11/06/2026
Mbrëmë, në përmbylljen e Edicionit të 16-të të Chopin Piano Fest Prishtina, një ëndërr e jona e kahmotshme u realizua: ta kemi mysafir në skenën tonë legjendën e pianizmit botëror, pianistin dhe kompozitorin e famshëm turk, Fazıl Say.
Ishte kënaqësi e madhe që koncerti u realizua në bashkëpunimin tonë tradicional me Filharmonia e Kosovës, nën udhëheqjen e dirigjentit francez Aurélien Azan Zielinski.
Në sallën e stërmbushur me publikun muzikëdashës, gjatë performancës së FAZIL SAY u krijua një atmosferë magjike, me madhështinë e interpretimit unik të Koncertit të tij autorial për piano dhe orkestër “Mother Earth”, duke na përcjellë emocione të fuqishme dhe duke krijuar një përjetim artistik të rrallë. Përmes kësaj vepre, publiku pati mundësinë të përjetojë edhe premierën kombëtare të saj, një krijim që i kushton homazh bukurisë dhe brishtësisë së planetit tonë. Në vazhdim të koncertit, në mënyrë bravuroze u interpretua Simfonia monumentale nr. 5 e D. Shostakovich.
Së bashku, këto vepra krijuan një finale dinjitoze dhe mbresëlënëse për festivalin e këtij viti. Mirënjohje e veçantë për Ambasadën e Turqisë në Kosovë 🇹🇷, e cila na dha mbështetje të fuqishme dhe ndihmë të madhe në realizimin e këtij eventi të rëndësishëm.
Notat e fundit të këtij koncerti nuk shënuan vetëm fundin e tij, por edhe mbylljen e një muaji të tërë kushtuar muzikës, shkëmbimit artistik dhe përvojave të përbashkëta.
Shprehim mirënjohjen tonë të thellë për të gjithë artistët, partnerët, mbështetësit, vullnetarët dhe publikun që na u bashkuan përgjatë këtij rrugëtimi.
Faleminderit që ish*t pjesë e edicionit të 16-të të Chopin Piano Fest Prishtina.
Deri në takimin tonë të radhës përmes muzikës 🎹❤️
