21/05/2024
Celebert besøk i Krokpollen !
For ein flott dag, for ein flott gjeng, og for eit celebert besøk.
Dette hadde vi gleda oss til lenge.
Det var ikkje Harald og Sonja som kom, men Breim pensjonistlag. 37 menn og kvinner.
Dei er celebre gjester fordi dei har greidd sjølve livet, med jobb, slit, og utfordringar - og dei har klart seg godt.
Visdom og klokskap kjem mest med livserfaring, ikkje kunnskap åleine. Dette er ei gruppe som fortener stor respekt.
I tillegg var dette Breimningar. Sambygdingar. Det er ekstra stas for oss, som er Gloppen sin vestlegaste utpost, så meir celebert blir det ikkje.
Nokre skavankar har det blitt opp gjennom åra, og litt hjelpemiddel er teke i bruk for nokre av dei.
Trekkfoten, bakfoten, eller siste foten over båtripa, var ei utfordring for nokre, men det er ikkje sikkert Karsten Warholm vil gjere det betre når han kjem opp i 70 og 80-åra.
I Krokpollen fekk dei informasjon om korleis, kvifor, og kva staden vert brukt til. Kvifor ein Breimning hamna der. Om historia og fortida til Krokpollen, om prinsippet om å invitere framfor å privatisere, og om Krokpollen som eit allmenn-nyttig formål, i privat regi.
Krokpollen som naturperle og idyll, som arena for terapi, eller som arena for full trøkk, sa vi ingenting om. Det opplevde dei sjølve, og forstod og tenkte nok dei djupare verdiane av Krokpollen kvar for seg.
Etter Britt si fiskesuppe, og eit flott bordsete, vart det båttur til Rugsund handelsstad, gjennom sjølve Rugsundet, og til brua med 15 meters høgd. Vi har mastetoppen 22 meter over vannlina, og fann det derfor tryggast å snu, så vi ikkje skada brua...
10 stk reiste med hurtiggåande båt, og fekk ein tur innunder Europas høgste havklippe, Hornelen, som ragar 860 meter over havet. "Heksa i Hornelen", og det nye via- ferrata-tilbodet, fekk ein i nært augesyn.
Kjekt å høyre Breimningane diskutere kvar Gudrun, Hildur, og Magne Strømmen kom i frå. Kvar er Olsbø ? Svigerinna til Oddlaug Gåsemyr, kom frå Gåsemyr, og budde der.
Noregs eldste handelsstad (Rugsund, dokumentert handel frå 1200-talet), dronning Ingerid av Noreg sin drapsstad, kyrkjegarden ved handelsstaden og kyrkja som brann ned der, er alt med i vår guiding-informasjon. Og litt om Olav Trygvasson og Vingen-feltet. Det er så mykje norsk historie rundt Rugsundøy, at når vi sender folk frå Oslo heim igjen, er dei overbevist om at no forlet dei Noreg.
Kake og kaffi, lutret musikk, og allsang etter leirskulemodellen vår; "langt over grensa", var med på dagens program.
Vi henta Breims-pensjonistane med minibussar på morgonen, og køyrde dei heim til Breim på kvelden. Firda Billag og VY, har ein lang veg å gå i høve service ombord, dersom dei skal matche Norsk kystleir. Makan til servering, frå bakluka på caravellen ombord i ferja, er vanskeleg å slå.
Ein skal no ha det litt kjekt i dette livet... og folk over 66 kan gjere som dei vil, i følge Wenche Myhre.
Vonar Breim pensjonistlag fekk ein dag for minneboka. Mange klemmar, handtrykk og nokre gledestårer, gav oss ein god følelse.
Tusen takk for besøket !
Dette var stort for oss, som er Breimningar i eksil halve året.
Vertskap var Thobias (barnebarn), Britt og Magnus Willumsen, Roar (son), og Elin Finstad (som kom frå Bergen).
Bli gjerne med på denne bilet-reisa.
Ps: Med plastpose i handa skulle underteikna rydde minibussen for pappkrus og boss i går kveld. Ingenting. INGENTING ! Ikkje eit einaste boss ! Heilt sterilt.
Fekk ungdomen med seg denne informasjonen ?
