Auditorio Municipal de Cedeira

24/04/2024

Auditorio Municipal de Cedeira
Sábado 4 de maio - 20.00H
Sarabela Teatro presenta:

MADE IN GALIZA
de Séchu Sende

SARABELA NO PAÍS DA LINGUA MÁIS DIFÍCIL DO MUNDO

Como quen se deixa roubar o seu tesouro máis prezado, a actitude das galegas e dos galegos respecto á súa lingua non "resistiría" nengunha análise. E será que o galego é a lingua máis difícil do mundo? E será que deberemos constituír unha oficina de palabras perdidas? Palabras perdidas, roubadas... Fronte ao "es que no me sale", "es que no se me da" "MADE IN GALIZA" é un convite á República Independente da túa língua. Non imos perdela nin en soños porque co galego imos "ao fin do mundo" e quen o proba o sabe!

Entrada: 2,5 € - Público adulto
Venda en taquilla o mesmo día desde media hora antes
Reserva anticipada desde o martes 30 de abril até o venres 3 de maio ás 14.00 h no whatsapp 649876614

24/04/2024

O próximo sábado 27 de abril desde as 19.30h. o alumnado das aulas de teatro de Cedeira, en colaboración coa Asociación Lugares Comúns, preséntanos a súa creación colectiva "Tempo".
Poderemos desfrutar tamén do grupo de música irlandesa/galega Ceilidhcia, e do alumnado da escola Violín Galicia.

10/04/2024

O próximo sábado 13 de abril ás 20.00h. contaremos con Tarabela Creativa que presentará a súa obra máis recente:
BOA SORTE - MALA FAMA

Un texto de Carmen Conde no que a voz, o corpo e a música colleran forma da man de Marina Peña, Nastasia Zürcher e Carmen Conde

Entrada 2,5€ - Público Adulto

Sinopse:
Sempre se soubo, claro está, que as anduriñas son aves de bo agoiro, que alí onde aniñan traen fortuna, que anuncian a primavera e que os mariñeiros as tatuaban na pel por cada travesía da que lograban retornar. Pouco se fala, en cambio, do molestas que se lle fan a moita xente co seu canto agudo e de que enchen todo de excrementos. Por iso estas aves dan boa sorte, pero teñen mala fama. Ningún outro animal se parece tanto aos emigrantes galegos: estamos en cada continente, vivimos facendo colonias, temos na cabeza o camiño de volta a casa e marchamos por necesidade. E, igual que as anduriñas, gañamos mala fama, aló onde fomos buscar a nosa boa sorte. Este espectáculo nace da necesidade de contar, precisamente, aquelo do que pouco se fala.

Trátase dunha traxicomedia en tres actos: Acto primeiro, os tratos; acto segundo, os maltratos e acto terceiro, os retratos. Nos que facendo unha cartografía e un percorrido a través de diferentes épocas e persoas se contará a historia máis “incómoda” da nosa emigración. Empregando para isto tres disciplinas: a narración oral (que será o fío condutor), a música ao vivo (que fará que o público se ubique naquelas outras realidades e sensacións que atravesamos) e na interpretación actoral (coa que se poñerá corpo ás palabras e coa que se traballará na metáfora do espello e do reflexo como leit motiv.) Tres mulleres en escena para representar cada unha dende a súa disciplina o rostro menos institucional da emigración galega

12/03/2024

O 23 de marzo ás 20.00h. o Auditorio Municipal de Cedeira acollerá un concerto homenaxe a Ricardo Freire a cargo da guitarrista Isabel Rei Samartim.
Neste concerto poderemos escoitar pezas compostas por Ricardo Freire, pezas clásicas con arranxos do homenaxeado así como outras pezas que Ricardo incluía no seu repertorio.
Contaremos coa presenza de Alicia Freire, filla de Ricardo, que nos falará deste gran artista cedeirés.

