01/02/2023
Sot, në 20 vjetorin e ndarjes nga jeta, Teatri Profesionist i Qytetit “Istref Begolli”, e përkujton ikonën e artit të skenës dhe filmit, Istref Begolli.
Istref Begolli u lind më 07.05.1933 në Pejë. Shkollën fillore dhe gjysmë-maturën e kreu në vendlindje. Prej moshës 16 vjeçare (1949) fillon punën si Aktor i rregullt i Teatrit Popullor Krahinor (TPK), të asaj kohe, deri në vitin 1961. Prej vitit 1961 deri në vitin 1963 punon në Teatrin Jugosllav të Dramës, në Beograd si bashkëpunëtor i jashtëm ku ushtron studentën në lëndën e Diksionit. Pas tri viteve punë kthehet përsëri në “TPK” të Kosovës (Tani Teatri Kombëtar) ku punon deri në vitin 1968. Nga ky vit (1968), deri me 1971 vepron si aktor i lirë. Më 1971 fillon të punojë përsëri në “TPK” gjerë me 1990, ku edhe pensionohet si aktor i këtij Teatri.
Repertoari i interpretimeve të tij përfshin një univers të tërë personazhesh nga dramaturgjia kombëtare dhe ajo botërore, rreth 150 role në Teatër, Film dhe Televizion.
Disa nga rolet kryesore në Shfaqjet janë: Mihali në shfaqjen “Zhelanat” e Matej Borit, në regji të Abdurrahman Shalës, Dhëndrri dhe Meriku në “Dasma” dhe “Hani në rrugën kryesore” të Çehovit, me regjisor Muharrem Qenën, Karl Fon Mori në “Cubat” e Shilerit, me regji të A. Shalës, Plaku i Parë në “Erveheja” e Ahmet Qirezit, me regji të Muharrem Qenës, Dyl Mehmeti në “Fosilet” e Azem Shkrelit, Paratovi në “Vajza pa Pajë” e Ostrovskit, Prifti në “Gjenerali i Ushtrisë së Vdekur” i Ismail Kadaresë, në regji të Piromanit, Murtaja në “Shtetrrethimin” e Kamysë, në regji të T. Durbeshiqit, Iago në “Othello” të Shekspirit, me regji të A. Shalës, Magbethi në “Magbethi” të Shekspirit, në regji të Zhorzh Paros, Kabili në “Sfinga e gjallë” e Rexhep Qosjes, me regji të L. Giorgievskit, Agamemnoni në “Ifigjenia në Aulidë” e Euripidit, në regji të Fadil Hysajt, Kadmos ne “Bakhet” e Euripidit, në regji të Vllada Milqinit, Ahmet Nuredini në “Dervishi dhe vdekja” i Mesha Selimoviqit, me regjisor V. Milqini, Lojtari në “Bregu i pikëllimit” i Teki Dervish*t, me regjisor V. Milqini, Plaku ne “Shpend Sokoli i Sokol Shpendit” nga Ymer Shkrelit, me regjisor Isa Qosja, etj.
Ndër rolet më eminente të luajtur në më se 20 Filma artistik hyjn padyshim: i Pavie Shatev në filmin “Atentatorët e Selanikut” i Zhika Mitroviqit, Deliu në “Era dhe Lisi” i Besim Sahatqiut, Prifti në “Proka” nga Isa Qosja, Fatmir Gashi ne "Përroi Vërshues" i Besim Sahatqiut, Polici në “Si të vdiset” i M. Stamenkoviqit, Otos në “Sulmi i kuq” i Predrag Golluboviq, Trobërku në “Mali i Leiejit” i Zdravko Velimiroviqit, etj.
Nga rolet në Filmat Televiziv duhet veçuar: Plaku në “Të ngujuarit” me skenar dhe regji të Ekrem Kryeziut, Kostë Kasapi në “Kulla”, sipas Anton Pashkut e në regji të Agim Sopit, Inspektori në “Dhembja krenare”të Ismail Ymerit, Kabili në “Vallja e Çmendur” me skenar dhe regji nga Isa Qosja, Ati në “Vjeshtën e Trëndafilave”, me skenar të Veli Karahodës e në regji të Agim Sopit, etj.
Istref Begolli është fitues i shumë shpërblimeve, prej tyre duhet cekur patjetër: Në takimet “Joakim Vujiq” të mbajtura në Titovo Uzhicë, merr shpërblimin e parë për rolin e Dyl Mehmetit në shfaqjen “Fosilet”, dramë e Azem Shkrelit. Me 1973, në Kosovë, merr Shpërblimin e Dhjetorit për veprimtari të frytshme në lëmin e Teatrit dhe Filmit (Ishte i vetmi në Kosovë që mbante Shpërblimin e Dhjetorit nga fusha e artit skenik). Po më 1973, në Takimet Teatrore “Joakim Vujiq” të mbajtura në Kragujevc merr vendin e parë për rolin e Priftit në shfaqjen “Gjenerali i Ushtrisë së Vdekur” të Ismail Kadaresë. Më 1978, në Festivalin e Teatrove MES të Sarajevës merr shpërblimin “Kurora e Artë e Dafinës” për rolin e Kabilit në ”Sfinga e gjallë”, dramë nga Rexhep Qosja. Më 1985 në Novi Sad merr shpërblimin e Sterijes për rolin e Babelit në shfaqjen “Konfiteori” etj.
Istref Begolli ndërroi jetë tragjikisht një ditë acari në spitalin e Krapinske Toplices në Republikën Kroacisë dhe u varros më 1 shkurt të vitit 2003 në Prishtinë.
Ai i takon plejadës të aktorëve që vunë themelet e Artit Skenik në Kosovë. Dekada me radhë mbetet ikonë e Teatrit, andaj edhe Teatri ynë me nderë dhe krenari mbanë emrin “Istref Begolli”, në vendlindjen e tij të cilën aq shumë e deshi!
