Es dát gein toeval is! Zit ich aan ù taofelke in Abtenau, liegk mich dao ù kùsse mit dea teks op! Ich waor RAM VAN SJLAAG, en begòs sjpontaan oos leedje te zinge! De luuj keke ù bietje raar op, mèhr al gauw dachte ze, laot heur mèhr, die wèt neet beater! Mèh dao houwe ze ùt mis, ich weit waal beater......vandaag nog neuge daag.....ich ving ùt toch ù bietje sjpannend weare....☺️
https://youtu.be/d5Nl6DlOGhs?si=6oZgIQmUKWk8lsEL
Nog 1,5 week tot de bekendmaking van de halve finalisten van het LVK.
Spannend.....
Vriedigaovend, op nao ùt Verentreffen in Landgraaf. Marleen Mols houw òs oetgenuàdig òm ù paar leedjes te kòmme zinge. Dat kòste v'r natuurlik neet aafsjlaon. Ùn parkeerplaatsj vinge waor neet zoeaa gemekkelik, ùt waor druk! Einmaol binne bie ùt Sjtreaperkruuts, kaome dich de veare al tègemoot; de carnavalsvùreniginge waore good vùrteagewoordig. En artieste natuurlijk! De sjtùmming zoot d'r good in! Veer hùbbe d'r nog ùnne sjùp baovenop gedaon, en veer lepe mit in de polonaise! Sjiek waor ùt, dat sjmak nao miëa! Ram van sjlaag zeen v'r, ùt waor alweer ins ùnne super aovend!! Dankie Marleen, dat veer d'rbie mochte zeen!!
Veer houwe gèt in de gate; Natascha en Ruud waore gèt aan ùt bekoksjtove. Kevin en ich houwe aafgesjroake om nèt te doon esof v'r nieks in de gate houwe, veer laote òs vùrrasse!
Enfin, de daag begòs mit ùn fotoreportage, want ja, veer mòtte good veur d'n daag kòmme, wille veer òs promote! Ùnne clip kint natuurlik auch neet ontbreake bie òs nuuje leedje, en houwe veer gelùk dat ùt wear mitzoot, kòste veer boete opnames make.
Nog effekes ùt leedje oefene, veurdat veer nao Gorissen in Brunssum vùrtrokke. Nog effe ù lekker hepke eate, en dan is ùt wachte tot ùt èlluf op ach is, dan begint ùt Broenssems leedje. Fans oet Deetere, Landgraaf, Brunssum en Hulsberg sjlaote zich bie òs aan, ùn gezellig clupke. Veurdat ùt zoeaawiét waor, woorte veer door Natascha en Ruud mit nao boete genòmme. Dao sjtinge Nicole en John ( de ouwesj van Kevin) oos op te wachte. Dat waor ún komplete vùrrassing veur òs. En dao kaom de vùrrassing oet de doeaas! Nicole en John houwe prachtige sjaals veur òs laote make! Wat is dit sjiek! Veer waore ram ònger de indrùk!
Wie trots en greuàtsj waore veer wie de ganse meute mit de sjaal in de lòch sjtònge wie veer mooste zinge! Veur òs kòs ùt neet miëa kapot!
Veer zint neet in de pries gevalle, mèhr veur oos geveul hùbbe v'r gewònne! Nao de oetsjlaag hùbbe v'r nog twieà leedjes gezònge. De tent sjting oppe kop! Veer hùbbe genaote, ùnne super sjoeaane daag gehad. Veur òs kint ùt neet miëa kapot!!
Paparamparampampam!
Ohhhh luujkes, wat vinge veer ùt sjpannend òm òs nuuje nummer te introdusere. Nog effekes gedùld, en mùssjien zeet geer dan auch nét zoeaa ram van sjlaag ès veer dat zeen! Nog effekes wachte....paparamparampampam!!
Ram van sjlaag zeen v'r! Aafgeloape woonsdig waore veer bie Marlstone òm bie ù "aafmikse" van òs nuuje leedje te zeen. Dat waor bès waal interessant òm dao bie te zeen. Dan dinks ste "hullep, kump dat nog good!" En ès dan oeteindelik alle sjpoare bie-ein kòmme, maog út resultaat d'r waal zeen! Sjiek, sjiek, sjiek, òs nuuje leedje is klaor!! Veer wille nog eave wachte veurdat v'r ùt leedje laote heuàre, mèh út kump draan! Dank aan ekerein van ùt koeaar, Isabelle, Roger, Maurice, Mariet, Janou, en zeker neet te vúrgeate òs management Natascha en Ruud. Die mòtte af en toe gek van òs weare, mèhr laote òs toch òzze gank gaon. Op zaoterdig 9 november doon v'r mit aan ùt Broenssems leedjeskonkoer. Eindelik òs nuuje leedje laote heuàre! Nog effe wachte.....😉
Ù bietje nerveus, dat waore v'r. Mèhr dat waor gauw veurbie, en waore veer op oos gemaak wie v'r kinnis houwe gemaak mit William, de geluidstechnicus. Enthousiast wie veer zeen ginge veer aan de sjlaag en sjtong de ieàsjte sjtum al gauw op band. Nog effe de twieàde sjtum, en wie dat klaor waor, waor ùt de beurt aan het koeaar. Ùt makde út ekstra biezònger dat ùt koeaar besjtong oet neet minder es De Geleinde ( wo ichzelf al dèks in ùt koeaar hùb mitgezònge), Mariet, mien nichsjke ( vreuger waore veer ùt zangdujo " De neafkes"), mien oudste dochter Janou en ( ùt lètste geneump, mèh nieks minder) Isabel ( de vrouw van Roger van De Geliende). Dat deeg òs good! Mèh van hun krege veer auch veul goei tips, dat makde ùt ECH biezònger!
