Fjelljomfestivalen

01/10/2023

Bolstadprisen 2023 gjekk til Hannah Moira Midtbø-Bruner!

Her er grunngjevinga for prisen:
Bolstadprisen er ei vidareføring av Emil Bolstads legat og skal vere ein stimulans til unge som fører vidare tradisjonane innan folkemusikk og/eller folkedans. Då legatet vart avslutta og Bolstadprisen oppretta i staden, vart og det geografiske området for tildeling utvida frå Stryn til å gjelde heile landet. Det er styret i Spelemannslaget Fjelljom som har ansvar for prisen.

Dei kjende Bolstad-spelemennene hadde interesse både for det klassiske og det tradisjonelle felespelet. Prisvinnaren i år er såleis ein fulltreffar, sidan ho har hatt eit bein i begge sjangrane, men med hovudvekt på folkemusikken og med hardingfela som hovudinstrument på musikklina på vidaregåande skule. Ho er 19 år, kjem frå Valestrand, Osterøy, og er aktiv både i BUL Ervingen i Bergen og i Osterøy Spel og Dansarlag som gjekk heilt til topps i lagspel på Landskappleiken i sommar. Hannah Moira tok i 2022 heim sigeren i yngste klasse hardingfele frå Landskappleiken i Rjukan der det var ekstra stor konkurranse sidan fyrstepremien var ei ærverdig hardingfele laga av sjølvaste Knut Eilevsen Steinkjøndalen.

På Osterøy har i mange år vore eit aktivt folkemusikkmiljø. Hannah Moira var tidleg inspirert av storesyskena sine og starta i kulturskulen allereie medan ho gjekk i barnehagen, og i 2009 deltok ho på sitt fyrste kurs med Jon Jelmert som var ein inspirator og lærar for unge spirar. Han gjekk bort så altfor tidleg, men verknaden av innsatsen hans syner framleis. Kvar veke køyrde foreldra henne til Lonevåg der ho hadde speletime med Håkon Høgemo. Ho var fire og eit halvt år då ho møtte Håkon Høgemo for fyrste gong. Han har betydd utruleg mykje for henne og er definitivt den spelemannen ho har lært mest av. Eit par år tok ho også timar med Maria Toppe, og lærde mykje av henne. Framleis spelar ho med Håkon. Han motiverer og pusher ho til å prøve nye sjangrar. Han utfordrar henne til å tenke cross-over, til å høyre på klassisk musikk og ny musikk, ikkje berre tradisjonsmusikk. Musikkinteressa har blitt større og større med åra, og i dag vil ho kalle seg folkemusikk-nerd. Ho ser fram til å studere folkemusikk, og få ei endå betre forståing for denne flotte tradisjonsmusikken.

I mange år har ho kvar sommar delteke på Sommarskulen på Halsnøy, og spelt fiolin i symfoniorkesteret der.
Hannah Moira er halvt canadisk, og canadisk folkemusikk har vore og er viktig for henne. Så i tillegg til hardingfela, har ho også spelt mykje på den vanlege fela si, som ho arva etter «grandpa»/bestefar i Canada. Ho starta tidleg med undervisning og hadde kvar veke timar med den kjende canadiske Patti Kusturok via Skype. Patti har utfordra henne både teknisk og musikalsk og har motivert Hannah Moira til å våge å tevle i Canada, der ho og har vunne.

I 2022 fekk ho ein makelaus telefon frå Andreas Skeie Ljones på Riksscenen. Han spurde om ho ville vere med i eit prosjekt, Folk Session, der dei skulle hjelpe deltakarane i prosjektet til å få ei betre forståing for gammaldansmusikken. Og for eit år det vart! Ho fekk danna si eiga folkemusikkgruppe: Godlynt, der dei jobbar med arrangering og finn sin eigen måte å presentere musikken på. Gruppa har hatt ei fantastisk tid med konsertar i fleng, deltaking på Førdefestivalen og skal i november delta med showcase under Folkelarm i Oslo.

