23/12/2023
Liuwehert – Mearke Winsum 2023
“Do oerwinst dysels, kinst safolle mear dan ast tinkst...” Sa wurdt songen yn it slotliet fan it mearke. In moaie gearfetting fan de les dy't yn it ferhaal, oer de bruorrenleafde tusken Krommel en Jonathan, oan it publyk oerbrocht wurdt.
Ferhaal.
In fertelling wêryn it publyk de bruorren kennen leart as twa hiel ferskillende persoanen. De ien syklik en eangstich, de oare sterk en moedich. Beide komme nei harren dea yn Nangiala telânne, wêr't hja ûntdekke dat der in dúdlik ferskil is tusken de 'kersedelling' en de 'brombeidelling'. Yn it earste gebiet is it fleurich en moai, yn it oare gebiet terrorisearret de kwea-aardige Tengil de boel, tegearre mei har draak Katla.
Wie it earst Jonathan dy't syn broerke út in brân rêde troch mei him op syn rêch út it rút te springen, oan de ein hat de deabenaude Krommel al syn moed en hope by inoar garre om syn eangst te oerwinnen en syn ferwûne rekke grutte broer op de rêch te nimmen en de sprong yn de ôfgrûn te weagjen.... “Ik doar it net, mar ik wol it wol!”, sa seit hy noch.
Údagings.
Om dit ferhaal sa goed mooglik oer it fuotljocht te bringen wiene der ferskate útdagings. Sa moasten der yn koarte tiid in soad ferskillende lokaasjes en sitewaasje dúdlik makke wurde: útstrekte gersfjilden, in hege wetterfal, in tsjustere grot, mar ek in brân, in spannend swurdgefjocht, ûnderierdske gongen. Foar de dekôrbouwers (en -skilders) in skitterend putsje. Ûndertusken wie de technyk drok dwaande de wetterfal écht streame te litten mei écht wetter (mei de nedige kopsoargen oer in lekkende opfangbak), waard der in konstruksje betocht om in do écht troch de seal fleane litte te kinnen en tagelikertiid wiene de spilers drok mei de rol, de sang en de dûns.
Foarstellings.
En dan, as ek alle omballings – fan rekwisiten oan't klean, fan sealyndieling oan't grime, fan kaartferkeap oan't ranja skinke – regele binne kin de spylwike útein sette. In wike lang wille fan en foar de spilers foar mar leafst tritich skoallen út hiel Fryslân en nochris fiif iepenbiere foarstellings. Sân dagen, alve foarstellings, fjouwerentweintichhûndert besikers én talleaze kearen de namme “Hubert” troch de seal roppen (ofwol troch ús publyksleaveling sels ofwol troch de 'fans'). Grutte tank oan alle frijwilligers, ferantwurdlik foar it 'liuwendiel' fan al it wurk foar en efter de skermen,en hiel graach oan't yn 2024! HV.
📸: Klaas Tolsma