Ricardo Freire Blanco naceu en Cedeira o 29 de marzo de 1934.
O seu pai, que tocaba o bombardino na Banda Nova, morreu no naufraxio do Manchester cando Ricardo só tiña dous anos, e deixoulle en herdanza dúas paixóns e unha melancolía: a música, Cedeira e o mar. As tres conformaron para sempre o seu motor de vida.
Desde moi pequeno estudou solfexo con Eduardo Lourido “Pardela”. O seu talento innato como músico fixo que a súa nai, costureira de profesión, envorcárase na súa formación musical a pesar dos tempos difíciles que corrían.
En Cedeira tocou o redoblante na mesma Banda de Música á que pertencera o seu pai. Tamén aprendeu a tocar o bombardino que el lle deixou e, finalmente, grazas ao seu amigo Manolo Vergara, descubriu o instrumento ao que dedicaría o resto da súa vida: a guitarra.
En 1952 emigrou a Montevideo xunto á súa nai e os seus irmáns e alí decidiu facer a súa carreira de concertista profesional de guitarra clásica, recibíndose coa máxima nota no Conservatorio de música Ravel e sendo especialmente aplaudido por grandes guitarristas do momento, como Oyanguren, que lle augurou que lle daría un susto ao mundo.
Ricardo deu concertos en teatros e salas de Montevideo, impartiu clases no Conservatorio América e gravou anuncios publicitarios que se emitían no cinema e a televisión. Compuxo pezas dedicadas á súa muller Mabel, e varias transcricións e arranxos para guitarra. Tamén foi luthier, construíndo unhas guitarras de concerto de gran calidade baixo a marca CEDEIRA, lugar ao que finalmente logrou volver coa súa esposa e as súas fillas no ano 1974.
Morreu o 28 de marzo de 1998 sen coñecer o éxito profesional na súa propia terra.

Programa:
1) Prelúdio BWV 999 – Johann Sebastian Bach
2) Lágrima
3) Adelita
4) Recuerdos de la Alhambra – Francisco Tárrega
5) Lejania – A. Fleury (dedicada a Consuelo Mallo Lopez)
6) Mar – Maria Luisa Anido
7) O velho castelo – Modest Mussorgski / arr. Ricardo Freire Blanco
8 ) Spartacus – Aram Khachaturian / arr. Ricardo Freire Blanco
9) Prelúdio a Mabelita – Ricardo Freire Blanco
10) Mabelita (valsa) – Ricardo Freire Blanco

12/03/2024

12/03/2024

Auditorio Municipal - Sábado 16 de marzo ás 19.00h.
Entrada: 2,5€ - Público Familiar
Venda no mesmo auditorio desde unha hora antes.

É MEU AMIGO!
(LINGUA DE SIGNOS – LINGUA ORAL)

Despois de estrear o seu primeiro espectáculo xuntas en lingua de signos e lingua oral “Unhas lentes como as do avó”, Gema e Caxoto axiña entenderon que aquilo non ía quedar nun único proxecto. Segundo se sucedían os ensaios e representacións xurdían a cada momento novas ideas e novos enfoques á hora de conxugar estas dúas linguas nunha nova proposta escénica.

Con calma, tempo e moito probar e desbotar, xurde este novo espectáculo de escoita cas orellas e cas mans, que nos fala sobre a fraxilidade humana, pero tamén sobre a súa maior fortaleza…a amizade.

Gema era unha meniña cando coñeceu a Martiño e naquel intre soubo que a súa vida xa nunca sería igual. Martiño é un rapaz introvertido nun mundo demasiado exposto, pero aínda que lle abonde un recunchiño de parque para xogar, no seu maxín collen mil mundos, mil aventuras e algún que outro medo… Só quen teña o don da curiosidade e a ferramenta da empatía poderá adentrarse con el nunha aventura que case sen darse conta remate no máis alto do Everest.

Unha historia en lingua de signos e lingua oral sobre a amizade, a comunicación, os medos e a xestión emocional apta para todos os públicos.

20/02/2024

O vindeiro sábado 24 de febreiro, ás 19.00h. poderemos desfrutar de Raquel Queizás presentándonos o seu Cinema Marabillas.
Público familiar - Entrada: 2,5 €

22/01/2024

O CUARTETO DE TROMPAS Catro Cores presenta no Auditorio Municipal de Cedeira a obra "A trompa non só é cousa de elefantes". Un espectáculo musical e teatral para xs máis pequenxs, onde aprenden e descobren aos poucos a forma e os sons dun instrumento musical: a trompa.
As partes deste instrumento están agochadas no escenario e as instrumentistas terán que atopalas para poder facer música con el.
Finalmente, construirán a trompa e tocarán as cancións e melodías de diferentes pezas musicais nun concerto que estimula a vista e o ouvido, onde a trompa servirá para crear diferentes ambientes e movementos.

Entrada: 2,5 € - Público familiar
Venda en taquilla o mesmo día desde media hora antes
Reserva anticipada desde o martes 23 até o venres
26 de xaneiro ás 14.00 h no whatsapp 649876614

Obra incluída dentro da programación da Rede Cultural de Teatros e Auditorios, coa colaboración da AGADIC - Xunta de Galicia.