Hannah Moira likar godt å komponere nye slåttar. Ho seier sjølv at ho er utruleg heldig som får vere ein del av dette fantastiske folkemusikkmiljøet. Og vi i styret for Bolstadprisen er heldige som har ein så verdig vinnar vi kan dele ut 20 000 kroner til.
Hjarteleg til lukke med prisen og folkemusikken vidare i livet!

Foto: Peder Verlo

17/09/2023

Fjelljomfestivalen har som vanleg gode og gratis inspirasjonskurs for unge spelarar på fele og hardingfele. I år har vi fått fjorårsvinnaren av yngste klasse hardingfele på Landskappleiken som inspirator og kurslærar. Ho heiter Hannah Moira Midtbø-Bruner og kjem frå Valestrandsfossen ved Bergen. I vår hadde ho ein strålande eksamenskonsert på hardingfele på musikklina i vidaregåande skule, og i nokre år no framover er ho student på Norges musikkhøgskule. Derifrå har vi og henta kurslæraren for dei unge som spelar vanleg fele. Åsmund Farstad spelte seg opp i A-klassen på Landskappleiken og har allereie ei lang merittliste å syne til. No er han i gang med andre året på Norges musikkhøgskule. Åsmund kjem frå Volda og har i mange år vore medlem i Spelemannslaget Fjelljom.
Dei korte inspirasjonskursa vert på Fjelli laurdag 30. september kl 1100 og fram til lunsj kl 1300. Kl 1400 er alle kursdeltakarane (og andre) velkomne til lærarkonserten, og kl 1500 startar nye kurs i trekkspel, hardingfele for vidarekomne og halling. Vi vil råde til at alle dei unge spelarane på fele og hardingfele slår seg med på dansekurset i halling med Ånund Myhren som lærar. Alle under 20 år får gratis kurs, konsertar, lunsj og middag.
Treng du overnatting, så ordnar vi det. Eit feriehus med mange rom og senger er reservert.
Påmelding og evt spørsmål tek du på epost til [email protected] eller tlf 48226994.

09/09/2023

Ånund Myhren er ein ung kar frå Oslo som har synt stort talent innan folkemusikk og dans. Han var kurslærar i hallingdans på Fjelljomfestivalen i fjor, og det gjorde han med slik overtyding at vi gjerne ville ha han att i år for å gje ny inspirasjon. På Ole Bull Akademiet har Ånund hatt munnharpa som hovudinstrument. I år har vi difor hyra han inn til å halde eit lite inspirasjonskurs nettopp på munnharpa. Vi stiller ingen krav til førehandskunnskap hos deltakarane. Ånund har i det siste brukt tid på å studere metode og opplegg for kurs i munnharpe, så vi håpar på mange interesserte som vil prøve dette vesle instrumentet som er lett å ta med seg i lommen, i ryggsekken eller i bilen slik at tida kan nyttast effektivt om du må vente på ei ferje.
Munnharpekurset er laurdag 30.9. kl 1100 – 1245 i ungdomshuset Fjellvarden på Fjelli.
Hallingkurset er laurdag 30.9. kl 1500 – 1745 i ungdomshuset Frendehall på Blakset.
Kursavgift: Alle under 20 år gratis. Dei over 20 år kr 150,-
Påmelding til tlf 48151317 eller epost [email protected]

04/09/2023

Songkurs på Fjelljomfestivalen:
Elin Grytting har lang fartstid som fylkesmusikar med folkesongen som hovudfelt. No er ho pensjonist, men vi vil gjerne gjere oss nytte av hennar rike kunnskap. Det er vel ingen songarar i vårt distrikt som vert fornærma om vi seier at Elin er den som i dag sit inne med størst oversyn over dei folkelege songtradisjonane våre.

Songen har alltid hatt plass på Fjelljomfestivalen sitt program. Denne gongen vil vi setje fokus på barnesongane. Då ynskjer vi fyrst og fremst å få formidla dei gode songane til peronale i barnehagane, til besteforeldre og til foreldre som bør ha gode songar til borna. I tida før festivalen vil og eit par barnehagar få besøk av Elin, slik at både borna og personalet får lyst til å dyrke vidare denne rike kulturarven vår.