Ùt leedje is klaor, klaor òm gemiks te weare. Dao zeen Kevin en ich volgende weak bie, en dan is ùt ech klaor! Hieàl veul dank aan ekerein die dizze aovend en de opname gesjlaag hùbbe gemaak! Noe aafwachte wat ùt eindresultaat is. Veer zeen benuujd!
Veer houwe d'r nao oetgekeke, de ieàsjte fanclub middig. De barbékjuu waor besjtèld, de drenksjkes waore ingekoch, veur òs kòs ùt beginne! Ùt zùnneke sjeen, wat kòste veer òs nog miëa wunsje! De sfeer waor super, de polonaise woord geloape. De sjtùmming zoot d'r good in! Ùt waor ùnne gesjlaagde daag, dea veur herhaling vatbaar is!
Dao zitte v'r dan, lekker in ùt zùnneke. Heerlik eate, ù keul pilske, en breensjtorme euver òs nuuje leedje. De demo is klaor, de teks is aaf, noe is ùt wachte op ùt eindresultaat. Veer zeen benuujd, en zeen erg enthousiast! Mèh, ùt weurd hasjtikke leuk!!
Vùrrassing! Veur opa en oma Louvenberg! Op zaoterdig, 27 april vierde deez' leef luuj hun 60 jaorig huwelijksfieàs. Opa houw al ieàder aan Kevin gevraog, of veer kòste zinge op hun fieàske es vùrrassing veur oma. Ich kòsj eigelik neet, mèh ich houw mien programma veur dea daag aangepas. Dat kòste v'r neet make, oetblinke van afwezigheid op dit fieàske. Veur ùt get sjpannender te make, en auch òm opa te vùrrasse, zachte v'r dat ùt optreaje neet door kòs gaon. Dan mooste v'r dat mèhr ùnne andere kieàr doon, zach opa. De vùrrassing waor ins zoeaa groeaat, wie v'r aafgeloape zaoterdig toch op ùt fieàske vursjene! Wat waor ùt sjiek. Opa en oma hùbbe genaote, en veer auch!!
De daag van ùt vastelaovendleedje; veer houwe gein verwachtinge, mèhr waore waal vol verwachting.
De ontvangs waor al leuk. Veer krege ùn naamkeartje en daonao sjting de koffie en vla klaor. In de foyer van de cultuurfabriek heesje de veurzitter van ùt LVK Joep Verburgt en Niek Dirkx òs welkom. Dat waor ùnne leuke aaftrap wo Niek op 'n ludieke wies al gèt tips goof. D'n daag koosj beginne! Es ieàsjte houw veer ùnne spieddeet mit Niek, dea òs talloze tips goof wie ste ù good carnavalsleedje kins sjrieve. Daonao volgde de wùrksjop bie Celine Gidding die òs in 'n oer tied sjtùmoefeninge goof. Gewapend mit kurk en rietje ginge veer aan de sjlaag. Dat weurd bubbele de kòmmende tied.
Auch aan de inwendige miensj waor gedach. Sop mit breuadjes woorte geserveerd en mit 'n good gevulde maag ginge veer nao de volgende wùrksjop. Rob Mennen wis op ùn komische en humoristische meneer de luuj aan zien lippe te kloestere! Bie de lètste wùrksjop ( helaas, mèhr aan alle goods kump 'n eind) krege veer tips en trics van Mat Verblakt, wie ste miëa oet ùn studio opname kins haole. Ekerein waor ein en al oeaar, want dat is ùt oeteindelikke produk es te ù leedje hùbs gemak.
Wat waor ùt ùnne leuke leerzame daag! Veul wiezer gewore. Veer gaon ùt toepasse op òs nuuje leedje. Nog effe gedùld, veer goont "aon de geng"!
Veer wiste 't nog neet.....wie gaont v'r ùt ùt volgend jaor aanpakke? Allein ù nuuj karnavalsleedje, of nog anger leedjes? Veer zeen d'r, dinkelik, oet! Ideeje genòg, veer goont langzaam " aon de geng"! Veer zitte neet sjtil, dat is auch mèhr good. Kiek nao oos filmpke, dan heuàrt g'r van oos planne. Laot ùch vùrrasse......
