13/10/2021
KARAKTERBOU
Deur: Lente Swift
My 6 jarige se ogies is groot. Sy karring aan haar leotard, wil alweer piepie en die eyeshadow se poeier brand haar oë.
Dis haar eerste danskompetisie.
Haar eerste kennismaking met spanning.
Haar eerste konfrontasie met prestasie, met geweeg word en wonder of jy goed genoeg is.
My hart pyn by voorbaat.
Ek hou spasie, ek pep talk en sy reguleer ál haar nuwe emosies deur my.
Ek wil vir haar sê:
“Nee, moenie jouself blootstel nie, moenie alleen op ‘n verhoog uitstap sodat ‘n vreemdeling in die donker jou kan oordeel nie. Bly hier by my, dis warm en veilig.”
Maar karakter word immers nie gebou op jou mamma se skoot nie. En die grootste vreugde, oorwinning en vervulling lê aan die ander kant van die groot “waag”.
So wat ek wel sê is:
“Jy is die dapperste dogtertjie wat ek ken en daar is niks wat jy kan doen wat my meer lief kan maak vir jou nie. Ek is trots op jou omdat jy probeer, nie omdat jy wen nie.”
“Blom! Lag vir my van die verhoog af!” skree ek toe sy wegstap.
🤸🏼♀️🤸🏼♀️🤸🏼♀️
Die musiek speel, sy hardloop op, begin dáns … en vries. Die sekondewyser staan stil terwyl sy my in die gehoor soek. Sy glimlag toe sy my vind en my hewige handeklap breek die vries. Sy hardloop af en storm snikkend in my wagtende arms in.
“Was ek goed, Mamma?
“Jy het onthou om te glimlag, Blom, en toe kom die son op. Dit was my favourite deel, toe jy jouself gewen het.”
Na baie drukkies, sweet nothings, ‘n groepsdans en sagmoedige beoordelaars, het sy 2 medaljes om haar nek. Maar sy het nie ‘n trofee nie, en sy wéét sy het haar dansie vergeet.
In die kar gesels ons oor harde werk en oefen om die beste te wees. Maar ook oor wat wen in jou eie hartjie en braaf wees net vir jouself beteken.
Later in die bad sê sy: “Mamma, ek is trots op myself en ook op my lyfie.”
Nou huil ék, want ek is doodmoeg en nie opgewasse vir hierdie nuwe fase waar my kindertjies karakter moet bou nie. ♥️
🤸🏼♀️🤸🏼♀️🤸🏼♀️
So: Liewe mens, in hierdie onsigbare stryd wat groot en klein voer, hoop ek jy is ook trots op jóúself en jóú lyf. Júís op die dae wat jou oorwinning in die guts om te probeer, lê.
En laat mense toe, sodat iemand vir jou met oop arms kan wag … ongeag.
♥️
Die Naguilklub
Lente, Suzanne en Juanli
‼️ Deel gerus met die mense in jou wêreld wat die guts het om te waag, en ál die wat miskien ook effe oorweldig voel met hul kindertjies se karakter bouery.