Alle kursa på Fjelljomfestivalen er lagt opp som korte inspirasjonskurs som ikkje legg beslag på for mykje av fritida på ein laurdag. Alle kursa finn stad på Fjelli laurdag 30. september. Songkurset vert i Galleri Ad Fontes sine lokale på butikkloftet frå kl 1100 og eit par timar utover.

Deltakaravgifta er berre kr 150,-. Dei under 20 år går gratis. Meld deg på til tlf 48151317 eller på epost til [email protected].

22/08/2023

Helga 29.-30. september er det klart for Fjelljomfestivalen 2023 med eit rikhaldigt konsert og kurstilbod!

28/09/2022

Slåttar og tonestykkje av Anders Viken på Fjelljomfestivalen

Gitaristen Øyvind Lyslo og felespelaren Arne M. Sølvberg møttest til samspel fyrste gongen i 1989. Vel eit år seinare vart dei nominerte til Spellemannprisen for plata «Syngande strenger». Sidan har det vorte turne for Rikskonsertane og andre konsertoppdrag. Jølstringen Anders Viken (1898 – 1977) sine komposisjonar har dei siste åra gjeve ny glød i samspelet og resulterte i ein ny CD som kom i fjor og har fått mykje rosande omtale. Felespelaren Anders Viken hadde eit stort spenn i sine over 500 komposisjonar, frå sprudlande polka og reinlendar til lyriske tonestykkje. Jølstrabrura, Huldresølvet og Brulandsvalsen vart landskjende ved Sigbjørn Bernhoft Osa sine innspelingar som vart flittig spelte i radioen for 50 – 60 år sidan. Øyvind og Arne har henta fram i lyset både slike og mange ukjende komposisjonar frå Anders Viken sine handskrivne notar.
Utruleg nok har duoen aldri halde eigen konsert i Arne si heimbygd i løpet av desse 33 åra, men komande laurdag midt på dagen skjer det endeleg ved at dei held ein av konsertane på Fjelljomfestivalen. Då vert det både solo og samspel. Det kan nemnast at den topp utdanna klassiske gitaristen frå Sandane har flytta eit par av Anders Viken sine vakre og krevjande felenummer over til solo gitar. Sjølvsagt vil og praten innimellom musikken gjere deg betre kjend med læraren og spelemannen i Jølster som sette saman dei vakre slåttane og tonestykkja som han kalla det.
Møt opp i Fjellvarden laurdag 1.oktober kl.13.30!

Foto; David Zadig

27/09/2022

På Fjelljomfestivalen vert det trellspelkurs med Håvard Svendsrud.
Håvard Svendsrud (f. 1974) tek til å verte heimekjend i Stryn og i ungdomshuset Fjellvarden etter fleire glimrande konsertar og kurs. Fjelljom er stolte over å ha ein av landets aller beste og mest aktive trekkspelarar på medlemslista. Han kjem frå Modum og er i dag busett i Oslo der han og studerte på Barrat Due Musikkinstitutt 1993 – 98 med Anders Grøthe som akkordeonlærar. Sidan har han vore frilansmusikar med ei rekkje konsertturnear og plateinnspelingar både solo og i samarbeid med kjende musikarar. Tre år med kunstnarstipend fortel og sitt. Her i våre bygder har trioen hans med filinisten Arvid Engegård og bassisten Svein Haugen skapt ugløymande konsertopplevingar. Håvard driv sitt eige plateselskap, Aksent, som på Fjelljomfestivalen i år har slepp av den rykande ferske dobbelt-CDen med slåttar av og etter Per Mathiassen Bolstad (1833 – 1910) innspelte av Spelemannslaget Fjelljom, Åsmund Arnesen Farstad, Håvard Svendsrud og Arne M. Sølvberg. Den fyrste av desse sleppkonsertane er på Jostedalsbreen Nasjonalparksenter fredag 30. september kl 2000 og den andre i Ålesund søndag 2. oktober kl 1500. Trekkspelarar i området bør nytte sjansen å møte Håvard Svendsrud på eit inspirasjonskurs laurdag kl 1000 – 1230. Meld deg på til tlf 48151317 eller epost [email protected]

