25/03/2018
Al-xamdulillaah Eebbow adaan kuu addoon nahaye,
Udgoonow rasuulkayagu waa imaamu towxiide,
Ixtaajadiyo amalkaan qabnana waad ogsoon tahaye,
Umuuraha adkaadoo qalbiga ololiyoo shiila,
Axad kale ma aadnee adaan kula abbaaraaye,
Arkaaan iyo shuruudbaan ducada ku isticmaallaaye,
Awaamiirti Nabi Muxammad baan ku Alle tuugnaaye,
Istiqbaalka xaramkaan wajiga ku itijaahnaaye,
Calaacalo addoon baan godnaa oo itaal darane,
Istiftaaxa ducadaan xamdiga ka ambaqaadnaaye,
Udgoonow rasuukaan salligi ku ikhtitaamnaaye,
Afkana waxaan ka dhawraa xaraam aan ogsoonahaye,
Ikhlaas iyo waxdaaniyana waan ku ad adkeynaaye,
Ilxaax duciyo owraadsigiyo ooyintiyo taaha,
Awqaadda saxarkaan baryada ka istifiidnaaye,
Isha waaga waxaan ugu sinnaa duciyo aamiine,
Goortaan ilmada seyrinaa nala ajiibaaye,
Ismullaahi cadamkaan kurbada uga adkaanaaye,
Ishaan mirig ka siinaa intaan uurka ka hinraagno,
Asmaa’ul xusnahaagaan Rabbiyow kugu ilxaaxnaaye,
Ixtaajadeena axad kale ma gudo adiga mooyaane,
Ictiraafnay Eebbow dembigi aafadaan dhigaye,
Abaartiyo colaaddiina waa nagu adkaadeene,
Mana aaminsanin axad kaloo oonka naga gooya,
Goortaan ilxaax kugu baryoon Eebbow ku cataabo,
Oo aan ilmada seyriyoon uurka ka hinraago,
Ixsaankiyo fadligaan kaa bartaan Eebbow kaa sugiye,
Sidii la arki jiray waa inaan ka istafiidnaaye,
Aqbal suge il mirigleynayoo oomman baan ahaye,
Arxamu Raaximiinow korbaan eegayaa weliye,
Ixtaajadiyo amalkaan qabnana waad ogsoon tahaye,
Abaartiyo colaaddiina waa nagu adkaadeene,
Haddii Geel itaal dhigay Lo’ina oon ula’aneyso,
Oo Idihii duufeen Riyana xaabki ka idlaaday,
Oo Carabi aaney iibsaneyn Ariga noo jooga,
Afkana aaney la aadeyn ilmuhu Hooyo ibaheeda,
Afartiba haddey guran yihiin beledna aafoobay,
Oo ceelki laga oomayoo dhaanki ku asqoobay,
Oo webigi oomane yahoo keli abaaroobay,
Oo aanan aqoon bad u laheyn Eebbahey magane,
Illaahow il miriglaan nahaye dhibic aan aafoobin,
Illaahow daruuro idmanoo aaran iyo doogle,
Allow ciirta Owrkiyo Fardaha alalax loo siiyo,
Illaahow hilaac soo ifiyo karar udgoonaata,
Illaahow abaaraha na helay roobaan ku illoowno,
Allow ruhu awaacleeyo oo aamus laga waayo,
Illaahow balligu aafta dhigoo ubadku tuur tuuro,
Illoow ceeshi laga oomanaa xaafku ila duugo,
Illaahayow daad ood sidoo uburka seyraaya,
Oo aan ilmaha nagala tegin Ariganaan qaadin,
Oo owra daaqeenka iyo mare araareenka,
Allow roobaan waayahan la arag aafana aan reebin,
Allow maqashu orod iyo durduro reerka ku ekeyso,
Allow subagu iib waayo oo keydka ku aruuro,
Illaahow isugu keen ekee aarankiyo doonka,
Allow S**o insaarixinayiyo Weylo ku ordaaya,
Allow Ari intuu ubax dhex maray udugna saameeyey,
Isha raaxadeediyo Allow waa nimco adduune,
Indho u roon Illaahow na sii aaran iyo doogle,
Allow beertu noo aarantoo iba mataaneyso,
Illaahow abuur iyo sabuul aafo ha u yeelin,
Allow dibadda iib loogu dhigo sannadka soo aaddan,
Amniyo roob Illaahow ugu deeq ahlu towxiidka,
Abaartiyo colaadahana gee banu-Israa’iilka,
Allow khoofka naga aaminyeel oo rajada aaddi,
Aqbal iyo ijaabana ka yeel Eebbow ducadeena,
