razo teremos vigas de equilibrio, rede vertical, movemento de carga, paso de valos e paso polo túnel, nas que teredes que usar toda a vosa habilidade e demostrar a vosa capacidade para xogar en equipo.
👉E cales serán os xogos de habilidade?
Tamén haberá varios, como o de enterrar ao defunto, adiviñar un elemento típico de Carballo que deberá debuxar un dos membros do equipo ou a busca do tesouro.
Mola, non si? Pois o dito: se tedes 14 anos ou menos... bulide e anotádevos! Quedamos este mércores 7 para empezar a xogar de 10.30 a 13.30 horas na explanada de Razo.
#eu❤️Razo-Baldaio
Sysca Salvamento
O alcalde, Evencio Ferrero, ofreceu onte unha recepción dobre a Escola Lubiáns. Con motivo do 40° aniversario da fundación do club, o seu presidente, David García, asinou no Libro de Honra do Deporte Carballés, reservado para os grandes eventos e logros deportivos. Pero tamén foi protagonista o equipo benxamín, que vén de proclamarse campión galego.
Moitos parabéns e longa vida á Escola Lubiáns!
Mañá é o día!
1.786 deportistas de todas as idades participarán este ano na carreira popular 10k Carballo!
📢 Lembrade que hoxe, de 17.00 a 20.00 horas, seguiremos entregando dorsais no primeiro andar do mercado municipal.
Hoxe presentamos a 10k Carballo, que volve o 2 de xuño para converter as nosas rúas nun gran circuíto de atletismo.
O alcalde, Evencio Ferrero; o presidente da Federación Galega Atletismo, Iván Sanmartín; o técnico de deportes do Concello, Manuel Varela Bardanca; o presidente da ADFogar, Gustavo Álvarez, e os representantes de A.D. Mediaducia José García Gesto e Moncho Ríos deron a coñecer todos os detalles da carreira popular, que atoparás en www.carballo.gal.
Lembra que o prazo de inscrición está aberto ata o 29 de maio, e xa rondamos o milleiro de participantes entre todas as categorías.
Carballo é a sede da Final 4 de balonmán sénior nas categorías masculina e feminina, que se disputará os días 20 e 21 no pavillón Vila de Noia. Na categoría feminina haberá representación local, xa que o Xiria é un dos equipos que optan á fase de ascenso xunto con Cangas, Carballal e Lavadores. Na categoría masculina o espectáculo tamén está asegurado, xa que competirán O Grove, Atlético Guardés, Magope e Seis do Nadal.
O presidente da Federación Galega de Balonmán, Bruno López, estivo hoxe na casa do concello para presentar a competición, na que colaboran as Escolas Balonmán Xiria e o propio Concello de Carballo. O club carballés estivo representado no acto por José Antonio Rodríguez Fraga, vicepresidente primeiro; Sheila Ferreiro, xogadora, e Pablo Iglesias, responsable da área deportiva do club; en tanto que por parte do concello asistiron o concelleiro de Deporte, Daniel Pérez, e o alcalde, Evencio Ferrero.
Di o refrán que de ben nacidos é ser agradecidos, e hoxe o piloto carballés Francisco Jose Gomez Pallas quixo agradecer a colaboración do Concello de Carballo na súa última aventura no Dakar Rally facéndolle entrega ao alcalde duns agasallos moi, moi especiais: area do deserto e un cadro asinado. Evencio Ferrero amosouse moi agradecido e tamén orgulloso de que o nome de Carballo estea ligado a un evento que vai moito máis alá do deportivo e que ten repercusión en todo o mundo.