25/09/2022

Felekurs med Ingunn Linge Valldal
Det er slett ikkje berre dei unge og ferske som får tilbod om felekurs på Fjelljomfestivalen komande laurdag kl 1000 – 1230. Vi har eit glimrande tilbod til dei som er drivne i felefaget og kan tenkje seg litt nye slåttar og ny glød i spelinga. Ingunn Linge Valldal har i lang tid vore ei av dei aller beste på fele i Møre og Romsdal, med mange sigrar på fylkeskappleiken. Ho starta med felespel i 9-årsalderen med sambygdingen Petter Berli som læremeister. Petter var i si tid høgt oppe på resultatlistene i A-klassen på kappleikane. Ho har og teke treårig faglærarutdanning i folkemusikk på Høgskulen i Telemark. Som halvpart i duoen Ferdafolk fekk ho mangfoldige speleoppdrag både i inn- og utland. Til Fjelljomfestivalen får ho og med seg Valldal spelemannslag der ho har vore ei sentral drivkraft i årevis. Laget hennar vil spele til dans i Fjellvarden laurdags kvelden etter konserten der vi og får høyre Ingunn sitt herlege solospel. Nytt høvet til å møte Ingunn både på kurs og konsert.

24/09/2022

Mesteparten av den instrumentale folkemusikken vår er laga for dans. I våre bygder har vi ein stor rikdom av runddansslåttar, dvs. vals, reinlendar, ymse polkatypar og masurka. Det hadde difor vore svært gledeleg om endå fleire kunne ta del i dansen når slik musikk vert spelt opp t.d. på laurdagskvelden etter konserten i Fjellvarden laurdag 1. oktober. Difor tilbyr vi eit kort kurs same dagen kl 1000 – 1245. Du treng absolutt ikkje ha nokon førehandskunnskap, og lærarane Asbjørg og Arne er svært drivne i opplæring på ulike nivå. Meld deg på til tlf 48151317 eller epost [email protected]
Foto: Svein Aasen

23/09/2022

I år slår Fjelljomfestivalen eit slag for kontrabassen og har fått sjølvaste Svein Haugen som lærar på eit kort inspirasjonskurs laurdag 1. oktober kl 1000 – 1245. Svein har 38 år bak seg på kontrabass i Oslo filharmoniske orkester, og dei fleste åra der som solobassist. Og han har slett ikkje lagt opp sjølv om han er pensjonist. Han har mykje samarbeid med trekkspelaren Håvard Svendsrud og var bassist for Fjelljom på den rykande ferske plata som vert sleppt under festivalen 30. sept. Påmelding til kurs på epost [email protected] eller tlf 48151317.
Foto: Ola Alber Bjerrang

21/09/2022

Det vert songkurs med Dag Vanberg på Fjelljomfestivalen.
Ola Vanberg i Olden var ein meister i den gamle syngemåten. Han song i Folkemusikkhalvtimen, og fleire har prøvt å lære etter opptak med han. Men ingen meistrar dette betre i dag enn sonesonen Dag Vanberg frå Innvik. No har de sjansen til å få smake på Ola Vanberg sin allsidige songskatt, frå dei religiøse folketonane til dei lystige visene. Det korte songkurset frå kl 1500 til 1745 laurdag 1. oktober er som vanleg i Galleri Ad Fontes lokale på loftet til Coop Marked Fjelli. Meld deg på til tlf 48151317 eller epost [email protected]

19/09/2022

Munnharpa kan gjerne brukast i samspel med andre instrument, som eit akkompagnement. Dette vil Olav Wangensteen ta føre seg på eit kort inspirasjonskurs laurdag 1. oktober kl 1500 under Fjelljomfestivalen. Olav er frå Vang i Valdres, men busett i Ålesund. Han er røynd folkedansinstruktør og har tradisjonsmusikken i blodet frå oppveksten. Bli med på kurset sjølv om du er heilt fersk på munnharpa. Det kostar berre kr 100,- for vaksne og er gratis for dei under 20 år. Meld deg på til tlf 48151317.

18/09/2022

I samband med Fjelljomfestivalen vert det også plateslepp for dobbel-CD med slåttar av og etter P.M.Bolstad! Medverkande på plata er Spelemannslaget Fjelljom, Åsmund Arnesen Farstad, Arne M. Sølvberg og Håvard Svendsrud. Ta turen på plateslepp fredag 30.9 på Jostedalsbreen Nasjonalparksenter, Oppstryn eller søndag 2.oktober i UL Ivar Aasen, Ålesund. Plata er produsert av Aksent.

Plateselskapet Aksent lanserer høsten 2022 dobbel-CDen "Storereinlendaren og andre slåttar av og etter P.M. Bolstad". Medvirkende er Spelemannslaget Fjelljom...

16/09/2022

Nikolai Storevik vil ta seg av kurs for ferske felespelarar på Fjelljomfestivalen laurdag 1. oktober kl 1000 – 1230 (og/eller kl 1500 – 1745 for dei som ynskjer det). Nikolai er frå Stryn og har spelt fele sidan gutedagane i kulturskulen, spelemannslaget, musikklina på vg, folkehøgskulen og på høgare musikkutdanning i Stavanger og på NMH i Oslo. Han er no tilsett i halv stilling i Sogn og Fjordane Folkemusikklag og er frilans musikar i fleire grupper. Nytt sjansen og meld dykk på eller ta kontakt for meir informasjon på tlf 48151317 eller epost [email protected]. Kurset er gratis for alle under 20 år. Foto Eirik Halvorsen.jpg

11/09/2022

Til Fjelljomfestivalen har vi i år fått tak i den spreke hallingdansaren Anders Aasberg som vil halde eit kort inspirasjonskurs i halling laurdag 1. oktober kl 1500 i Fjellvarden. 41-åringen frå Hallingdal bur no i Valdres. Han har dansa sidan han var 10 år, og etter oppstarten av Frikar og det suksessrike samarbeidet med Alexander Rybak hadde Anders fleire år med dansen som leveveg. Dei siste åra har han vore litt plaga med skadar, men har no endeleg kome på golvet att og gler seg til Fjelljomfestivalen. Sjølvsagt får vi og sjå han i aksjon på festen laurdagskvelden. Meld dykk på kurset til Arne på 48151317 eller [email protected].

31/08/2022

Kurshaldar for nye trekkspelarar på Fjelljomfestivalen 2022 vert Emil Horstad. Han er 25 år og kjem ifrå Naustdal i Sunnfjord. Han er utdanna musikar og pedagog frå Norges musikkhøgskule. Der studerte han klassisk musikk og hadde akkordeon som hovudinstrument. Som musikar likar Emil å utforske ulike sjangrar, spesielt folkemusikken der han spelar med diverse lag og grupper som til dømes "Ein Haile Halve Maone" som tok ein flott tredjeplass på Landsfestivalen i gammaldans i Vågå i sommar.
For tida er han frilansmusikar og underviser på sida. På Fjelljomfestivalen tek han seg av dei ferskaste trekkspelarane på eit kort inspirasjonskurs laurdag 1. oktober.

27/08/2022

Kurshaldar i hardingfelespel på Fjelljomfestivalen 2022:
Åsmund Arnesen Farstad (f.2002) frå Volda starta med felespel i kulturskulen i femårsalderen. Etter kvart kom hardingfela og i bruk, og han har mange topplasseringar i yngste klasse på kappleikar på begge feletypane. I 2022 tok han fyrste kvalifiseringssteget opp mot klasse A på fele på Landskappleiken, og frå hausten 2022 studerer han utøvande folkemusikk ved Norges Musikkhøgskole. Åsmund er heidra med mange prisar, mellom anna Furestipend, Drømmestipend og Bolstadprisen. Han tek seg av dei unge som vil spele hardingfele på Fjelljomfestivalen.
Foto: Thomas Westling LK 2022

26/08/2022

Her er tidsplanen for årets Fjelljomfestival :)

19/08/2022

Sett av helga 30.september -2.oktober! Då er det klart for Fjelljomfestivalen 2022. Det vert mellom anna plateslepp for CDen med slåttar av og etter Per Mathiassen Bolstad. Festivalen vil ha eit rikhaldig kurs- og konserttilbod. Presentasjon av instruktørane på kursa kjem dei næraste dagane. Foto frå plateinnspelinga: Inge Fænn